కర్నాటక: సిద్ధరామయ్య రాజకీయ ఎత్తులు, ‘డీకే’ కు డిప్యూటీ చిక్కులు
కర్నాటకలో డిప్యూటీ సీఎం డికే శివకుమార్ స్పీడ్ కు బ్రేక్ లు వేసే పనిని సీఎం సిద్ధరామయ్య ప్రారంభించారు. మరో నలుగురు ఉపముఖ్యమంత్రి పదవి సృష్టించే పనిని..
కర్నాటక లో అధికార కాంగ్రెస్ పార్టీలో అంతర్గత పోరు నడుస్తుంది. ముఖ్యంగా ఉప ముఖ్యమంత్రి పదవులు ఇవ్వాలని పార్టీలోని వివిధ వర్గాలకు ప్రాతినిధ్యం వహిస్తున్న నాయకులు డిమాండ్ చేస్తున్నారు. లోక్ సభ ఎన్నికల్లో పార్టీ అనుకున్నంత మేర పని చేయలేదని, అందుకని పార్టీకి తిరిగి ఆయా వర్గాల్లో బలోపేతం చేసేందుకు కనీసం మూడు ఉపముఖ్యమంత్రి పదవులు ఇవ్వాలని కొన్ని సమూహాలు డిమాండ్ చేస్తున్నాయి.
అయితే ఇలా డిమాండ్ చేస్తున్న నాయకులంతా కేవలం ముఖ్యమంత్రి సిద్ధరామయ్య కు విధేయులు కావడంతో ఇది ఉపముఖ్యమంత్రి డీకే శివకుమార్ కు చెక్ పెట్టేందుకే వేసిన ఎత్తుగడగా రాజకీయ విశ్లేషకులు భావిస్తున్నారు. పరోక్షంగా డీకే ప్రాభావాన్ని తగ్గించేందుకు ఇలా డిమాండ్లు చేపిస్తున్నారని తెలుస్తోంది. ఎందుకంటే సిద్ధరామయ్య తరువాత సీఎం కుర్చీ డీకే కే వస్తుందని ఆయన వర్గం బలంగా నమ్ముతోంది.
DKS లక్ష్యంగా మళ్లింపు వ్యూహమా?
కర్నాటకలో పార్టీని అధికారంలోకి తీసుకురావడంలో డీకే శివకుమార్ ముఖ్యమైన పాత్ర పోషించారు. ఆయన కేపీసీసీ అధ్యక్షుడిగా తన పాత్రను సమర్థవంతంగా పోషించారు. తనకే ముఖ్యమంత్రి పదవి వస్తుందని నమ్మకంగా ఉన్నప్పటికీ అధిష్టానం సిద్దరామయ్య వైపే మొగ్గు చూపింది. అయితే సీఎం పీఠం ఎక్కడానికి ఇప్పటికి డీకేఎస్ ప్రయత్నాలు చేస్తూనే ఉన్నారు. దీనితో పాటు డిప్యూటీ సీఎం పదవిని ఇతరులతో పంచుకోవడానికి ఆయన సిద్ధంగా లేరు.
సీఎంగా సిద్ధరామయ్య రెండున్నర సంవత్సరాలు పూర్తి చేసుకున్న తరువాత తనకు ఈ పదవి వస్తుందని, ఆయన నమ్మకంగా ఉన్నారు. అధిష్టానం తనకు ఓ అవకాశం ఇస్తుందని ఆయన నమ్మకంగా ఉన్నారు కూడా. దీనికి కౌంటర్ వేయడానికి సిద్ధరామయ్య ఈ ఎత్తు వేసినట్లు అర్ధం అవుతుంది.
