విజయవాడ ఎంపీ చిన్ని ద్వారా టీడీపీలోకి వాసిరెడ్డి పద్మ

మహిళా సమస్యలపై తాను పోరాడుతూనే ఉంటానని పలు సార్లు చెప్పారు. వైఎస్సార్సీపీ మాజీ ఎంపీ గోరంట్ల మాధవ్ మీడియాతో మాట్లాడుతూ అత్యాచారానికి గురైన మహిళల పేర్లు వెల్లడించి వారిని మంరింత కుంగిపోయేలా చేశారని, ఆయన ఒక మాజీ పోలీస్ అధికారి అయి ఉండి కూడా ఇలా చేయడం ఏమిటని ఆమె విజయవాడ పోలీస్ కమిషనర్ కు మాధవ్ పై ఫిర్యాదు చేశారు. ఈ ఫిర్యాదు చేసింది తెలుగుదేశం పార్టీ, ముఖ్యమంత్రి దృష్టిలో పడేందుకేననే చర్చ అప్పటిలో సాగింది. పలు సందర్భాల్లో ఆమె మీడియా వారితో మాట్లాడే టప్పుడు మీడియా వారు అడిగిన ప్రశ్నలకు సమాధానం చెబుతూ ఇంకా టీడీపీలో చేరాలనేది నిర్ణయించుకోలేదని, ఉంటే మీకు చెబుతానని చెప్పారు. అంటే తప్పకుండా తెలుగుదేశంలో చేరేందుకు రూట్ క్లియర్ చేసుకునే పనిలో ఉన్నారని అప్పటికే చాలా మందికి అర్థమైంది.

ఇప్పటికి మూడు సార్లు విజయవాడ ఎంపీ కేశినేని శివనాథ్ (చిన్ని)ని కలిసారు. తెలుగుదేశం పార్టీలో చేరే విషయమై ఆమె చిన్నీతో చర్చించినట్లు సమాచారం. నేరుగా చంద్రబాబును కలిసి పార్టీలో చేరకుండా పార్టీ ప్రధాన కార్యదర్శిగా ఉన్న నారా లోకేష్ ను కలిసి పార్టీలో చేరాలనే ఆలోచనలో ఆమె ఉన్నారు. ముందు లోకేష్ దగ్గర క్లియరెన్స్ తీసుకుంటే ముఖ్యమంత్రిని కలవచ్చనే ఆలోచనలో ఉన్నారు. లోకేష్ తో ఎంపీ చిన్నీకి మంచి సంబంధాలు ఉన్నందున ఎంపీ ద్వారా పార్టీలో చేరటానికి అన్ని ఏర్పాట్లు జరిగినట్లు సమాచారం. విజయవాడలోని ఎంపీ ఆఫీస్ లో పద్మ ఎంపీని కలవడం వల్ల తప్పకుండా చేరుతారని ఎప్పుడనే దాని కోసం కసరత్తు జరుగుతున్నట్లు తెలిసింది.

ఇటీవల విజయసాయిరెడ్డి ఒక ట్వీట్ చేస్తూ చంద్రబాబుకు వయసు మళ్లిందని, ప్రభుత్వ బాధ్యతలు పవన్ కళ్యాన్ కు అప్పగిస్తే బాగుంటుందన్నారు. దీనిపై పద్మ స్పందించారు. ముందు జగన్ ను పార్టీ అధ్యక్ష పదవి వాళ్ల అమ్మ విజయమ్మకు ఇవ్వమని చెప్పండి. అప్పుడు చంద్రబాబు, పవన్ కళ్యాణ్ గురించి, ప్రభుత్వం గురించి మాట్లాడొచ్చు అంటూ విజయసాయిరెడ్డికి కౌంటర్ ఇచ్చారు. అవకాశం వచ్చినప్పుడల్లా వైఎస్సార్సీపీ వారిని వదలకుండా విమర్శలు గుప్పిస్తున్నారు. ఈమె మంచి మాటకారి అయినందున పార్టీలోకి తీసుకుంటే మహిళా సమస్యలపై ఫోకస్ పెట్టి ప్రభుత్వం చేస్తున్న సంక్షేమ కార్యక్రమాల ప్రచారానికి ఉపయోగించుకోవచ్చనే ఆలోచనలో తెలుగుదేశం వారు ఉన్నారు. మొత్తం మీద ఈ నెలాఖరుకు తెలుగుదేశం పార్టీలో వాసిరెడ్డి పద్మ చేరే అవకాశాలు మెండుగా ఉన్నాయి.