తెలంగాణలో విస్తారంగా వర్షాలు,ఆరు జిల్లాలకు ఎల్లో అలర్ట్

తెలంగాణ రాష్ట్రంలోని ఏడు జిల్లాల్లో శుక్రవారం భారీవర్షాల వల్ల మెరుపు వరదలు సంభవించే అవకాశముందని వాతావరణ శాఖ అధికారులు చెప్పారు. ఆదిలాబాద్, కామారెడ్డి, మెదక్, నిర్మల్, నిజామాబాద్, సంగారెడ్డి, వికారాబాద్ జిల్లాల్లో రాగల 24 గంటలపాటు భారవర్షాలు కురిసే అవకాశం ఉందని, దీని వల్ల మెరుపు వరదలు రావచ్చని ఐఎండీ హైదరాబాద్ కేంద్రం డైరెక్టర్ డాక్టర్ కె నాగరత్న వెల్లడించారు. భారీవర్షాలు, వరదల వల్ల లోతట్టు ప్రాంతాలు జలమయం అయ్యే అవకాశం ఉందని ఆమె తెలిపారు.

గడచిన 24 గంటల్లో తెలంగాణలోని 60 ప్రాంతాల్లో అతి భారీ నుంచి భారీ, మోస్తరు వర్షాలు కురిశాయని వాతావరణశాఖ అధికారులు చెప్పారు. 60 ప్రాంతాల్లో రికార్డు స్థాయిలో వర్షాలు కురిశాయి. పలు జిల్లాల్లోని 19 ప్రాంతాల్లో అతి భారీవర్షాల వల్ల వరదలు వెల్లువెత్తాయి. నిజామాబాద్ జిల్లా సిరికొండ మండలం తూంపల్లిలో అత్యధికంగా 233.9 మిల్లీమీటర్ల వర్షపాతం నమోదైందని ఐఎండీ అధికారులు చెప్పారు. నిర్మల్ జిల్లా ముథోల్ లో 196.6మిల్లీమీటర్లు, కామారెడ్డి జిల్లా రాంరెడ్డి గ్రామంలో 171.3, నిజామాబాద్ జిల్లా కైదుర్కిలో 164.5. సిరికొండలో 163.0, ధర్పల్లిలో 154.8 మిల్లీమీటర్ల వర్షం కురిసింది. భైంసా, బొమన్ దేవిపల్లి, మక్ధూంపూర్, సోమూరులలో 140మిల్లీమీటర్లకు పైగా వర్షపాతం నమోదైందని ఐఎండీ అధికారులు చెప్పారు. సిరిసిల్ల, నిజామాబాద్, కామారెడ్డి, నిర్మల్ జిల్లాల్లో అతి భారీవర్షాలు కురిశాయని ఐఎండీ వివరించింది.