తెలంగాణ ప్రభుత్వానికి హైకోర్ట్ జరిమానా

తెలంగాణ ప్రభుత్వానికి రాష్ట్ర హైకోర్టు జరిమానా విధించింది. జంట జలాశయాల దగ్గర చేపట్టిన నిర్మాణాల విషయంలో సర్కార్ అలసత్వంగా ఉండటాన్ని తప్పుబట్టింది. ఈ అంశంపై ప్రభుత్వం ఆగ్రహం వ్యక్తం చేసింది. నగరంలోని జంట జలాశయాల పరిసరాల్లో జరుగుతున్న నిర్మాణాలను ప్రశ్నిస్తూ దాఖలైన ప్రజా ప్రయోజన వ్యాజ్యం (పిల్)పై విచారణలో తెలంగాణ ప్రభుత్వం చూపుతున్న నిర్లక్ష్యంపై హైకోర్టు తీవ్ర ఆగ్రహం వ్యక్తం చేసింది. ఈ కేసులో ప్రభుత్వం తరఫున కౌంటర్ అఫిడవిట్ సమర్పించాల్సిందిగా కోర్టు ఇప్పటికే ఆదేశించినప్పటికీ, నిర్ణీత గడువులోపు సమర్పించకపోవడంతో హైకోర్టు ప్రభుత్వంపై చర్యలు తీసుకుంది.

తాజా విచారణలో, రాష్ట్ర ప్రభుత్వం కౌంటర్ దాఖలు చేయనందుకు హైకోర్టు రూ. 5 వేల జరిమానా విధించింది. ఈ మొత్తాన్ని రాష్ట్ర న్యాయ సేవా ప్రాధికార సంస్థకు వారంలోగా చెల్లించాలని కోర్టు ఆదేశించింది. ఈ దిశగా ప్రత్యేక ప్రభుత్వ న్యాయవాది రాహుల్ రెడ్డికి హైకోర్టు స్పష్టమైన సూచనలు జారీ చేసింది. కేసు తదుపరి విచారణను డిసెంబర్‌ 30కు వాయిదా వేసింది.

ఇదివరకూ పలుమార్లు కోర్టు ఆదేశాలు జారీ చేసినా, ప్రభుత్వం తరచూ గడువులను పట్టించుకోవడం లేదనే విషయంలో హైకోర్టు అసంతృప్తి వ్యక్తం చేస్తూ వస్తోంది. ప్రత్యేకంగా గత నవంబర్‌లో జరిగిన వికారాబాద్‌ నేవీ రాడార్‌ స్టేషన్ కేసు విచారణలో కూడా ప్రభుత్వం తరఫున గడువు లోపు కౌంటర్ దాఖలు చేయకపోవడంపై కోర్టు తీవ్రంగా స్పందించింది. అప్పట్లో కూడా డిసెంబర్‌ 12లోపు కౌంటర్ సమర్పించకపోతే జరిమానా విధిస్తామని కోర్టు హెచ్చరించింది.

అయినా, ప్రభుత్వ వైఖరిలో మార్పు రాకపోవడంతో, హైకోర్టు తాజాగా జంట జలాశయాల కేసులో జరిమానా విధించడం జరిగింది. ప్రజా ప్రయోజనాలకు సంబంధించిన కీలక కేసుల్లో ప్రభుత్వ ధోరణి బాధాకరమని, రాష్ట్రం పక్షాన సమగ్ర సమాచారాన్ని కోర్టుకు అందించే బాధ్యతను నిర్వర్తించాల్సిన అవసరం ఉందని హైకోర్టు వ్యాఖ్యానించినట్లు సమాచారం.

జంట జలాశయాల పరిరక్షణకు సంబంధించి ఈ పిల్ ప్రాముఖ్యతను సైతం హైకోర్టు సూచించింది. నగరంలో పర్యావరణ పరిరక్షణ, జల వనరుల సంరక్షణ వంటి అంశాలపై ప్రభుత్వం మరింత బాధ్యతగా వ్యవహరించాల్సిన అవసరాన్ని కోర్టు గుర్తుచేసింది.