ఆటోడ్రైవర్ల అక్రమ అరెస్ట్ దారుణం: కేటీఆర్

రాష్ట్రవ్యాప్తంగా ఆటో డ్రైవర్లను ఆటో యూనియన్ల నేతలను అక్రమంగా అరెస్టు చేయడాన్ని బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా ఖండించారు. ఎన్నికల సమయంలో ఇచ్చిన హామీలను అమలు చేయాలని డిమాండ్ చేస్తూ అసెంబ్లీ ముట్టడికి పిలుపునిచ్చిన ఆటో డ్రైవర్ల జేఏసీ నేతలను వేలాది మంది ఆటో డ్రైవర్లను కాంగ్రెస్ ప్రభుత్వం అక్రమంగా అరెస్టు చేయడం దుర్మార్గమైన చర్య అని ఆయన విమర్శించారు.

నిన్నటి నుంచి రాష్ట్రవ్యాప్తంగా ఆటో డ్రైవర్లు ఆటో యూనియన్ల నేతలను పోలీస్ స్టేషన్లలో అదుపులోకి తీసుకొని బంధించి ఉంచుతున్నారని కేటీఆర్ ఆరోపించారు. ప్రజాస్వామ్య పద్ధతిలో తమ హక్కుల కోసం ప్రశ్నిస్తే అరెస్టులు నిర్బంధాలతో గొంతు నొక్కే ప్రయత్నం చేయడం కాంగ్రెస్ ప్రభుత్వ నియంతృత్వ వైఖరికి నిదర్శనమని మండిపడ్డారు.

ఎన్నికల సమయంలో ఆటో డ్రైవర్లకు ఇచ్చిన హామీలను నెరవేర్చకుండా ప్రజలను మోసం చేసిన కాంగ్రెస్ ప్రభుత్వం ఇప్పుడు ఆ హామీలపై ప్రశ్నించినందుకు నిర్బంధాలకు పాల్పడటం సరికాదని కేటీఆర్ స్పష్టం చేశారు. రాష్ట్రవ్యాప్తంగా అరెస్టు చేసిన ఆటో యూనియన్ల నేతలను ఆటో డ్రైవర్లను వెంటనే బేషరతుగా విడుదల చేయాలని ఆయన డిమాండ్ చేశారు.

ఆటో డ్రైవర్లకు ఇచ్చిన హామీల అమలుపై ప్రభుత్వం స్పష్టమైన ప్రకటనను ఈరోజే అసెంబ్లీలో చేయాలని కేటీఆర్ కోరారు. ఆటో డ్రైవర్ల ఆత్మహత్యలు కొనసాగకుండా ఉండాలంటే వారికి ఇచ్చిన హామీలను తక్షణమే అమలు చేయాల్సిందేనని ఆయన హెచ్చరించారు. ఈ అంశాన్ని అసెంబ్లీ దృష్టికి తీసుకువెళ్లి ఆటో డ్రైవర్లకు న్యాయం జరిగే వరకు బీఆర్ఎస్ పార్టీ అండగా నిలుస్తుందని కేటీఆర్ స్పష్టం చేశారు.