SLBC ప్రమాదంపై హైకోర్టులో పిల్

శ్రీశైలం ఎడమ గట్టు కాలువ సొరంగంలో ఫిబ్రవరి 22న ఘోర ప్రమాదం జరిగింది. నిర్మాణంలో ఉన్న సొరంగం పైకప్పు ఒక్కసారిగా కుప్పకూలింది. ఈ ప్రమాదంలో ఎనిమిది మంది కార్మికులు చిక్కుకుపోయారు. ప్రమాదం జరిగి తొమ్మిది రోజులు అవుతున్నా వారి ఆచూకీ ఇంకా తెలియలేదు. కాగా తాజాగా ఈ ఘటనపై తెలంగాణ హైకోర్టులో ప్రజాప్రయోజన వ్యాజ్యం(పిల్) దాఖలైంది. ఈ ప్రమాదంలో చిక్కుకున్నవారిని సురక్షితంగా బయటకు తీసుకురావాలని కోరుతూ నేషనల్ యూనియన్ ఫర్ మైగ్రెంట్ వర్కర్స్ ఈ పిల్ దాఖలు చేసింది. ఘటన జరిగిన తొమ్మిది రోజులు దాటినా లోపల చిక్కుకున్న వారి ఆచూకీ కూడా తెలియకపోవడం తీవ్ర ఆందోళనకరంగా ఉందని కోర్టు దృష్టికి తీసుకెళ్లింది. వీలైనంత త్వరగా గల్లంతైన కార్మికులకు బయటకు తీసుకురావాలని యూనియన్ డిమాండ్ చేసింది.

ఈ పిల్‌పై న్యాయస్థానంలో వాదనలు జరిగాయి. తెలంగాణ ప్రభుత్వం తరపున ఏజీ సుదర్శన్ రెడ్డి వాదనలు వినిపించారు. ఎస్ఎల్‌బీసీ దగ్గర యుద్దప్రాతిపదికన సహాయక చర్యలు జరుగుతున్నాయి. ఆర్మీ, సింగరేణి రెస్క్యూటీం, ఎన్‌డీఆర్ఎఫ్ సహా దాదాపు 10 రెస్క్యూ బృందాలు ఈ చర్యల్లో పాల్గొంటున్నాయని ఆయన తెలిపారు. అదే విధంగా సహాయక చర్యలను 24 గంటలూ కొనసాగిస్తున్నామని, వీటిని ప్రభుత్వం క్షుణ్ణంగా పరిశీలిస్తోందని వివరించారు. ఇరు వర్గాల వాదనలు విన్న న్యాయస్థానం విచారణను ముగించింది.