సార్వత్రిక ఎన్నికల సమరంలో కాంగ్రెస్ తాజాగా ప్రకటించిన జాబితాతో కర్నాటకలో మొత్తం 24 స్థానాలకు పార్టీ అభ్యర్థులు ప్రకటించినట్లయింది. ఇక్కడ మొత్తం 28 స్థానాలు ఉన్నాయి. 2019 లోక్ సభ ఎన్నికల్లో కాంగ్రెస్ పార్టీ ఘోర పరాజయం మూటగట్టుకుంది. కేవలం ఒకే ఒక సీటును సాధించింది.
మిగిలిన నాలుగు స్థానాలకు తీవ్రంగా పోటీ ఉంది. దీనికి పెద్ద ఎత్తున వలసనేతలు, స్థానిక కాంగ్రెస్ నాయకులు పోటీ పడుతున్నారు. అయితే ఈ జాబితాలో అందరూ ఊహించినట్లుగా ఏఐసీసీ అధ్యక్షుడు మల్లికార్జున్ ఖర్గే గుల్బర్గా స్థానంలో పోటీ చేయడం లేదని, ఈ స్థానంలో ఆయన అల్లుడు రాధాకృష్ణ దొడ్డమణి పోటీ చేస్తారని ప్రకటించింది.
పార్టీ గురువారం (మార్చి 21) విడుదల చేసిన అభ్యర్థుల మూడో జాబితాలో ఈ విషయం వెల్లడైంది. అయితే ఎన్నికల్లో పోటీ చేయకూడదని ఖర్గే తీసుకున్న నిర్ణయం రాష్ట్ర ఫలితాన్ని ప్రభావితం చేస్తుందని కొందరు నాయకులు భావిస్తున్నారు. ఇది దళిత నాయకుడిగా అతని స్థాయిని పరిగణలోకి తీసుకోలేదని ప్రజల్లోకి వెళ్తే ఫలితాలు ఎలా ఉంటాయో అని ఆందోళన వ్యక్తం చేస్తున్నారు .
పోటీ చేయకపోవడంపై ఖర్గే సమర్థన
ఈ పరిస్థితిపై ఫెడరల్‌తో ఓ పార్టీ నాయకుడు మాట్లాడుతూ.. లోక్‌సభ ఎన్నికల్లో కాంగ్రెస్ అధ్యక్షుడు పోటీ చేయకపోవడం గత 25 ఏళ్లలో ఇదే తొలిసారి. సోనియాగాంధీ, రాహుల్ గాంధీ కూడా పార్టీ సారథ్యంలో ఉన్నప్పుడు ఎన్నికల్లో పోటీ చేశారు.
“లోక్‌సభకు పోటీ చేసేందుకు ఖర్గే విముఖత పెద్ద ప్రభావాన్ని చూపుతుందని నేను చెప్పను. కానీ అది కొంతమేరకు పార్టీ అవకాశాలను దెబ్బతీయవచ్చు,” అని ఆయన అన్నారు. 2009 నుంచి మూడుసార్లు గుల్బర్గా సీటుకు పోటీ చేసిన ఖర్గే రెండుసార్లు (2009, 2014లో) గెలిచి ఒకసారి (2019) ఓడిపోయారు.
లోక్‌సభ ఎన్నికల్లో పోటీ చేయకపోవడంపై ఖర్గే సమర్థించుకున్నారు. ఇదే విషయంపై ఈ మధ్య ఆయన మీడియాతో మాట్లాడుతూ.. నాకు 83 సంవత్సరాలు, వయస్సు రీత్యా ఎన్నికల్లో పోటీ చేయకుండా ఉండాలని అనుకుంటున్నాను. ఇక్కడ పోటీ చేస్తే ఇతర లోక్ సభ నియోజకవర్గాలపై దృష్టి పెట్టడం కష్టమని సమర్థించుకున్నారు. అయితే పార్టీ హైకమాండ్ పట్టుపడితేనే పోటీ చేస్తానన్నారు.
పార్టీ హైకమాండ్ కూడా ఆయన వాదనను అంగీకరించి, ఎన్నికల్లో పోటీ చేయకూడదని నిర్ణయించుకున్నట్లు తెలుస్తోంది. కర్ణాటకకు చెందిన కాంగ్రెస్ నేతలు ఆయనను గుల్బర్గా, చామరాజనగర్ నుంచి పోటీ చేయాలని కోరుతున్నారు. అయితే, పార్టీ తన అల్లుడికి గుల్బర్గా నుంచి సీటు ఇచ్చింది. అయితే చామరాజనగర్ కు సరైన అభ్యర్థిని నిలబెట్టడానికి పార్టీ ఇంకా అన్వేషిస్తోంది.