లోక్‌సభ ఎన్నికల్లో ఓల్డ్ మైసూరు ప్రాంతంలో వొక్కలిగ బెల్ట్‌ను నిలుపుకోవడంలో శివకుమార్ వైఫల్యాన్ని ఎత్తిచూపడం ద్వారా సిద్ధరామయ్య బృందం కూడా శివకుమార్‌ను కార్నర్ చేయాలని యోచిస్తోందని కొన్ని వర్గాలు చెబుతున్నాయి. ఈ ఎన్నికల్లో డీకే తమ్ముడు సురేష్ ఓటమి పాలయ్యారు. ఇదే అంశాన్ని సిద్ధరామయ్య తనకు అనుకూలంగా మార్చుకున్నాడు.
2023లో, కర్ణాటకలో జరిగిన అసెంబ్లీ ఎన్నికల్లో కాంగ్రెస్ గెలిచిన తర్వాత, అహిండ (మైనారిటీలు, వెనుకబడిన తరగతులు, దళితులకు కన్నడ సంక్షిప్త పదం) నాయకుడు సిద్ధరామయ్యను ముఖ్యమంత్రిగా పార్టీ హైకమాండ్ ఎంపిక చేసింది. ఇప్పుడు డిప్యూటీ సీఎం పదవి కోసం దళిత నేతలు లాబీయింగ్ చేస్తున్నారు
సిద్ధరామయ్య ఈ స్పష్టమైన ప్రణాళికలో భాగంగా, సతీష్ జార్కిహోళి, కెఎన్ రాజన్న, బిజెడ్ జమీర్ అహ్మద్ ఖాన్‌తో సహా పలువురు మంత్రులు సిద్ధరామయ్య మంత్రివర్గంలో ఉప ముఖ్యమంత్రుల పదవి కోసం బహిరంగంగా ప్రకటనలు జారీ చేస్తున్నారు. జార్కిహోళి, రాజన్న, డాక్టర్ జి పరమేశ్వర కూడా సిద్ధరామయ్య మంత్రివర్గంలో దళితుడిని ఉప ముఖ్యమంత్రిగా నియమించాలని డిమాండ్ చేశారు.
శివకుమార్ ఉప ముఖ్యమంత్రి పదవితో సంతృప్తి చెంది ముఖ్యమంత్రి పదవిపై దృష్టి సారించే పరిస్థితిని రాకుండా చేసేందుకు ఈ చర్య తీసుకున్నట్లు సిద్ధరామయ్య క్యాబినెట్‌లోని ఒక మంత్రి ఫెడరల్‌తో చెప్పారు. ఇటీవలి రోజుల్లో, అదనపు ఉపముఖ్యమంత్రులను కావాలని పలువురు నాయకులు వ్యాఖ్యానించడం, పార్టీ హైకమాండ్‌ను మాత్రం కలవరపెడుతోంది.
లోక్‌సభ ఎన్నికలకు ముందు ఇలాంటి విషయాలపై వ్యాఖ్యానించవద్దని కాంగ్రెస్ పార్టీ అధ్యక్షుడు ఎం. మల్లికార్జున్ ఖర్గే బహిరంగంగానే తమ పార్టీ నేతలను కోరారు. ఇప్పుడు ఎన్నికలు ముగిసినందున, దళిత నాయకులు ఈ సమస్యను లేవనెత్తారు. తమ సామాజికవర్గానికి చెందిన ఉప ముఖ్యమంత్రి కోసం తీవ్రంగా లాబీయింగ్ చేస్తున్నారని, ఈ చర్యకు ముఖ్యమంత్రి నేరుగా మద్దతు ఇస్తున్నారని చెప్పారు.
హైకమాండ్ మదిలో ఏముంది
అహ్మద్ ఖాన్, జార్కిహోళి సహా సిద్ధరామయ్య వర్గానికి చెందిన నేతలు ఈ అంశాన్ని లేవనెత్తగా, వివిధ వర్గాలకు ప్రాతినిధ్యం వహించేలా మరిన్ని ఉపముఖ్యమంత్రి పదవులు కల్పించాలని మంత్రి రాజన్న సూచించారు. ఈ విషయంపై పార్టీ హైకమాండ్‌తో చర్చించేందుకు రాష్ట్ర కాంగ్రెస్ నేతలు త్వరలో ఢిల్లీ వెళ్లే అవకాశం ఉందని సంబంధిత వర్గాలు చెబుతున్నాయి. జార్కిహోళి ఇప్పటికే ఢిల్లీకి వెళ్లారని, మరికొందరు నేతలు హైకమాండ్‌ను కూడా కలవవచ్చని సమాచారం.
