TIRUPATI STAMPEDE | వైకుంఠ దర్శనం:తొక్కిసలాటలో ఆరుగురు మృతి

తిరుమల శ్రీవారిని ఉత్తర ద్వారంలో దర్శించుకోవడానికి టోకెన్లను జారీ చేసేందుకు తిరుపతి లో ఏర్పాటు చేసిన కేంద్రాల వద్ద జరిగిన తొక్కిసలాటలో ఆరుగురు మరణించారు. ఇందులో ఐదుగురు మహిళలు ఉన్నారు. ఇందులో పలువురు గాయపడటంతో పాటు ఇంకొందరు స్పృహ కోల్పోయారు. వారందరినీ టీటీడీ సెక్యూరిటీ సిబ్బంది అంబులెన్సులలో రూయా, స్విమ్స్ ఆసుపత్రులకు తరలించారు. రూయా ఆసుపత్రిలో 20 మంది, స్విమ్స్ లో 9 మంది చికిత్సపొందుతున్నట్లు సమాచారం. ఇలాంటటి దుర్ఘటన జరగడం ఇదే ప్రథమం.

తిరుమలలో వైకుంఠ ద్వారాలు గురువారం వేకువజామున తెరుచుకోనున్నాయి. దీనికోసం తిరుపతిలో 9 చోట్ల ప్రత్యేకంగా టోకెన్లు జారీకి కేంద్రాలు ఏర్పాటు చేశారు. శ్రీవారిని ఉత్తర ద్వార దర్శనం చేసుకోవాలని రాష్ట్రంలోని వివిధ ప్రాంతాలతో పాటు తమిళనాడు నుంచి భారీగా యాత్రికులు తరలివచ్చారు. తిరుపతిలోని అలిపిరి సమీపంలో ఉన్న భూదేవి కాంప్లెక్స్, రామచంద్ర పుష్కరిణి, శ్రీనివాసం, విష్ణు నివాసం, బైరాగి పట్టెడతో పాటు ఇంకొన్ని కేంద్రాల్లో ప్రత్యేక కౌంటర్లు ఏర్పాటు చేశారు. తిరుపతి నగరంలోని వివిధ ప్రాంతాలలో ఏర్పాటు చేసిన కేంద్రాలన్నీ బుధవారం ఉదయం నుంచి యాత్రికులతో కిక్కిరిశాయి.