మొదలైన రెండో విడత నామినేషన్ల స్వీకరణ

తెలంగాణ పంచాయతీ ఎన్నికల రెండో విడత నామినేషన్ల స్వీకరణ ప్రక్రియ మొదలైంది. మొత్తం మూడు దశల్లో ఈ ఎన్నికలు జరగనున్నాయి. కాగా శనివారం సాయంత్రంతో మొదటి విడత నామినేషన్ల స్వీకరణ ముగిసింది. ఆదివారం నుంచి రెండో విడత నామినేషన్ల స్వీకరణను అధికారులు చేపట్టారు. రెండో విడత నామినేషన్లను డిసెంబర్ 2వరకు స్వీకరించనున్నారు. 3వ తేదీ నామినేషన్లను పరిశీలించనున్నారు. అదే రోజు అభ్యర్థుల జాబితాను కూడా ప్రకటించనున్నారు అధికారులు. మొత్తం 12,728 సర్పంచ్ స్థానాలు, 1,12,242 వాడులకు ఎన్నికలు నిర్వహించనున్నారు. డిసెంబర్ 11, 14, 17 తేదీల్లో ఈ పోలింగ్ జరగనుంది. ఈ క్రమంలోనే నామినేషన్ల ప్రక్రియ వేగంగా జరుగుతోంది. తొలి విడతలో భారీ సంఖ్యలో నామినేషన్లు దాఖలయ్యాయి.

20వేలకు పైగా నామినేషన్లు

పంచాయతీ ఎన్నికల తొలి విడత 31 జిల్లాల్లోని 189 మండలాల పరిధిలో 4,236 గ్రామ పంచాయతీలు, 37,440 వార్డులకు జరగనుంది. వీటికి నామినేషన్ల స్వీకరణ నవంబర్ 29తో ముగిసింది. ఆఖరి రోజు శనివారం కావడంతో భారీ సంఖ్యలో నామినేషన్లు దాఖలయ్యాయి. సర్పంచ్ స్థానాలకు 25654 నామినేషన్లు దాఖలు కాగా.. వార్డు స్థానాలకు 82500వేలకు పైగా నామినేషన్లు దాఖలయ్యాయి.

గ్రామ పంచాయతీ ఎన్నికల నామినేషన్ల దాఖలు శనివారం ముగియగా, సర్పంచ్ పదవికి అత్యధిక దరఖాస్తులు సూర్యాపేట జిల్లాలో నమోదయ్యాయి. తొలి దశలో ఈ జిల్లాలోని 159 గ్రామ పంచాయతీలకు ఎన్నికలు జరుగనున్నాయి. చివరి రోజు మాత్రమే 1,021 నామినేషన్లు రావడంతో, మొత్తం సంఖ్య 1,387కు చేరిందని అధికారులు తెలిపారు.

వికారాబాద్‌ జిల్లా రెండో స్థానంలో నిలిచింది. ఇక్కడ 262 జీపీలకు నిర్వహించే ఎన్నికల కోసం మొత్తం 1,383 మంది అభ్యర్థులు తమ నామినేషన్లు సమర్పించారు.

తదుపరి స్థానాల్లో ఇతర జిల్లాలు ఇలా ఉన్నాయి:

మహబూబాబాద్: 155 గ్రామ పంచాయతీలకు 1,239 నామినేషన్లు

కామారెడ్డి: 167 జీపీలకు 1,224 నామినేషన్లు

రంగారెడ్డి: 174 గ్రామ పంచాయతీలకు 1,169 నామినేషన్లు

ఇక అత్యల్ప నామినేషన్లు ములుగు జిల్లాలో వచ్చాయి. ఈ జిల్లాలోని 48 జీపీలకు కేవలం 220 నామినేషన్లు మాత్రమే దాఖలయ్యాయి.