ఫార్మ్ హౌస్‌లో క్యాసినో ముఠా అరెస్ట్

గ్రేటర్ పరిధిలో జరుగుతున్న పలు అసాంఘిక కార్యకలాపాలపై పోలీసులు ప్రత్యేక దృష్టి సారించారు. బెట్టింగ్‌లు, రేసింగ్‌లు వంటి పాటిపై ఉక్కుపాదం మోపుతున్నారు. ఈ క్రమంలోనే ఆకస్మిక తనిఖీలు, చెక్‌పోస్ట్‌ల ఏర్పాటు వంటి చర్యలు తీసుకుంటున్నారు. ఇందులో భాగంగా మంగళవారం రాత్రి హైదరాబాద్‌లోని ఓ ఫార్మ్ హౌస్‌లో కోళ్లపందాలు, క్యాసినో నిర్వహిస్తున్నట్లు పక్కా సమాచారం అందడంతో పోలీసులు దాడులు నిర్వహించారు. ఈ దాడుల్లో క్యాసినో, కోళ్ల పందాలు నిర్వహిస్తున్న ముఠాను అరెస్ట్ చేశారు. ఈ దాడుల్లో రాజేంద్రనగర్ డీసీపీ బృందం 64 మందిని అదుపులోకి తీసుకుంది. అంతేకాకుండా రూ.30లక్షల నగదు, 55 లగ్జరీ కార్లను కూడా స్వాధీనం చేసుకుంది. 86 పందెం కోళ్లు, 46 కోడికత్తులు పెద్దమొత్తంలో బెట్టింగ్ కాయిన్స్‌ను కూడా స్వాధీనం చేసుకుంది. అయితే ఈ కోడి పందాలు, క్యాసినోలో కొందరు ప్రముఖులు కూడా పాల్గొన్నట్లు పోలీసులు గుర్తించారు.

ఈ క్యాసినోను ముఠా పక్కాగా నిర్వహిస్తోంది. ఫార్మ్ హౌస్‌ను భారీ క్యాసినో హబ్‌గా మార్చేశారు. ఈమేరకు పక్కా సమాచారం అందడంతో బృందంతో దాడులు నిర్వహించారు. ఈ దాడుల్లో అదుపులోకి తీసుకున్న నిర్వాహకులు, పందాల రాయుళ్లను ప్రస్తుతం విచారిస్తున్నట్లు పోలీసు వర్గాలు చెప్తున్నాయి. వీటిలో పాల్గొన్న ప్రముఖులను కూడా పక్కా సాక్షాలు సంపాదించి విచారించే దిశగా దర్యాప్తును కొనసాగిస్తున్నట్లు సమాచారం.