లౌకికవాదం యూరోపియన్లది.. అది మనది కాదు: తమిళనాడు గవర్నర్

లౌకికవాదం గురించి తమిళనాడు గవర్నర్ ఆర్ఎన్ రవి చేసిన వ్యాఖ్యలపై కాంగ్రెస్, సీపీఎం అభ్యంతరం వ్యక్తం చేశాయి. లౌకిక వాదం పూర్తిగా యూరోపియన్ భావన అని ఆయన అభిప్రాయపడ్డారు. లౌకికవాదం అనేది చర్చి- రాజుల మధ్య వివాదం తర్వాత ఉద్భవించిన యూరోపియన్ భావన. దీనికి భారతదేశానికి సంబంధం లేదు. భారత్ మొదటి నుంచి ధర్మ కేంద్రీకృత దేశం కాబట్టి ఇది మన సంస్కృతిలో భాగం కాదు.

మన రాజ్యాంగంలో కూడా లేదు. కానీ ఎమర్జెన్సీ సమయంలో "ఒక అసురక్షిత ప్రధానమంత్రి" దీనిని బలవంతంగా దేశం మీద రుద్దారని అన్నారు. దేశ ప్రజలపై చాలా మోసాలు జరిగాయని, అందులో ఒకటి లౌకికవాదానికి తప్పుడు భాష్యం అని కన్యాకుమారి జిల్లాలో ఆదివారం జరిగిన ఓ కార్యక్రమంలో ఆయన అన్నారు. "సెక్యులరిజం అంటే ఏమిటి? సెక్యులరిజం అనేది యూరోపియన్ భావన, లౌకికవాదం భారతీయ భావన కాదు" అని ఆయన అన్నారు.