తాటికొండ రాజయ్య గృహనిర్భంధం ,వేడెక్కిన స్టేషన్ ఘన్ పూర్ రాజకీయం

స్టేషన్ ఘన్ పూర్ రాజకీయాలు హాట్ హాట్ గా సాగుతున్నాయి.ఎమ్మెల్యే కడియం శ్రీహరి. మాజీ ఉప ముఖ్యమంత్రి, బీఆర్ఎస్ నేత తాటికొండ రాజయ్య మధ్య రాజకీయ విభేదాలు నియోజకవర్గంలో చర్చనీయాంశమయ్యాయి. కడియంపై పోరులో భాగంగా రాజయ్య సోమవారం చేపట్టిన పాదయాత్రకు పోలీసులు బ్రేక్ వేసారు. రాజయ్యను పోలీసులు గృహ నిర్బంధం చేశారు. రఘునాథపల్లి మండలంలో పాదయాత్ర చేపట్టాలని రాజయ్య నిర్ణయించుకోవడం అందుకు సిద్ధం కావడంతో నియోజక వర్గంలో ఉద్రిక్తతలు నెలకొంటాయని పోలీసులు తగిన జాగ్రత్త చర్యలు చేపట్టారు. ఇప్పటికే నియోజకవర్గంలో ఇరువర్గాల మధ్య మాటల యుద్ధంతో ఉద్రిక్తతలు ఉన్నందున, పాదయాత్రకు వెళ్లడం సరికాదని పోలీసులు సూచించారు. అయినా రాజయ్య వెనక్కి తగ్గకపోవడంతో శాంతిభద్రతల దృష్ట్యా ఆయన్ను గృహ నిర్బంధం చేస్తున్నట్లు ప్రకటించారు. ఈ విషయం తెలియగానే బీఆర్ఎస్ కార్యకర్తలు, నాయకులు పెద్ద సంఖ్యలో అక్కడికి చేరుకుని ఆందోళనకు దిగడంతో కొంతసేపు టెన్షన్ వాతావరణం నెలకొంది.