వరంగల్ విద్యార్థికి కృత్రిమ కాళ్లు

వరంగల్ జిల్లా గీసుకొండ గ్రామానికి చెందిన రాహుల్ అనే ప్రతిభావంతుడైన విద్యార్థి రాజస్థాన్ రాష్ట్రంలోని కోటా నగరంలో ఐఐటీ ప్రవేశ పరీక్షకు సిద్ధమవుతున్నాడు.రాహుల్ వరంగల్ నుంచి కోటా నగరానికి రైలులో ప్రయాణిస్తుండగా గుర్తుతెలియని దుండగులు అతనిపై దాడి చేసి రైలు నుంచి రైలు కిందకు నెట్టివేశారు. దీంతో అతని రెండు కాళ్లు పోయాయి.

రెండు కాళ్లు కోల్పోయి భవిష్యత్ అంధకారంగా మారడంతో రాహుల్ తో అతని తల్లిదండ్రులు సీఎం రేవంత్ రెడ్డిని కలిసి పరిస్థితిని వివరించారు. స్పందించిన సీఎం రేవంత్ రెడ్డి రాహుల్ కు నిమ్స్ ఆసుపత్రిలో అత్యాధునిక కృత్రిమ అవయవాలను అమర్చేందుకు రూ.10 లక్షలు మంజూరు చేశారు.

రెండు కాళ్లు కోల్పోయిన రాహుల్ కు నిమ్స్ వైద్యులు కృత్రిమ కాళ్లు అమర్చడంతో ఆయన మళ్లీ నడవగలుగుతున్నాడు. రెండు కాళ్లు కోల్పోయిన తనకు కృత్రిమ కాళ్లు ఏర్పాటు చేయడంతో తన కల సజీవంగా ఉందని, తాను ఐఐటీ సాధించాలనే తన ఆకాంక్షను నెరవేర్చుకుంటానని రాహుల్ చెప్పారు. తమ కుమారుడికి కృత్రిమ కాళ్లు అమర్చిన వైద్యులు, సహాయం చేసిన సీఎం రేవంత్ రెడ్డికి రాహుల్ తల్లిదండ్రులు కృతజ్ఞతలు తెలిపారు.విద్యార్థి కన్న కలలన్నీ కల్లలుగా మారవని, ప్రభుత్వం తోడుంటే కలలు కొత్తగా మొదలవుతాయనడానికి రాహుల్ జీవనయానమే సాక్ష్యంగా నిలిచింది.