వలంటీర్లను ఎందుకు తరిమేయాలనుకుంటున్నారు?

ఆంధ్రప్రదేశ్‌ ప్రభుత్వంలో వలంటీర్లు ప్రజలకు సేవలందించడంలో ముందున్నారు. ప్రభుత్వం సంక్షేమ పథకాల అమల విషయంలో వారికి అత్యంత ప్రాధాన్యతిచ్చింది. వలంటీర్ల పాత్ర గ్రామ సచివాలయాల్లో ప్రముఖంగా ఉంటోంది. లబ్ధిదారుల ఎంపిక నుంచి వారికి సహాయం అందే వరకు వాలంటీర్లు ప్రభుత్వ ప్రతినిధులుగా వ్యవహరిస్తున్నారు. ప్రతి ఇంట్లో ఎవరు లబ్ధిదారులు.. ఎవరు కాదనే వివరాలు వారి అర చేతిలో ఉంటాయి. ఈ మాట ఎందుకు చెప్పాల్సి వస్తోందంటే ప్రభుత్వం వారికి ఒక ట్యాబ్‌.. స్మార్ట్‌ ఫోన్, బయోమెట్రిక్‌ డివైజ్‌ అందజేసింది. అంటే ఆయా కుటుంబంలోని వివరాలన్నీ వాళ్ల అరచేతిలో ఉన్నట్లు. వృద్దులు, దివ్యాంగులు, వితంతువులు, ఇతర అంగవైకల్యం ఉన్న వారి వివరాలతో పాటు ఉద్యోగులు, వ్యాపారాలు చేసుకునే వారి వివరాలు కూడా వారి చేతుల్లో ఉన్నాయి. ప్రభుత్వం నుంచి ఏ ఇంట్లో ఎంత మందికి సంక్షేమ పథకాల ద్వారా సాయం అందుతుందో ఆ వివరాలు కూడా వారికి తెలుసు. అందుకే ప్రతిపక్షం వారిపై ప్రత్యేక దృష్టి కేంద్రీకరించింది. వీళ్లకిచ్చే జీతం అయిదు వేల మించకపోయినా, నిరుద్యోగులుగా ఉన్న తమకు సొంతవూర్లోనే ఒక ఉపాధి చూపించాడని వీళ్లంతా ముఖ్యమంత్రి జగన్ విధేయులై పోయారు. నిజానికి వీధుల్లో చాలా పవర్ ఫుల్ అయ్యారు. ఇక గ్రామాల్లో వీళ్లు ఎన్నికల్లో గెల్చిన సర్పంచులకంటే పలుకుబడి ఉన్న వాళ్లు. వాలంటీర్లు పంచాయతీ కార్యాలయం అక్రమించుకోవడం, దానితో జనం సర్పంచులను వదిలేసి వలంటీర్లు చుట్టూ తిరగడం మొదలయిందని సర్పంచులు వాపోతున్నాను. వీళ్లని ఓట్ల సైన్యంగా జగన్ వాడుకుని దెబ్బతీస్తాడేమోననేది టిడిపి భయం.