వరంగల్‌లో ఘోర రోడ్డు ప్రమాదం.. ఏడుగురు మృతి..

వరంగల్ జిల్లా మామునూరు దగ్గర రోడ్డు రక్తమోడింది. భారత్ పెట్రోల్ బంక్ దగ్గర ఇనుపరాడ్ల స్తంభాలతో వెళ్తున్న లారీ అదుపుతప్పి.. పక్కనే ఉన్న కారు, రెండు ఆటోలపై పడింది. ఈ ప్రమాదంలో లారీలోని ఇనుప స్తంభాలు ఆటోపై పడ్డాయి. ఈ ఘటనలో ఏడుగురు అక్కడిక్కడే ప్రాణాలు వదిలారు. మరికొందరికి తీవ్ర గాయాలయ్యాయి. ఈ ఘటనలో మృతుల సంఖ్య మరింత పెరిగే అవకాశం ఉన్నట్లు అధికారులు చెప్తున్నారు. ఈ ఘటనకు సంబంధించిన సమాచారం అందింన వెంటనే పోలీసులు అక్కడకు చేరుకుని క్షతగాత్రులను స్థానిక ఆసుపత్రికి తరలించారు. క్షతగాత్రుల్లో పలువురి పరిస్థితి విషమంగా ఉందని వైద్యులు చెప్పారు. అయితే లారీ డ్రైవర్ మద్యం మత్తులో ఉండటం వల్లే ఈ ప్రమాదం జరిగిందని పోలీసుల ప్రాథమిక దర్యాప్తులో తేలింది. డ్రైవర్‌ను అదుపులోకి తీసుకున్న పోలీసులు.. పూర్తి వివరాలు సేకరించే ప్రయత్నంలో ఉన్నారు. కాగా మృతుల కుంటుంబానికి సమాచారం అందించినట్లు పోలీసులు చెప్పారు.

ఈ ఘటనపై స్పందించిన సీఎం రేవంత్ రెడ్డి.. తీవ్ర దిగ్భ్రాంతి వ్యక్తం చేశారు. క్షతగాత్రులకు మెరుగైన వైద్యం అందించాలని ఆదేశాలు జారీ చేశారు. క్షతగాత్రుల పరిస్థితిపై ఎప్పటికప్పుడు సమాచారం అందించాలని అన్నారు.