Tirupati stampede | తొక్కిసలాట: ఈ పాపం పోలీసులది కాదు : డీఐజీ

ఇంటెలిజెన్సీ వైఫల్యం అని చెప్పిన టీటీడీ చైర్మన్ బీఆర్. నాయుడు చేతులు దులుపుకునే ప్రయత్నం చేశారు. ముందస్తు సమాచారం ఉందని చెప్పిన ఆయన ఎందుకు సకాలంలో యంత్రాంగాన్ని అప్రమత్తం చేయలేదునే ప్రశ్నకు సమాధానం లేదు. కుట్ర ఉందనే సందేహాన్ని రాష్ట్ర హోంశాఖ మంత్రి వంగలపూడి అనిత అభిప్రాయపడ్డారు. అధికారుల మధ్య మాటల్లో కూడా సమన్వయం లేదనడానికి కూడా ఇదో ఉదాహరణ.

తిరుపతిలో సంఘటన నేపథ్యంలో తిరుమలలో శుక్రవారం అనంతపురం రేంజ్ డీఐజీ డాక్టర్ హేమోషీ బాజ్ పాయ్ మీడియాతో మాట్లాడారు. బందోబస్తు ఏర్పాట్లపై పోలీస్ శాఖ తప్పిదం, పొరబాట్లు లేవని అన్నారు.

వైకుంఠ ఏకాదశికి తిరుపతి, తిరుమలలో సమగ్రమైన ప్రణాళికతో పోలీసు బందోబస్తును ఏర్పాటు చేశాం అన్నారు. సీఎం ఎన్. చంద్రబాబు మూడు రోజుల కుప్పం పర్యటనకు, తిరుమల, తిరుపతి ఆలయాలు, టోకెన్ల జారీ కేంద్రాల వద్ద బందోబస్తుకు వేరువేరుగా పోలీసు బలగాలను నియమించామన్నారు. కుప్పంలో విధులు నిర్వహించిన పోలీసులనే వైకుంఠ ఏకాదశికి కూడా విధులు కేటాయించామని అంటున్నారు. ఇది వాస్తవం కాదని ఆమె తెలిపారు.

"ఏకాదశి కోసం తిరుపతిలో 1500 మందికి పైగానే పోలీసులను టోకెన్ కేంద్రాల వద్ద భక్తుల భద్రత కోసం ఏర్పాటు చేశాం. తిరుమల, తిరుపతి ఆలయాల్లో వైకుంఠ ఏకాదశి బందోబస్తుకు 2,424 మంది పోలీసులు విధుల్లో ఉన్నారు" అని వివరించారు.

ఆధారాలు సేకరిస్తున్నాం..

తిరుపతిలో బైరాగిపట్టెడ టోకెన్ కేంద్రం వద్ద భక్తులు ఊహించని విధంగా ఒక్కసారిగా రద్దీ పెరగడంతో ఈ సంఘటన జరిగిందని అనంతపురం రేంజ్ డీఐజీ డాక్టర్ హేమోషీ బాజ్ పాయ్ విశ్లేషించారు. అక్కడ విధుల్లో ఉన్నవారు సరైన నిర్ణయం తీసుకోకపోవడంతో ఈ సంఘటన జరిగినట్టు ప్రాథమిక విచారణలో తెలిసిందని వివరించారు. ఈ విషాద సంఘటనపై విచారణలో బాధ్యులను గుర్తించిన తర్వాత వారిపై తగిన చర్యలు తీసుకుంటామన్నారు. టోకెన్లు జారీ చేసిన కేంద్రాల వద్ద గేట్లను తగిన జాగ్రత్తలు తీసుకున్న తర్వాత తెరిచారా? లేదా? విధుల్లో నిర్లక్ష్యంతో గేట్లు తీసి భక్తులను, ఒక్కసారిగా వదిలారా? అనేది కూడా నిశితంగా విచారిస్తున్నాం. విచారణలో వాస్తవాలు వెలుగు చూస్తాయన్నారు. ఈ సంఘటనకు సంబంధించిన సాంకేతికపరమైన సీసీ కెమెరాలు పుటేజ్, మొబైల్లో తీసిన వీడియో ఫుటేజీ, ఫొటోలు, ఇతర అన్ని వివరాలను కూడా సేకరిస్తున్నట్లు వివరించారు.