23 ఏళ్ల తర్వాత ఇంటికి ..

నిర్మల్‌ జిల్లా సారంగాపూర్‌ మండలం చించోలి (బి) గ్రామంలో ఈ ఘటన చోటుచేసుకుంది. ఈ ఊరికి చెందిన కొత్తపాటి నడిపి లింగన్న, మల్లవ్వ దంపతులకు వ్యవసాయం ప్రధాన వృత్తి. ఇద్దరు కుమార్తెలు, ఇద్దరు కుమారులు ఉన్నారు. కుమార్తెల పెళ్లిళ్లు చేశాక.. లింగన్న ఉపాధి కోసం సౌదీ దేశానికి వెళ్లారు. కొన్నాళ్లు ఉత్తర ప్రత్యుత్తరాల ద్వారా కమ్యూనికేషన్ సాగించాడు. 1993 తర్వాత ఆయన అడ్రస్ తెలియకుండాపోయింది. బ్రతికున్నాడా చనిపోయాడా తెలియదు. బ్రతికి ఉంటే ఇంటికి వచ్చేవాడని గ్రామస్థులు అంటున్నారు. చిన్నప్పుడే ఆ కుటుంబానికి చెందిన మల్లయ్య తప్పిపోవడం, తండ్రి ఆచూకీ తెలియకపోవడంతో కుటుంబ సభ్యులకు తీవ్ర విషాదాన్ని నింపింది.

‘‘మల్లయ్య ఎనిమిదో తరగతి మధ్యలో చదువు ఆపేశాడు. మల్లయ్య చదువు ఆపడానికి ప్రధాన కారణం మతి స్థిమితం కోల్పోవడమే’’ అని అక్కలు చెప్పారు. ఎనిమిదో తరగతి వరకు మల్లయ్య మంచి మార్కులతో పాసయ్యేవాడని 17 ఏళ్ల వయసులో మతిస్థిమితం లేక.. 2002లో ఇంటి నుంచి వెళ్లిపోయాడు అని వారు చెప్పారు. 2021లో శ్రద్ధ రిహాబిలిటేషన్‌ ఫౌండేషన్‌ సభ్యులకు మల్లయ్య కేరళలో ప్రత్యక్షమయ్యాడు. మల్లయ్యకు ఆశ్రయమిచ్చింది ఆ స్వచ్చంద సంస్థ. ముంబయిలోని ఆ సంస్థ ఆసుపత్రిలో నాలుగేళ్లపాటు మానసిక వైద్యం చేయించారు. అతడి మానసికస్థితి కొంత కోలుకున్న తర్వాత తన ఊరు, సమీప పట్టణాల పేర్లు చెప్పగలిగాడు. దీంతో సంస్థ ప్రతినిధి సిద్ధు.. ఆదివారం మల్లయ్య స్వగ్రామానికి చేరుకున్నారు. మల్లయ్యను తీసుకొచ్చి కుటుంబసభ్యులకు అప్పగించారు. తన అక్కలు, బావలను మల్లయ్య గుర్తుపట్టి పలకరించాడు. దీంతో కుటుంబ సభ్యుల ఆనందానికి అవధుల్లేకుండా పోయాయి. ఆరేళ్ల కిందట తల్లి మల్లవ్వ అనారోగ్యంతో చనిపోయిందని ,ఏడాది క్రితం తమ్ముడు రాజు మృతి చెందాడని తెలుసుకున్న మల్లయ్య తీవ్ర భావోద్వేగానికి గురయ్యాడు.