మలి దశ ఉద్యమంలో కవులు, కళాకారులు కీలకపాత్ర

తెలంగాణ మలిదశ ఉద్యమంలో కవులు, కళాకారులు కీలక పాత్ర పోషించారని ముఖ్యమంత్రి రేవంత్‌రెడ్డి అన్నారు. శనివారం హైదరాబాద్‌ రవీంద్రభారతిలో ఏర్పాటు చేసిన అందెశ్రీ సంతాప సభలో ముఖ్యమంత్రి మాట్లాడారు. ‘‘ఉద్యమానికి కవులు, కళాకారులు ఇచ్చిన స్పూర్తితోనే తెలంగాణ సాకారమైంది. ఎన్నడూ బడి ముఖం చూడని అందెశ్రీ అద్భుతమైన జయజయహే తెలంగాణ పాట రాశారు. అందెశ్రీ పాట లేకుండా తెలంగాణ ఉద్యమంలో ఒక్క సభ కూడా జరగలేదు’’ అని రేవంత్ రెడ్డి అన్నారు. కానీ, తెలంగాణ సాకారమైన తర్వాత ఆ పాట మూగబోయింది. పాలకుల దృష్టిలో పదేళ్లు మూగబోయి ఉండొచ్చు కానీ.. తెలంగాణ ప్రజల గుండెల్లో నిత్యం గానమై నిలిచింది అని ముఖ్యమంత్రి అన్నారు. తెలంగాణ ఉద్యమంలో కీలకంగా వ్యవహరించిన వారిని కనుమరుగు చేసే ప్రయత్నం జరిగింది అని రేవంత్ రెడ్డి అన్నారు.