వైరల్ అవుతున్న గద్దర్-బండి ఫొటో

‘బీజేపీ, ఆర్ఎస్ఎస్ కార్యకర్తలను పొట్టనపెట్టుకున్న గద్దర్ లాంటి వారికి పద్మశ్రీ పురస్కారం ఇవ్వం’...ఇది కేంద్ర హోంశాఖ సహాయమంత్రి బండి సంజయ్ కుమార్(Bandi Sanjay Kumar) చెప్పిన మాటలు. కేంద్రప్రభుత్వం ప్రకటించిన పద్మపురస్కారాల(Padma Awards) విషయంలో రేవంత్ రెడ్డి(Revanth) తీవ్ర అసంతృప్తిని వ్యక్తంచేసిన విషయం తెలిసిందే. తెలంగాణ ప్రభుత్వం సిఫారసుచేసిన పేర్లలో ఒక్కపేరును కూడా కేంద్రప్రభుత్వం పద్మపురస్కారానికి పరిగణలోకి తీసుకోలేదన్నారు. సిఫారసుచేసిన పేర్లలో గద్దర్(Gaddar) పేరును రేవంత్ ప్రముఖంగా ప్రస్తావించారు. దీనిపై బండి మాట్లాడుతు రేవంత్ పై తీవ్రస్ధాయిలో ధ్వజమెత్తారు. తెలంగాణ ప్రభుత్వం సిఫారసుచేసిన పేర్లను కేంద్రం పరిగణలోకి తీసుకోవాలని లేదన్నారు. అంతటితో ఆగకుండా గద్దర్ పైన కూడా విరుచుకుపడ్డారు.

నక్సల్ భావజాలం కలిగిన గద్దర్ కు పద్మశ్రీ అవార్డు కేంద్రం ఎలాగిస్తుంది ? అని అడిగారు. బీజేపీ, ఆర్ఎస్ఎస్ కార్యకర్తలను పొట్టనపెట్టుకున్న గద్దర్ లాంటి వాళ్ళకి అవార్డులు ఇచ్చేదిలేదని తెగేసిచెప్పారు. పోలీసులను కాల్చిచంపిన గద్దర్ లాంటి వాళ్ళకు కేంద్రప్రభుత్వం పద్మ అవార్డులు ఇస్తుందని రేవంత్ ఎలా అనుకున్నాడని నిలదీశారు. గద్దర్ లాంటి వాళ్ళపేర్లను పద్మ అవార్డులకు కేంద్రం ఎప్పటికీ పరిగణలోకి తీసుకోదని, జాబితాను సిఫారసుచేసేటపుడే రాష్ట్రప్రభుత్వం జాగ్రత్తలు తీసుకోవాలని సూచించారు. గద్దర్ పై బండి చేసిన వ్యాఖ్యలకు పీసీసీ అధ్యక్షుడు బొమ్మ మహేష్ కుమార్ గౌడ్(PCC President Bomma Mahesh) అంతేస్ధాయిలో కౌంటర్ ఇచ్చారు. బీజేపీ, ఆర్ఎస్ఎస్ నేతలకే అవార్డులు ఇస్తారా అంటు మండిపోయారు.

గద్దర్ కు పద్మ పురస్కారం ఇవ్వకపోవటంపై కౌంటర్లు-ఎన్ కౌంటర్లు ఎలాగున్నా సోషల్ మీడియాలో ఒక ఫొటోతో పాటు 18 సెకన్ల వీడియో కూడా వైరల్ అవుతోంది. ఆ వీడియోలో ఏముందంటే బీజేపీ ఆఫీసుకు గద్దర్ వెళ్ళారు. అక్కడ కమలంపార్టీ నేతలతో పాటు కొండా విశ్వేశ్వరెడ్డి, బండి కూడా ఉన్నారు. కొండాను గద్దర్ పలకరించగానే నమస్కారం పెట్టారు. అక్కడేఉన్న బండి దగ్గరకు వెళ్ళగానే చాలాసంతోషంగా గద్దర్ ను కావలించుకున్నారు. ఇద్దరూ కావలించుకునే కుశలప్రశ్నలు వేసుకున్నారు. ఆ ఫొటోను ఇపుడు పీసీసీ అధ్యక్షుడు ప్రస్తావిస్తు గద్దర్ భావజాలం అప్పట్లో బండికి గుర్తుకురాలేదా ? అని ఎద్దేవాచేశారు. బీజేపీ, ఆర్ఎస్ఎస్ కార్యకర్తలను హత్యలు చేసిన గద్దర్ ను పార్టీ ఆఫీసులో బండి ఎలా కావలించుకున్నారని నిలదీశారు. ఎంపీగా ఉన్నపుడు గుర్తుకురాని గద్దర్ భావజాలం కేంద్రమంత్రి అవగానే గుర్తుకొచ్చిందా అని నిలదీశారు. గద్దర్ పై బండి వ్యాఖ్యలు ఎంత వైరల్ అయ్యాయో గద్దర్-బండి వీడియో+ఫొటో కూడా అంతే వైరల్ అవుతోంది.