Heavy Rains | హైదరాబాద్‌లో కుండపోత వర్షం.. జలమయమైన రోడ్లు
దిక్కుతోచని పరిస్థితుల్లో ప్రజలు. క్లియరెన్స్ చర్యలు చేపట్టిన అధికారులు.
హైదరాబాద్‌ను కుండపోత వర్షం ముంచెత్తుతోంది. సాయంత్రం నాలుగు గంటలకు మొదలైన వర్షం దంచికొడుతోంది. భారీగా వర్షం పడుతున్న క్రమంలో సీఎం రేవంత్ రెడ్డి అధికారులతో ప్రత్యేక సమావేశం నిర్వహించారు. రానున్న రెండు రోజుల పాటు భారీ వర్షాలు పడే అవకాశం ఉందని వాతావరణ శాఖ హెచ్చరిస్తున్న క్రమంలో అధికారులు అప్రమత్తంగా ఉండాలని సూచించారు. రాష్ట్రమంతా రానున్న 48 గంటల పాటు చాలా అలెర్ట్‌గా ఉండాలని, ప్రజలకు ఎటువంటి ఇబ్బందులు కలగకుండా చూసుకోవాలని ఆదేశాలు జారీ చేశారు. కలెక్టర్లు జిల్లాల్లోని అన్ని విభాగాలతో ఎప్పటికప్పుడు పరిస్థితిని సమీక్షించాలని సీఎం ఆదేశించారు.
హైదరాబాద్ లో పలు ప్రాంతాల్లో అర్ధరాత్రి వరకు భారీ వర్ష సూచన ఉన్నందున అన్ని విభాగాలు సమన్వయంతో పని చేయాలని ముఖ్యమంత్రి అదేశించారు. జీహెచ్ఎంసీతో పాటు పోలీస్, ట్రాఫిక్, హైడ్రా విభాగాల అధికారులు ఎప్పటికప్పుడు పరిస్థితి ని సమీక్షించాలని అదేశించారు. లోతట్టు ప్రాంతాల్లో తగిన ముందు జాగ్రత్త చర్యలు చేపట్టాలని సూచించారు. హైదరాబాద్ సిటీ లో ప్రజలు అత్యవసరమైతే తప్ప తమ ప్రయాణాలు వాయిదా వేసుకోవాలని సూచించారు. ట్రాఫిక్ ఇబ్బందులు లేకుండా, విద్యుత్ అంతరాయం లేకుండా అధికారులు తగిన చర్యలు చేపట్టాలని ముఖ్యమంత్రి ఆదేశించారు. వర్షాలు, వరదలతో ఎటువంటి పరిస్థితి వచ్చినా ఎదుర్కునేందుకు, ఎలాంటి సహాయమైనా అందించేందుకు అధికారులు అందుబాటులో ఉండాలని ఆదేశించారు.
గంటల నుంచి కురుస్తున్న వర్షంతో ప్రజలు తీవ్ర ఇబ్బందులు పడుతున్నారు. ఎక్కడి ట్రాఫిక్ అక్కడ స్తంభించింది. భారీ వర్షంతో రోడ్లు చెరువులను తలపిస్తున్నాయి. అధికారులు వాటిని క్లియర్ చేసే ప్రయత్నాలు చేస్తున్నప్పటికీ ఆశించిన ఫలితాలు అయితే ఏమాత్రం కనిపించడం లేదు. హైదరాబాద్ సిటీలో పెనుగాలులతో కుండపోత వర్షం.. జూబ్లీహిల్స్‌, బంజారాహిల్స్‌, ఫిలింనగర్‌, గచ్చిబౌలి, కొండాపూర్‌, మియాపూర్‌, హిమాయత్‌నగర్‌, లక్డీకపూల్‌, నాంపల్లి సహా పలు ప్రాంతాల్లో భారీ వర్షం కురుస్తోంది. పంజాగుట్ట, ఎస్ఆర్ నగర్‌, అమీర్‌పేట్‌, మాదపూర్‌, కొండాపూర్‌, బయోడైవర్సిటీ, ఐకియా సెంటర్‌, ఏఎంబీ, ఇనార్బిల్‌ మాల్, కొండాపూర్‌, గచ్చిబౌలి, రాయదుర్గం, హైటెక్‌సిటీలో భారీగా ట్రాఫిక్ జామ్‌ అయింది.
