Padi Koushik Reddy | బీఆర్ఎస్ ఎమ్మెల్యే పాడి కౌశిక్ రెడ్డి అరెస్ట్..

బీఆర్ఎస్(BRS) ఎమ్మెల్యే పాడి కౌశిక్ రెడ్డి(Padi Koushik Reddy)ని బంజారాహిల్స్ పోలీసులు(Police) గురువారం ఉదయం అదుపులోకి తీసుకున్నారు. బుధవారం మధ్యాహ్నం తన విధులకు ఆటంకం కలిగించారంటూ కౌశిక్ రెడ్డిపై ఇన్‌స్పెక్టర్ ఫిర్యాదు మేరకు కేసు నమోదైంది. ఈ కేసులో భాగంగానే ఈరోజు ఆయనను అరెస్ట్ చేశారు పోలీసులు. అయితే కౌశిక్ రెడ్డిని అరెస్ట్ చేయడానికి ఈరోజు ఉదయం పోలీసులు.. ఆయన నివాసానికి చేరుకున్నారు. కాగా అక్కడ ఉద్రిక్తత నెలకొంది. పోలీసులను లోపలికి వెళ్లకుండా కౌశిక్ రెడ్డి అనుచరులు అడ్డుకున్నారు. అదే విధంగా కౌశిక్ కూడా బయటకు రాకుండా లోపలే ఉన్నారు. ఇంతలో పార్టీలోని కీలక నేతలు, మాజీ మంత్రులు హరీష్ రావు, జగదీశ్‌రెడ్డి సహా మరికొందరు కౌశిక్ రెడ్డి నివాసం దగ్గరకు చేరుకున్నారు. కౌశిక్ రెడ్డి ఇంట్లోకి వెళ్లడానికి హరీష్ రావు ప్రయత్నించగా పోలీసులు అడ్డుకున్నారు. దీంతో అక్కడ హైటెన్షన్ నెలకొంది. ఈ క్రమంలోనే కౌశిక్ రెడ్డి సహా హరీష్ రావును కూడా పోలీసులు అదుపులోకి తీసుకున్నారు. ఈ క్రమంలో హరీష్ రావు, కౌశిక్ రెడ్డి అరెస్ట్‌లను నిరసిస్తూ బీఆర్ఎస్ శ్రేణులు గచ్చిబౌలి, బంజారాహిల్స్ పోలీస్ స్టేషన్ల ఎదుట భారీగా నిరసనలు తెలుపుతున్నాయి.

అయితే తన ఫోన్ ట్యాపింగ్‌కు గురవుతుందని పేర్కొంటూ ఫిర్యాదు ఇవ్వడం కోసం బుధవారం మధ్యాహ్నం కౌశిక్ రెడ్డి.. బంజారాహిల్స్ పోలీస్ స్టేషన్‌కు చేరుకున్నారు. అదే సమయంలో ఇన్‌స్పెక్టర్ రాఘవేంద్ర బయటకు వెళ్తున్నారు. అది గమనించిన కౌశిక్ రెడ్డి.. తన ఫిర్యాదు తీసుకున్న తర్వాత వెళ్లాలని డిమాండ్ చేశారు. తాను ఒక అర్జెంట్ పనిపైన వెళ్తున్నానని, తిరిగి వచ్చాక ఆయన ఫిర్యాదును స్వీకరిస్తానని సీఐ చెప్పారు. దాంతో కౌశిక్ రెడ్డి తీవ్ర ఆగ్రహానికి గురయ్యారు. ఈ క్రమంలోనే కౌశిక్ రెడ్డి అనుచరులు సీఐ వాహనాన్ని అడ్డుకుని ఆయనకు వ్యతిరేకంగా నినాదాలు చేయడం ప్రారంభించారు. దీంతో సీఐ వెనక్కు వచ్చి కౌశిక్ రెడ్డి ఫిర్యాదును స్వీకరించారు. అనంతరం తనను తన విధులు నిర్వర్తించకుండా అడ్డుకున్నారంటూ కౌశిక్ రెడ్డి సహా ఆయన అనుచరులపై సీఐ ఫిర్యాదు చేశారు. దీంతో కౌశిక్ సహా 20మంది ఆయన అనుచరులపై పోలీసులు కేసు నమోదు చేశారు. బీఎన్ఎస్ 57, 126(2), 132, 224, 333, 451(3), 191(2), r/w 190, r/w 3(5) సెక్షన్ల కింద బంజారా హిల్స్ పోలీసులు కేసు నమోదు చేశారు. ఈరోజు ఆయనను కోర్టు ముందు హాజరుపరచనున్నారు.