Leopards|ఆదిలాబాద్‌ ప్రాంతంలో పులులు కాదు, చిరుతల సంచారం

పులి లాగే చిరుతలు కూడా మనుషులు, పశువుల మందలపై ఒకేలా దాడి చేస్తుంటాయి. దీంతో చిరుతల సంచరిస్తుండగా, వీటిని పులులుగా ప్రజలు భ్రమించి అదిగో పులి...ఇదిగో పులి అంటూ అటవీశాఖ అధికారులకు సమాచారం అందిస్తున్నారు. కానీ అటవీశాఖ అమర్చిన సీసీ కెమెరా ట్రాప్ లో చిక్కిన ఫొటోలు, చిరుత పులుల పాదముద్రలను పరిశీలించిన అటవీ శాఖ అధికారులు పులులు కాదు చిరుతలు సంచరిస్తున్నాయని తేల్చారు.

- మంచిర్యాల సమీపంలోని ఏసీసీ క్వారీ అటవీ ప్రాంతంలో సంచరించిన చిరుతపులి సీసీటీవీ కెమెరా ట్రాప్ లో రికార్డు అయింది.

- కొమురం భీం ఆసిఫాబాద్ జిల్లాలోని ఆసిఫాబాద్-కాగజ్‌నగర్ క్రాస్ రోడ్డు సమీపంలో ఎన్‌హెచ్ 363 రోడ్డు దాటుతుండగా చిరుతపులి కనిపించింది. జాతీయ రహదారిపై పులి కనిపించిందంటూ వాహనదారులు చిరుతపులిని వీడియో తీసి సోషల్ మీడియా వేదికగా షేర్ చేశారు.చిరుతపులి సంచరిస్తుండగా పులి అంటూ వాహనచోదకులు ప్రచారం చేయడంతో చుట్టుపక్కల గ్రామాల ప్రజల్లో తీవ్ర భయాందోళనలు నెలకొన్నాయి.

- రెబ్బెన మండలం అమీన్‌పూర్‌ గ్రామ అడవుల్లో కొద్దిరోజుల క్రితం చిరుతపులి అడవి పందిని చంపింది. అయితే అది పులి అని స్థానికులు భావించారు. సంఘటనా స్థలాన్ని సందర్శించి పగ్‌మార్క్‌లను నమోదు చేసిన అటవీశాఖ అధికారులు చిరుతపులి అని స్పష్టం చేశారు. ఇటీవలి కాలంలో అమీన్‌పూర్‌ అడవుల్లో పులి సంచరించడం లేదని అటవీశాఖ అధికారులు స్పష్టం చేశారు.

- మంచిర్యాల జిల్లా హాజీపూర్ మండలం రాపెల్లి, గుడిపేట గ్రామాల మధ్య అక్టోబర్ 29వతేదీ రాత్రి గొర్రెల మందపై చిరుతపులి దాడి చేసింది. గొర్రెలను చంపింది పులి కావచ్చునని గొర్రెల కాపరి, స్థానికులు అనుమానం వ్యక్తం చేశారు.కానీ అటవీశాఖ అధికారులు మళ్లీ రంగంలోకి దిగి పగ్‌మార్క్‌లను పరిశీలించి చిరుతపులి అని స్పష్టం చేశారు.

-ఆదిలాబాద్‌, నిర్మల్‌ జిల్లాల్లో అక్టోబరు, నవంబరు నెలల్లో చిరుతపులిని పులులుగా భావించిన సంఘటనలు వెలుగుచూశాయి. స్థానికుల వాదనలను పరిశీలించిన అటవీశాఖ అధికారులు పశువులను చంపింది చిరుతపులిలేనని స్పష్టం చేశారు. జీవనశైలి,పగ్‌మార్క్‌లు,చిరుతపులులు, పులులు వేటాడే శైలిపై భిన్నమైన నమూనాలపై అవగాహన లేకపోవడం వల్ల ప్రజలు గందరగోళానికి గురవుతున్నారు.

- కొమురం భీమ్ ఆసిఫాబాద్ జిల్లా కౌటాల మండలం కుర్త గ్రామంలో బుధవారం అర్థరాత్రి గొర్రెల మందపై పులి దాడి చేసి 23 గొర్రెలను చంపేసింది.దండిగ బాపు, బింకర్ శంకర్, రామగిరి శంకర్‌లకు చెందిన గొర్రెలను తెల్లవారుజామున 2 గంటల సమయంలో పులి దాడి చేసి చంపిందని స్థానికులు తెలిపారు.గొర్రెలను చంపిన పులి కావచ్చునని వారు అనుమానిస్తున్నారు.సంఘటనా స్థలాన్ని పరిశీలించి అడవి జంతువును గుర్తించాలని అటవీశాఖ అధికారులను కోరారు.అడవి కుక్కలు లేదా వీధి కుక్కలు అడవి జంతువు పగ్‌మార్క్‌లను గమనించి గొర్రెలను చంపి ఉండవచ్చునని అటవీ శాఖ అధికారులు తెలిపారు.గొర్రెల మందపై దాడి చేసింది పులి కాదని అధికారులు స్పష్టం చేశారు.

- మంచిర్యాల జిల్లా భీమిని మండలం చెన్నాపూర్ శివార్లలో పత్తి పొలంలోకి పులి వచ్చిందంటూ కూలీలు పరుగులు పెట్టారు.

చిరుతపులి గుర్తులు పులుల కంటే చిన్నవిగా ఉన్నాయని అటవీ అధికారులు చెప్పారు.అయితే చిరుతల సంచారంపై క్లారిటీ ఇవ్వాల్సిన అటవీశాఖ అధికారులకు చిరుతపులిని పులులుగా ప్రజలు భావించడం తలనొప్పిగా మారింది.ఒక మహిళను చంపి, రైతుపై దాడి చేసిన ఘటనలతో అయ్యబాబోయ్ పులి అంటూ గ్రామాల ప్రజల్లో భయాందోళనలు నెలకొన్నాయి.

సోషల్ మీడియాలో వైరల్ అవుతున్న నకిలీ వీడియోలు,సందేశాల సర్క్యులేషన్‌తో పులులు సంచరిస్తున్నాయని స్థానికులు భయాందోళనలకు గురవుతున్నారు. వాట్సాప్ లేదా ఫేస్‌బుక్‌లో వన్యప్రాణుల చిత్రాలు, వీడియోలను షేర్ చేయడానికి ముందు వాస్తవాలను ధృవీకరించాలని అటవీశాఖ అధికారులు ప్రజలను అభ్యర్థించారు.