హైదరాబాద్ స్థానిక సంస్థల ఎన్నికల్లో ఎంఐఎందే గెలుపు

హైదరాబాద్ స్థానిక సంస్థల ఎన్నికల్లో అందరూ ఊహించిన ఫలితమే వెల్లడయింది. ఎంఐఎంపార్టీ అభ్యర్థి ఘన విజయం సాధించాడు. ఈ ఎన్నికల్లో ఎంఐఎం, బీజేపీ పార్టీలు మాత్రమే పోటీ చేశాయి. ఎన్నికల్లో మొత్తం 88ఓట్లు నమోదు కాగా వాటిలో బీజేపీ అభ్యర్థి గౌతమ్‌రావుకు 25 ఓట్లు రాగా ఎంఐఎం అభ్యర్థి మిర్జా రియాజ్ ఉల్ హాసన్‌కు 63 ఓట్లు వచ్చాయి. ఈ ఎన్నికల్లో కేవలం పోటీ జరగాలన్న ఉద్దేశంతోనే బీజేపీ బరిలోకి దిగింది.

ఈ స్థానిక సంస్థల ఎన్నికల్లో ఏ పార్టీకి ఉన్న ఓట్లు ఆ పార్టీకే పడ్డాయి. అత్యధిక ఓట్లు ఎంఐఎం పార్టీకే ఉండటంతో ఈ ఎన్నికల పోలింగ్ లాంఛన ప్రాయంగా ఉండనున్నాయన్న వాదన గట్టిగా వినిపిస్తోంది. ఈ ఎమ్మెల్సీ స్థానంలో ఎంఐఎంకు మొత్తం 49 ఓట్లు ఉన్నాయి. బీజేపీకి 19 మంది కార్పొరేటర్లు, ఆరుగురు ఎక్స్ అఫీషియో సభ్యులు కలిపి మొత్తం 25 ఓట్లే ఉన్నాయి. కాగా కాంగ్రెస్ పార్టీ మద్దతు ఎంఐఎంకు ఉండటంతో ఆ పార్టీ ఓట్లు కూడా ఎంఐఎంకే పడ్డాయి.