నీటిని ‘నీళ్ల’లాగా ఖర్చు చేస్తే... అక్కడ ఇక నుంచి ఫైన్

కరువుతో కర్నాటక, నీటికొరతతో బెంగళూర్ అల్లాడుతున్నాయి. బిందెడు నీళ్ల కోసం ట్యాంకర్ల వెంట ప్రజలు పరుగులు తీస్తున్నారు. నీటి కొరత కారణంగా స్కూళ్లు మూసివేశారు.. ఐటీ ఉద్యోగులు సైతం వర్క్ ఫ్రమ్ హోం చేయాలని కంపెనీలన్నీ సూచించాయి. నగరంలో ఇలాంటి పరిస్థితులు ఉంటే కొంతమంది మాత్రం నీటిని ఇష్టారాజ్యంగా వాడుతున్నారు.

నీటిని పొదుపు చేయాలని ప్రాథమిక సూత్రాన్ని విస్మరించారు. కార్లు కడగడం, తోట పని కోసం, అలంకరణ కోసం నీటిని వాడడం వంటి పనులు చేయడంతో బెంగళూర్ నీటిసరఫరా, మురుగునీటి బోర్డు(BWSSB) అలాంటి వారిపై కొరడా ఝలుపించింది.

‘నగరంలో నీటి కొరత కొనసాగుతున్న తరుణంలో, అనవసర అవసరాలకు తాగునీరందించకూడదనే ఆదేశాలను ఉల్లంఘించినందుకు 22 కుటుంబాలకు ఒక్కొక్కరికి రూ.5,000 జరిమానా విధించాం’ అని ఓ అధికారి ప్రకటించారు. రెండు వారాల క్రితం ఈ ఉత్తర్వు జారీ చేశారు.

సోషల్ మీడియా ద్వారా బెంగళూరు నీటి సరఫరా, మురుగునీటి బోర్డు (BWSSB)కి వచ్చిన అనేక ఫిర్యాదుల ఆధారంగా ఈ చర్య తీసుకున్నట్లు అధికారులు తెలిపారు. ఇతర అనవసరమైన అవసరాల కోసం త్రాగునీటిని ఉపయోగించినందుకు 22 కుటుంబాల నుంచి రూ.1.1 లక్షల జరిమానా వసూలు చేసింది.