TTD- Tirumala | తిరుమల : పది రోజుల వైకుంఠ దర్శనాలపై సమీక్షిస్తాం..

ఇదే ఏడాది డిసెంబర్ 30 వ తేదీ నుంచి మళ్లీ ప్రారంభమయ్యే వైకుంఠ ఏకాదశికి పది రోజులపాటు దర్శనాలు కొనసాగించాలా? గతంలో మాదిరి రెండు రోజులకే పరిమితం చేయాలా? అనే విషయంపై ఆగమశాస్త్ర పండితుల సలహాలు తీసుకోవాలని టిటిడి పాలకమండలి అత్యవసర సమావేశం తీర్మానించింది. తొక్కిసలాటలో మరణించిన ఆరుగురు, గాయపడిన వారికి నష్టపరిహారం చెల్లించాలని సీఎం చంద్రబాబు ఆదేశాల మేరకు నిధులు మంజూరు చేస్తూ ఈ సమావేశంలో నిర్ణయం తీసుకున్నారు.

టిటిడి చైర్మన్ బిఆర్ నాయుడు అధ్యక్షతన తిరుమలలో శుక్రవారం సాయంత్రం నుంచి సుమారు రెండు గంటల పాటు అత్యవసర సమావేశం జరిగింది. ఈ సమావేశంలో తీసుకున్న రెండు నిర్ణయాలను ఆయన మీడియాకు వెల్లడించారు. టీటీడీ అత్యవసర సమావేశం ప్రారంభానికి ముందు తొక్కిసలాటలో మరణించిన ఆరుగురు యాత్రికులకు నివాళులర్పించింది. వారి ఆత్మశాంతి కోసం పాలక మండలి సభ్యులు, అధికారులు రెండు నిమిషాలు మౌనం పాటించి, శ్రద్ధాంజలి ఘటించారు.

తిరుమలలో వైకుంఠ ద్వార దర్శనం కోసం టోకెన్ల జారీకి ఏర్పాటుచేసిన బైరాగి పట్టెడ, శ్రీనివాసం యాత్రికుల వసతి సముదాయం వద్ద జరిగిన తొక్కిసలాటలో ఆరుగురు మరణించిన విషయం తెలిసిందే. ఈ సంఘటనల నేపథ్యంలో గురువారం సీఎం చంద్రబాబు టీటీడీ పరిపాలన భవనంలో అధికారులతో సుదీర్ఘంగా సమీక్ష నిర్వహించారు.

తిరుమల అన్నమయ్య భవన్ లో శుక్రవారం సాయంత్రం రెండు గంటల పాటు టీటీడీ చైర్మన్ బి.ఆర్ నాయుడు అధ్యక్షతన అందుబాటులోని పాలకమండలి సభ్యులతో అత్యవసర సమావేశం నిర్వహించారు. సీఎం చంద్రబాబు ఆదేశాల మేరకు, చనిపోయిన వారి కుటుంబాలు, గాయపడిన క్షతగాత్రులకు పరిహారం చెల్లించడానికి వీలుగా పాలకమండలిలో తీర్మానం ఆమోదించారు. దీనిపై టిటిడి చైర్మన్ వి.ఆర్ నాయుడు మాట్లాడుతూ, "మృతుల ఊర్లకు వెళ్లి వారి కుటుంబ సభ్యులకు అధికారులు పరిహారం చెల్లిస్తారు" అని టిటిడి చైర్మన్ బి.ఆర్ నాయుడు బోర్డులో ఆమోదించిన తీర్మానాన్ని వెల్లడించారు. సమావేశంలో టీటీడీ బోర్డు సభ్యులు పనబాక లక్ష్మి, జీ. భానుప్రకాష్ రెడ్డి, ఆనందసాయి, టీటీడీ చైర్మన్ శ్యామలరావు, అదనపు ఈఓ వెంకయ్య చౌదరి, అధికారులు పాల్గొన్నారు.

తిరుపతిలో తొక్కిసిలాట జరగడానికి ఈఓ శ్యామల రావు, అదనపు ఈఓ వెంకయ్య చౌదరి కూడా బాధ్యులే అని డిప్యూటీ సీఎం పవన్ కళ్యాణ్ ఘాటుగా వ్యాఖ్యానించిన విషయం తెలిసిందే. జరిగిన ఘటనపై టీటీడీ పెద్ద బహిరంగ క్షమాపణ చెప్పాలని కూడా ఆయన డిమాండ్ చేశారు.

దీనిపై టిటిడి చైర్మన్ డియర్ నాయుడు స్పందించారు. "క్షమాపణలు చెప్పినంత మాత్రాన పోయిన ప్రాణాలు తిరిగి వస్తాయా?" అని పవన్ కళ్యాణ్ డిమాండ్కు టీటీడీ చైర్మన్ బిఆర్ నాయుడు కౌంటర్ ఇచ్చారు.