"బతుకమ్మ యంగ్ ఫిల్మ్‌మేకర్స్ ఛాలెంజ్" పోటీల్లో పాల్గొని మీ ప్రతిభను చాటండి

సినీ పరిశ్రమలోకి వెళ్లాలి అని తాపత్రయ పడే యువతకు తెలంగాణ ప్రభుత్వం తీపి కబురు చెప్పింది. వారు తమ ప్రతిభను కనబరచడానికి అద్భుతమైన వేదికను సిద్ధం చేసింది. అదే ‘బతుకమ్మ యంగ్ ఫిల్మ్‌మేకర్స్ ఛలెంజ్’ పోటీలు. వీటిలో ప్రతి ఒక్కరూ పాల్గొనవచ్చు. ఇందులో గెలిచిన వారిని బహుతులతో పాటు మరిన్ని అవకాశాలు కల్పించడానికి ప్రభుత్వం సిద్ధమైంది. ఈ మేరకు అధికారిక ప్రకటనను విడుదల చేశారు. ప్రభుత్వం అందిస్తున్న ఈ సువర్ణ అవకాశాన్ని యువ కళాకారులు సద్వినియోగం చేసుకోవాలని తెలంగాణ సినిమాటోగ్రఫీ మంత్రి కోమటిరెడ్డి వెంకట్ రెడ్డి పిలుపునిచ్చారు. ఇదే అంశంపై ప్రభుత్వం.. తెలంగాణ ఫిల్మ్ డెవలప్‌మెంట్ కార్పొరేషన్(TFDC) అధ్యక్షుడు, ప్రముఖ నిర్మాత దిల్ రాజుతో కూడా చర్చించింది. టీఎఫ్‌డీసీ ఆధ్వర్యంలోనే ఈ పోటీలను నిర్వహించనున్నారు.

ప్రతిభను ప్రపంచానికి చాటండి..

‘‘తెలంగాణ చరిత్ర, సంస్కృతి, కళారూపాలు, ప్రజా ప్రభుత్వం అందిస్తున్న సంక్షేమ పథకాలపై వీడియోలను రూపొందించి, యువ కళాకారులు తమలోని సృజనాత్మకతను ప్రపంచానికి చాటే ఈ మహత్తర అవకాశాన్ని సద్వినియోగం చేసుకోవాలి. పోటీలో పాల్గొని బహుమతులు గెలుచుకోవాలి’’ అని కోమటిరెడ్డి కోరారు. ఈ కార్యక్రమానికి శ్రీకారం చుట్టిన FDC చైర్మన్ దిల్ రాజును మంత్రి ప్రత్యేకంగా అభినందించారు. ముఖ్యమంత్రి రేవంత్ రెడ్డి నాయకత్వంలో ప్రజా ప్రభుత్వం చేస్తున్న సంక్షేమ పథకాలు ప్రజల్లోకి వెళ్ళేందుకు,యువ కళాకారుల ప్రతిభ వెలుగులోకి తెచ్చేందుకు ఈ పోటీ సరైన వేదిక కానుందని మంత్రి పేర్కొన్నారు.

పోటీ వివరాలు:

ప్ర‌జా ప్ర‌భుత్వం అమ‌లు చేస్తున్న అభివృద్ది, సంక్షేమం (మ‌హిళ‌ల‌కు ఉచిత బ‌స్సు, మ‌హాల‌క్ష్మి, గృహ‌జ్యోతి, ఇందిర‌మ్మ ఇండ్లు, యంగ్ ఇండియా స్పోర్ట్స్ యూనివ‌ర్సిటీ, యంగ్ ఇండియా రెసిడెన్షియ‌ల్ స్కూల్స్ త‌దిత‌రాలు), తెలంగాణ చ‌రిత్ర‌, సంస్కృతి, పండుగ‌లు, క‌ళారూపాల‌పై షార్ట్ ఫిలిమ్స్‌, పాట‌ల పోటీలు ఉంటాయి. షార్ట్ ఫిలిమ్స్ నిడివి 3 నిమిషాల‌కు, పాట‌ల వ్య‌వ‌ధి 5 నిమిషాల‌కు మించి ఉండ‌కూడ‌దు.

పోటీకి అర్హతలు

1. ఈ పోటీలో పాల్గొనే వారందరూ 40 ఏళ్ళ లోపు వయసు కలిగి ఉండాలి.

2. 4K రిజల్యూషన్ కలిగి ఉండాలి.

3. షార్ట్ ఫిల్మ్స్/ వీడియో సాంగ్స్ ఏవైనా ఈ పోటీలలో సూచించిన ‘థీమ్’ ల పైనే ఉండాలి.

4. మీరు చేసిన వీడియోలు గతంలో ఎక్కడా ప్రదర్శించి ఉండకూడదు.

5. బతుకమ్మ యంగ్ ఫిల్మ్ మేక‌ర్స్ ఛాలెంజ్ కోసమే చిత్రీకరించినవై ఉండాలి

బహుమతి వివరాలు..

ప్ర‌థ‌మ బ‌హుమ‌తి - రూ.3 ల‌క్షలు

ద్వితీయ బ‌హుమ‌తి - రూ.2 ల‌క్ష‌లు

తృతీయ బ‌హుమ‌తి - రూ.1 ల‌క్ష‌

కన్సోలేష‌న్ బ‌హుమ‌తి - రూ. 20 వేలు (అయిదుగురికి) ఇవ్వ‌డంతో పాటు విజేత‌లంద‌రికీ ప్ర‌శంసా ప‌త్రం, జ్ఞాపిక ప్ర‌దానం చేస్తారు.

ఎంట్రీ ఎలా చేసుకోవాలి..

నిర్దేశిత గడువులోగా వచ్చిన‌ ఎంట్రీలను నిపుణులతో కూడిన జ్యూరీ వీక్షించి వివిధ కేటగిరీలలో ఎంపిక‌లు పూర్తి చేస్తుంది. ఎంట్రీల‌ను ఈ కింది మెయిల్ ఐడీ youngfilmmakerschallenge@gmail.com లేదా వాట్సాప్ నెంబర్ - 8125834009 కు పంపాలి. ఎంట్రీలకు సెప్టెంబర్ 30 ఆఖరు తేదీగా ప్రభుత్వం నిర్ణయించింది.