అయితే, కాంగ్రెస్ అధ్యక్షుడు ఖర్గే కుమారుడు, సిద్ధరామయ్య మంత్రివర్గంలోని మంత్రి ప్రియాంక్ ఖర్గే మాట్లాడుతూ.. రాష్ట్రంలో ఉప ముఖ్యమంత్రి పదవులు ఎందుకు, వాటి వల్ల ఎలాంటి ప్రయోజనం కలుగుతుందని ప్రశ్నించారు. ఇది నేరుగా తగలవలసిన వారికి తగిలింది.
రాజన్న ప్రతిపాదనపై ప్రియాంక్ స్పందిస్తూ.. అలాంటి నిర్ణయాన్ని ఢిల్లీలోని సీనియర్ నేతలకే వదిలేయాలని అన్నారు. పదవులు అడిగే హక్కు ప్రతి ఒక్కరికీ ఉంటుందని పునరుద్ఘాటించిన ఆయన, బహుళ ఉపముఖ్యమంత్రులను కలిగి ఉండటంలో సాధ్యాసాధ్యాలు, సమర్థత ఏమిటని ప్రశ్నించారు. లోక్‌సభ ఎన్నికల్లో సీట్ల అంచనాలను ఎందుకు అందుకోలేదో పార్టీ ఆలోచించుకోవాల్సిన అవసరం ఉందని ప్రియాంక్ సూచించారు.
అధికార పోరు
కర్ణాటక కాంగ్రెస్‌లో తలెత్తుతున్న కుమ్ములాటలు అంతర్గత అధికార పోరును మరోసారి బయటపెట్టింది. పార్టీ ఐక్యత కాపాడుకోవడం, వివిధ సంఘాల ఆందోళనలు పరిష్కరించడం పార్టీకి తలనొప్పిగా మారే అవకాశం కనిపిస్తోంది. నేతలు తమ వాదనను ఢిల్లీలోని హైకమాండ్ దృష్టికి తీసుకువెళ్లేందుకు సిద్ధమవుతున్న తరుణంలో, ఈ తగాదా ఫలితం పార్టీ భవిష్యత్తు అంచనాలు, నాయకత్వాన్ని మాత్రం కచ్చితంగా ప్రభావితం చేస్తుంది.
లోక్‌సభ ఎన్నికలకు ముందు, రాజన్న సామాజిక ఆధారిత ఉప ముఖ్యమంత్రి పదవులను సృష్టించాలని డిమాండ్ చేశారు, ఇది ఎన్నికల్లో పార్టీకి వివిధ వర్గాల మద్దతును పొందడంలో సాయపడుతుందని వాదించారు. హోంమంత్రి పరమేశ్వర, సతీష్ జార్కిహోళి తదితరులు కూడా ఈ ఆలోచనతో ఏకీభవించడంతో అంతర్గత సమావేశాలు నిర్వహించి చర్చించారు.
కర్ణాటకలో జరిగిన అసెంబ్లీ ఎన్నికల్లో పార్టీ విజయం సాధించడంతో ముఖ్యమంత్రి పదవికి గట్టి పోటీనిచ్చిన శివకుమార్‌కు తగ్గట్టుగా ఉప ముఖ్యమంత్రి పదవిని సృష్టించారు. ఆ సమయంలో, సీనియర్ కాంగ్రెస్ నాయకుడు బసవరాజ రాయరెడ్డి, శివకుమార్‌ను ప్రిన్సిపల్ డిప్యూటీ సీఎంగా చేయాలని, ఇతరులను సాధారణ ఉప ముఖ్యమంత్రులుగా నియమించాలని ప్రతిపాదించారు. ఈ సూచన తీవ్ర చర్చకు దారి తీయగా, శివకుమార్ హైకమాండ్‌కు ఫిర్యాదు చేయడంతో చర్చ తాత్కాలికంగా నిలిచిపోయింది.
