‘తెలంగాణ పునర్దర్శనం’ చరిత్ర సదస్సు
పరిశోధన పత్రాలకు ఆహ్వానం
తెలంగాణ ఘనమైన చరిత్రను, అస్తిత్వాన్ని మరోసారి కొత్త కోణంలో ఆవిష్కరించేందుకు ‘కొత్త తెలంగాణ చరిత్ర బృందం’ (KTCB), తెలంగాణ భాషా సాంస్కృతిక శాఖ సౌజన్యంతో ‘తెలంగాణ పునర్దర్శనం’ (Re-envisioning Telangana) పేరుతో బృహత్తరమైన చరిత్ర సదస్సును నిర్వహించనుంది. ఈ సదస్సు 2026 జనవరి 10న హైదరాబాద్లోని ప్రతిష్టాత్మక రవీంద్రభారతి వేదికగా జరగనుంది. ఆసక్తి గల చరిత్రకారులు, రచయితలు తమ పత్రాలను పంపి ఈ చారిత్రక యజ్ఞంలో భాగస్వాములు కావాలని నిర్వహాకులు కోరుతున్నారు.
సదస్సు ప్రాముఖ్యత - ప్రత్యేకతలు
తెలంగాణ నేల కేవలం భౌగోళిక ప్రదేశం మాత్రమే కాదు, ఇది చరిత్రకు సాక్ష్యం. ఆదిమానవుడు సంచరించిన రాతి యుగాల నుండి, అద్భుతమైన కాకతీయుల వాస్తుశిల్ప సంపద వరకు, శాతవాహనుల నాణేల నుండి ఆధునిక సాహిత్య చరిత్ర వరకు ఎన్నో అంశాలు ఇంకా వెలుగు చూడాల్సి ఉంది. ఈ సదస్సు ప్రధాన లక్ష్యం తెలంగాణ చరిత్రను 'పునర్దర్శనం' చేయడం. ఇందులో భాగంగా కింది ఆసక్తికరమైన అంశాలపై లోతైన చర్చ జరగనుంది:
పురావస్తు సంపద & రాతి చిత్రాలు: తెలంగాణ గుహల్లో దాగి ఉన్న వేల ఏళ్ల నాటి రాతి చిత్రాలు (Rock Paintings), రాతి యుగపు ఆనవాళ్లపై ప్రత్యేక విశ్లేషణ.
శాసనాలు & నాణేలు: చరిత్రకు మౌలిక సాక్ష్యాలైన శాసనాలు, నాణేల (Numismatics) అధ్యయనం ద్వారా నాటి సామాజిక, ఆర్థిక పరిస్థితులను అంచనా వేయడం.
సాహిత్యం & వాస్తు శిల్పం: తెలంగాణ సాహిత్యంలో ప్రతిబింబించిన చరిత్రను, ఇక్కడి ఆలయాలు, కట్టడాలలోని శిల్ప సౌందర్యాన్ని వెలికితీయడం.
తులనాత్మక అధ్యయనం: భారతీయ చరిత్రతో తెలంగాణ చరిత్రను పోల్చుతూ, జాతీయ స్థాయిలో తెలంగాణ స్థానాన్ని సుస్థిరం చేయడం.
ఈ నేపథ్యంలో, చరిత్రకారులు, పరిశోధకులు, విద్యార్థులు మరియు ఔత్సాహికుల నుండి పై అంశాలకు సంబంధించి పరిశోధనా పత్రాలను (Research Papers) ఆహ్వానిస్తున్నాము.
పత్ర సమర్పణకు సూచనలు:
పరిశోధన పత్రాలు తెలుగు లేదా ఆంగ్లంలో ఉండవచ్చు.
పత్రం పూర్తిగా మీ సొంత పరిశోధనై ఉండాలి (Original Research). AI (Artificial Intelligence) ద్వారా రూపొందించిన పత్రాలు తిరస్కరించబడతాయి.
తగిన ఫుట్నోట్స్ (Footnotes) మరియు రిఫరెన్సులు (Bibliography) తప్పనిసరి.
పత్రం యూనికోడ్ (Unicode) ఫాంట్లో, వర్డ్ డాక్యుమెంట్ (.docx/.doc) రూపంలో ఉండాలి. ఫోటోలను JPEG ఫార్మాట్లో విడిగా జతపరచాలి.
పత్రం నిడివి 1200 పదాలకు మించకూడదు.
ఆసక్తి గల చరిత్రకారులు, రచయితలు తమ పత్రాలను పంపి ఈ చారిత్రక యజ్ఞంలో భాగస్వాములు కావలసిందిగా కొత్త తెలంగాణ చరిత్ర బృందం,సన్నాహక కమిటీ తరఫున శ్రీరామోజు హరగోపాల్ కోరుతున్నారు. ఆసక్తి ఉన్నవారు వివరాలకు
మొబైల్ నెంబర్ 9949498698ను సంప్రదించవచ్చు.
Next Story