వంశపారంపర్య రాజకీయాల ఆరోపణ
ఇప్పటి వరకూ పార్టీ ప్రకటించిన స్థానాల్లో 17 సీట్లలో వంశపారంపర్య నాయకులకు చోటు కల్పించింది. దీంతో కాంగ్రెస్ పార్టీ మరోసారి కుటుంబ రాజకీయలను ప్రొత్సహిస్తోందని విపక్షాలు ఆరోపిస్తున్నాయి. కాంగ్రెస్ పార్టీ ఇంతకుముందు ప్రకటించిన ఉదయపూర్ నవ్ సంకల్ప్ డిక్లరేషన్‌లో వివరించిన విధంగా, వంశ పారంపర్య రాజకీయాలకు దూరంగా ఉండాలని కాంగ్రెస్ ఇంతకుముందు కట్టుబడి ఉన్నప్పటికీ ప్రస్తుతం పార్టీ అందుకు విరుద్దంగా వారసులకు టికెట్లు ఇచ్చింది.
పార్టీ నేతలు ఈ నిర్ణయాన్ని సమర్థిస్తున్నప్పటికీ కాంగ్రెస్ కొత్తగా 12 మందికి టికెట్లు ఇవ్వగా, అందులో ఆరుగురు మహిళలు ఉన్నారు. ఆసక్తికరమైన విషయమేమిటంటే, 2019లో కాంగ్రెస్ ఒక్క మహిళను మాత్రమే బరిలోకి దింపింది.
మహిళా ఓటర్లను, ముఖ్యంగా రాష్ట్రంలోని ఐదు ప్రధాన హామీ పథకాల లబ్ధిదారులను తమవైపు తిప్పుకోవడమేనని పార్టీ నేతలు తమ నిర్ణయాన్ని సమర్థించుకున్నారు. ఎన్నికల సంఘం గణాంకాల ప్రకారం మొత్తం 5,42,08,088 మంది ఓటర్లలో మహిళలు 2,70,81,750 మంది ఉన్నారు. 28 నియోజకవర్గాల్లో 17 లోక్‌సభ స్థానాల్లో పురుషుల కంటే మహిళలే అధికం.
యువతపై బీజేపీ పెట్టిన ఫోకస్‌ని తిప్పికొట్టే ప్రయత్నంగా కాంగ్రెస్ ఈ ప్రయోగం చూస్తోంది. కోలార్‌, చిక్కబళ్లాపూర్‌ టిక్కెట్లు పొందిన వారితో కలిపితే ఈ సంఖ్య 15 కు చేరుతుంది.
సమర్థించుకున్న కాంగ్రెస్ నాయకులు
వంశపారంపర్య రాజకీయాలు చేస్తోందన్న విమర్శలు కాంగ్రెస్‌కు మింగుడుపడటం లేదు. చిక్కోడి సీటులో తన కూతురు ప్రియాంక జార్కిహోళి పోటీ చేస్తున్న పీడబ్ల్యూడీ మంత్రి సతీష్ జార్కిహోళి మాట్లాడుతూ.. 'వంశపారంపర్య రాజకీయాలు చేయని ఒక్క పార్టీని నాకు చూపించండి. కర్ణాటకలో యడియూరప్ప, దేవెగౌడ ఏం చేస్తున్నారు? వారు రాజవంశ రాజకీయాలు చేయడం లేదా?
ఈ విషయంలో పార్టీ అధ్యక్షుడు డీకే శివకుమార్‌ భిన్నాభిప్రాయాలు వ్యక్తం చేస్తున్నారు. కొన్నేళ్లుగా దేశంలో రాజకీయ వ్యవస్థ మారిపోయిందని ఆయన పేర్కొన్నారు.
“మేము కొత్త ముఖాలను, ముఖ్యంగా యువకులను చూస్తున్నాము. పటిష్టమైన రాజకీయ నేపథ్యం, ఎన్నికల్లో గెలిచే సత్తా వారికి ఉండాలనేది ప్రమాణాలు. చాలా కాలంగా పార్టీ కోసం ఆఫీస్ బేరర్లుగా పనిచేస్తున్నందున స్థానిక నాయకులందరూ మంత్రుల పిల్లలకు మద్దతు ఇస్తున్నారు” అని వాదించారు.
