రామానాయుడు, అన్నపూర్ణ స్టూడియోలకు నోటీసులు

హైదరాబాద్ లోని అన్నపూర్ణ, రామానాయుడు స్టూడియోలకు శుక్రవారం జిహెచ్ ఎంసీ నోటీసులు జారీ చేసింది. పూర్తి స్థాయిలో ట్రేడ్ లైసెన్స్ ఫీజు చెల్లించాలని స్పష్టం చేసింది. హైదరాబాద్ లోని ఈ రెండు ప్రముఖ స్టూడియోలు కొన్ని సంవత్సరాలుగా తక్కువ ట్రేడ్ లైసెన్స్ ఫీజులు చెల్లిస్తున్నట్టు జీహెచ్ ఎంసీ సర్కిల్-18 అధికారులు గుర్తించారు. వ్యాపార విస్తరణ తక్కువగా ఉందని చూపిస్తూ ట్రేడ్ లైసెన్స్ ఫీజులను చెల్లించాల్సిన దానికంటే తక్కువగా చెల్లిస్తున్నాయని అధికారులు చెప్పారు. అన్నపూర్ణ స్టూడియో రూ.11.52 లక్షలు చెల్లించాల్సి ఉండగా , కేవలం రూ.49 వేలు మాత్రమే చెల్లిస్తుందన్నారు. అలాగే రామానాయుడు స్టూడియో రూ.1.92 లక్షలు చెల్లించాల్సి ఉండగా కేవలం రూ.1,900 చెల్లిస్తున్నట్టు అధికారులు తెలిపారు. ఈ నేపథ్యంలో పూర్తిస్థాయి ట్రేడ్ లైసెన్స్ ఫీజు చెల్లించాలని జీహెచ్‌ఎంసీ ఆ నోటీసులో పేర్కొంది.