బీజేపీ ఉదాహరణలు..
లోక్‌సభ ఎన్నికల్లో పార్టీ పనితీరు అంతంత మాత్రంగానే ఉండడంతో పాటు త్వరలో జరగనున్న జిల్లా, తాలూకా పంచాయతీ, బృహత్ బెంగళూరు మహానగర పాలక ఎన్నికలకు ముందు మళ్లీ సామాజికవర్గం ఆధారిత ఉపముఖ్యమంత్రుల అవసరంపై ఆశావహులు ప్రకటనలు చేయడం ప్రారంభించారు. ఈ అంశంపై ఢిల్లీలో పార్టీ సీనియర్ నేతలు సమిష్టిగా చర్చించాల్సిన అవసరాన్ని జార్కిహోళి చెప్పారు, అయితే నాయకులను విస్మరిస్తే వర్గాలలో పార్టీ నమ్మకాన్ని కొల్పోయే అవకాశం ఉందని రాజన్న అన్నారు.
ఉప ముఖ్యమంత్రులను సృష్టించడం సాధ్యమయ్యే ఎంపిక అని, అనేక రాష్ట్రాల్లో బిజెపి ఇలాంటి ప్రయోగాలు చేసిందని అన్నారు. ఎక్కువ మంది ఉపముఖ్యమంత్రులను ఉంటే సమాజంలో గౌరవం పెరుగుతుందని, పార్టీపై నమ్మకం పెరుగుతుందని ఆయన వాదిస్తున్నారు.
లోక్‌సభ ఎన్నికలలో బిజీగా ఉన్న సమయంలో ఈ అంశాన్ని లేవనెత్తలేదని, ఇప్పుడు అహ్మద్ ఖాన్, జార్కిహోళితో సహా పలువురు మంత్రులు లేవనెత్తారని రాజన్న పేర్కొన్నారు. నిర్ణయం అంతిమంగా పార్టీ అగ్ర నాయకత్వానిదే అన్నారు. మరిన్ని ఉపముఖ్యమంత్రి పదవులు కావాలని ఆకాంక్షిస్తున్నవారు ఎందుకు కోరుకుంటున్నారో ఇక్కడ ఉంది. కాంగ్రెస్ రాష్ట్రంలోని 19 లోక్‌సభ నియోజకవర్గాలను కోల్పోయింది, ఎందుకంటే ఎన్నికలకు ముందు ఏ సంఘం నాయకత్వాన్ని ఇక్కడ గుర్తించలేదు కాబట్టి.
* ఉపముఖ్యమంత్రి పదవులు కల్పిస్తే అవి పార్టీకి ఉపయోగపడేవి.
*భవిష్యత్తు కోసం, పార్టీ స్థానిక సంస్థల ఎన్నికలను ఎదుర్కొంటున్నందున సంఘం నాయకత్వానికి గుర్తింపు అవసరం. రాష్ట్రంలో పార్టీ భవిష్యత్తు కోసం ద్వితీయశ్రేణి నాయకత్వాన్ని తీర్చిదిద్దాలి.
* డిప్యూటీ సీఎం పదవులు దళిత, లింగాయత్, మైనారిటీ నేతలకు ఇవ్వాలి. వెనుకబడిన తరగతులకు సిద్ధరామయ్య ప్రాతినిధ్యం వహిస్తుండగా, శివకుమార్ వొక్కలిగాలకు ప్రాతినిధ్యం వహిస్తున్నారు. ఈ విధంగా, మూడు ఇతర ప్రధాన వర్గాలకు ప్రాధాన్యత ఇవ్వాలి (కర్ణాటకకు ఒక ముఖ్యమంత్రి, నలుగురు ఉప ముఖ్యమంత్రుల ప్రణాళికను నాయకులు ప్రతిపాదించారు).
Next Story
