పిన్నెల్లికి ఊరట లభిస్తుందా!

ఇప్పటికే ఈవీఎంల ధ్వంసం కేసులో వచ్చే నెల 6వ తేదీ వరకు పిన్నెల్లిని అరెస్టు చేయొద్దంటూ కోర్టు ఆదేశించింది. మాచర్ల అసెంబ్లీ నియోజక వర్గంలో గతంలో లేని విధంగా ఈ ఎన్నికల్లో హింస చెలరేగడానికి పోలీసుల నిర్లక్షమే కారణమని భారీ స్థాయిలో విమర్శలు వెల్లువెత్తాయి. కేంద్ర ఎన్నికల సంఘం కూడా పోలీసు శాఖపై తీవ్రమైన చర్యలు తీసుకుంది. కొందరు ఐపీఎస్‌లను కూడా సస్పెండ్‌ చేసింది. దీంతో పోలీసు శాఖ కూడా జరిగిన నేరాలపై పూర్తి స్థాయి దృష్టి పెట్టింది. సంఘటన జరిగిన రోజు ఫిర్యాదులు రాకపోయినా, బాధితులు ముందుకొచ్చి విషయం చెప్పేందుకు భయపడుతున్నారనే విషయాన్ని సీరియస్‌గా తీసుకున్న పోలీసులు వారి వద్దకే వెళ్లి పోలీసు శాఖ అండగా ఉంటుందంటూ వారి ద్వారా ఫిర్యాదులు తీసుకొని కేసులు నమోదు చేశారు.

1. రెంటచింతల మండలం పాల్వాయి రైల్వే గేటు వద్ద పోలింగ్‌ స్టేషన్‌లో ఈవీఎంలను ఎమ్మెల్యే పిన్నెల్లి ధ్వసం చేయడం.

2. అడ్డుకున్న తెలుగుదేశం పార్టీ ఏజెంటు నంబూరి శేషగిరిరావుపై కొందరు పిన్నెల్లి అనుచరులు దాడి చేసి తల పగుల గొట్టారు. ఐపీసీ 307 సెక్షన్‌ కింద కేసు నమోదైంది.

3. పోలింగ్‌ మరుసటి రోజు కారంపూడిలో ఎమ్మెల్యే పిన్నెల్లి, ఆయన తమ్ముడు వెంకట్రామిరెడ్డి అరాచకం సృష్టించి పలు వాహనాలు దగ్దం కావడానికి కారణమయ్యారు. అడ్డుకోబోయిన సీఐ టీపీ నారాయణస్వామిపై దాడి చేసి గాయపరిచారు. ఇందులోను ఐపీసీ 307 సెక్షన్‌ కింద కేసు నమోదైంది.

4. ఈవీఎంలను ధ్వంసం చేసి బయటకు వచ్చిన ఎమ్మెల్యే పిన్నెల్లిని చెరుకూరి నాగ శిరోమణి ఎందుకు ఈవీఎంలను పగులగొట్టావయ్య అని ప్రశ్నించినందుకు ఆమెను తీవ్రంగా దుర్బాషలాడారని చేసిన ఫిర్యాదు మేరకు రెంటచింతల పోలీసులు పిన్నెల్లిపై ఐపీసీ 506, 509 సెక్షన్‌లు 131 ఆర్పీ చట్టం కింద కేసు నమోదు చేశారు.

ఈ కేసులు నుంచి పిన్నెల్లి బయట పడేందుకు ముందస్తు బెయిల్‌కు పిటీషన్‌లు దాఖలు చేసుకోగా మంగళవారానికి తీర్పును కోర్టు వాయిదా వేసింది.