తెలంగాణ సమగ్ర అభివృద్ధికి మూడు సూత్రాలు !
క్యూర్ ప్యూర్ రేర్ విధానాలతో తెలంగాణ సమగ్ర అభివృద్ధి ముఖచిత్రాన్ని నిర్మించనున్నట్లు చెప్పిన సీఎం రేవంత్ రెడ్డి.
తెలంగాణ రాష్ట్ర సమగ్ర అభివృద్ధి కోసం కాంగ్రెస్ ప్రభుత్వం మూడు సూత్రాల ప్రణాళికను అవలంబించనుందని సీఎం రేవంత్ రెడ్డి వెల్లడించారు. ఆదివారం నిర్వహించిన తెలంగాణ రైజింగ్ గ్లోబల్ సమ్మిట్ పాలసీ సమావేశంలో ఈ నిర్ణయం తీసుకున్నారు. అదే క్యూర్, ప్యూర్, రేర్ సూత్రాలుగా ఆయన చెప్పారు. క్యూర్ అంటే కోర్ అర్బన్ రీజియన్ ఎనకానమే, ప్యూర్ అంటే పెరీ అర్బన్ రీజియన్ ఎకానమీ, రేర్ అంటే రూరల్ అగ్రి రీజియన్ ఎకానమీ అని రేవంత్ వివరించారు. ఈ మూడు రకాల వ్యవస్థలను, ప్రణాళికలను వీటికి సంబంధించి అన్ని అంశాలను క్రోఢీకరించి తెలంగాణ రైజింగ్ 2047 విజన్ డాక్యుమెంట్‌ను తీసుకురానున్నట్లు చెప్పారు. ఈ డాక్యుమెంట్‌లో ఈ మూడు సూత్రాల కింద అసలు ఏం చేయనున్నాం అన్నది సవివరంగా ఉంటుందని ఆయన తెలిపారు.
రాబోయే గ్లోబల్ సమ్మిట్‌లో తెలంగాణ రైజింగ్ 2047 పేరుతో రూపొందించిన పాలసీ–విజన్ డాక్యుమెంట్‌ను అధికారికంగా విడుదల చేయనున్నట్లు ముఖ్యమంత్రి రేవంత్ రెడ్డి తెలిపారు. ఈ విజన్ డాక్యుమెంట్ రూపకల్పనలో లక్షలాది మంది ప్రజలను భాగస్వాములుగా చేశామని పేర్కొన్నారు. అభివృద్ధి చెందిన తెలంగాణను అందించడమే ప్రభుత్వ అసలు లక్ష్యమని సీఎం స్పష్టం చేశారు. డాక్యుమెంట్ తయారీలో ISB, నీతి ఆయోగ్ వంటి ప్రముఖ సంస్థల సూచనలను కూడా తీసుకున్నట్లు వెల్లడించారు.
రాష్ట్ర అభివృద్ధి స్ట్రాటజీలో భాగంగా తెలంగాణను మూడు ప్రధాన విభాగాలుగా పునర్వ్యవస్థీకరించినట్లు ముఖ్యమంత్రి రేవంత్ రెడ్డి తెలిపారు. కాలుష్య రహిత నగరంగా హైదరాబాద్‌ను మార్చాలంటే ప్రస్తుత వ్యవస్థను క్యూర్ చేయడం అత్యవసరం అని పేర్కొన్నారు. ఔటర్ రింగ్ రోడ్ లోపల గతంలో నాలుగు విభాగాలు ఉండటం వల్ల గందరగోళం ఏర్పడిందని, అందుకే ఆ ప్రాంతాన్ని ‘కోర్ అర్బన్ రీజియన్’ అనే ఒకే విభాగంగా గుర్తించినట్లు చెప్పారు. ఈ కోర్ అర్బన్ రీజియన్‌ను రాష్ట్ర స్ట్రాటజీలో ప్రత్యేక విభాగంగా తీసుకున్నామని సీఎం వెల్లడించారు.
ఔటర్ రింగ్ రోడ్ వెలుపల కొత్తగా నిర్మించబోయే రిజినల్ రింగ్ రోడ్ (RRR) ద్వారా హైదరాబాద్‌కు మరో 360 కి.మీ మణిహారం సిద్ధం కాబోతోందని ముఖ్యమంత్రి రేవంత్ రెడ్డి ప్రకటించారు. గ్రీన్ ఫీల్డ్ హైవేలతో పాటు బుల్లెట్ ట్రైన్ ఏర్పాటుకు అనుమతులు కూడా తెచ్చినట్లు వెల్లడించారు. హైదరాబాద్–బెంగళూరు మధ్య కనెక్టివిటీని మరింత పెంచే ప్రణాళికలు సిద్ధమవుతున్నాయని సీఎం తెలిపారు. అలాగే వరంగల్, ఆదిలాబాద్, కొత్తగూడెం, రామగుండం ప్రాంతాలలో కొత్త ఎయిర్‌పోర్ట్‌లు ఏర్పాటు చేయాలని ప్రభుత్వం కట్టుదిట్టంగా పని చేస్తోందని చెప్పారు.
