‘నాడు విషం చిమ్మే ఫార్మాకంపెనీలు నేడు సువాసనలు వెదజల్లుతున్నాయా?’

భూసేకరణ నోటిఫికేషన్ రద్దు చేయాలి

‘‘చట్ట ప్రకారం ఇక్కడ వేరే ప్రాజెక్ట్ కట్టాలంటే ఇప్పుడు ఉన్న భూసేకరణ నోటిఫికేషన్ రద్దు చెయ్యాలి. మళ్ళీ ప్రతీ గ్రామంలో కొత్త ప్రాజెక్ట్ రిపోర్టు తెలుగులో ఇచ్చి, ప్రజా అభిప్రాయసేకరణ చెయ్యాలి. మళ్ళీ కొత్త పర్యావరణ అనుమతులు తెచ్చుకోవాలి’ అని ఫార్మాసిటీ వ్యతిరేక పోరాట కమిటీ పేర్కొంది. ఇవేవి చెయ్యకుండా ఫార్మా సిటీ కోసం సేకరించిన భూముల్లో మేము ఫ్యూచర్ సిటీ కడతాం అంటే అది చట్ట ప్రకారం చెల్లదని కమిటీ అంటోంది. అంతే కాదు, యాచారం మండలంలో నాలుగు గ్రామాల్లో మేడిపల్లి, నానాక్నగర్, తాటిపర్తి, కురమిద్ద లో తీసుకున్న భూములని స్వాధీనపర్చుకోకూడదని హై కోర్టు ఇచ్చిన స్టేలు కూడా ఉన్నాయి అని కమిటీ వెల్లడించింది. ఈ భూములని చూపించి ఇక్కడ మేము ఫ్యూచర్ సిటీ కడతాం అని ప్రపంచ దేశాల అధినేతలకి, పారిశ్రామిక సంస్థలని నమ్మిచటం ప్రభుత్వం చేస్తున్న మోసం అని కమిటీ వాపోయింది.

‘‘మేము ఇక్కడ గ్లోబల్ సమ్మిట్ లో పాల్గొంటున్న అతిథులకి తెలియచేసేది ఒక్కటే. ఈ ప్రభుత్వం మాట ఇచ్చి మమల్ని మోసం చేసి, ఈ రోజు "ప్రజా పాలన" చేస్తున్నాం అని మీ ముందు ప్రగల్భాలు పలుకుతున్నారు. వీళ్ళని నమ్మి మీరు ఇక్కడ పెట్టుబడులు పెడితే మీరు కూడా మోస పోతారు’ అని ఫార్మా సిటీ వ్యతిరేక పోరాట కమిటీ హెచ్చరించింది.

యాచారం మండలంలో ఐదువేల ఎకరాల అసైన్డ్ భూమి, రెండువేల ఎకరాల పట్టాభూమిని ప్రభుత్వం లాక్కుందని కమిటీకి చెందిన కార్యకర్త కావుల సరస్వతి ‘ఫెడరల్ తెలంగాణ’ తో చెప్పారు. రైతులతో ప్రభుత్వం చర్చించకుండానే భూములను లాక్కోవడం అన్యాయమన్నారు. ప్రభుత్వ పాలన తుగ్లక్ పాలనను తలపిస్తుందని విమర్శించారు. ఈ భూములు కోర్టు వివాదాల్లో ఉన్నప్పుడే రేవంత్ ప్రభుత్వం ప్యూచర్ సిటీ గ్లోబల్ సమ్మిట్ ఏర్పాటు చేస్తానని ప్రగల్బాలు పలకడం శోచనీయమన్నారు. రాజ్యాంగం, చట్టాల పట్ల ఏ మాత్రం గౌరవం ఉన్నా ఈ అంశంపై ప్రజాభిప్రాయం తీసుకోవాలని ఆమె డిమాండ్ చేశారు.