నెహ్రూతో మోదీని పోల్చడం సరికాదు: శరద్ పవార్

"దేశ నిర్మాణానికి, స్వాతంత్ర్య పోరాటానికి నెహ్రూ చేసిన సేవలను మర్చిపోలేము, గౌరవించాలి" అని పవార్ అన్నారు. "ఆయన్ని మరెవరితోనూ పోల్చలేము. మహాత్మా గాంధీ నాయకత్వంలో జరిగిన స్వాతంత్య్ర పోరాట సమయంలో నెహ్రూ చాలా సంవత్సరాలు జైలులో గడిపారు" అని మాజీ కేంద్ర మంత్రి అన్నారు.

ప్రధాని మోదీ అత్యధిక కాలం ప్రధానిగా పనిచేసిన వ్యక్తిగా నిలవడాన్ని ప్రస్తావిస్తూ, పవార్ ఇలా అన్నారు. "ఇది మంచి విషయమే. పార్లమెంటరీ ప్రజాస్వామ్యంలో ప్రధానమంత్రి పదవి రాజ్యాంగబద్ధమైనది, మనం దానిని గౌరవించాలి. కానీ నెహ్రూ నెహ్రూనే, ఆయన త్యాగాలను భారతీయులు మర్చిపోలేరు.

" సిక్కులపై ఇందిరా గాంధీ, రాజీవ్ గాంధీలు అఘాయిత్యాలకు పాల్పడ్డారని ఆరోపించిన మహారాష్ట్ర మంత్రి, బీజేపీ నాయకుడు గిరీష్ మహాజన్‌పై పవార్ తీవ్రంగా మండిపడ్డారు. "అలాంటి ప్రకటన ఆమోదయోగ్యం కాదు. ఆపరేషన్ బ్లూ స్టార్ అనేది ఇందిరా గాంధీ చేసిన త్యాగం. సిక్కులు దేశ సరిహద్దుల భద్రత కోసం, ఆహార భద్రత కోసం పనిచేశారు. కొందరు వేరే మార్గాన్ని ఎంచుకున్నారు. కొన్ని జరిగాయి, వాటిని మరచిపోలేము. ఇందిరా గాంధీ దేశ ప్రతిష్ట, భద్రత విషయంలో ఎన్నడూ రాజీపడలేదు," అని ఆయన అన్నారు.

ఆపరేషన్ బ్లూ స్టార్‌ను "బ్లాక్ డే " అని పిలవడం, 1984 నాటి సైనిక చర్యను ఆఫ్ఘన్ పాలకుడు అహ్మద్ షా అబ్దాలీ దండయాత్రతో పోల్చడం ద్వారా మహాజన్ రాజకీయ దుమారం రేపారు. దీని తరువాత ప్రతిపక్ష పార్టీలు ఆయనను పదవి నుంచి తొలగించాలని డిమాండ్ చేశాయి. ఆపరేషన్ బ్లూ స్టార్‌ను సిక్కు సమాజ పవిత్ర పుణ్యక్షేత్రంపై "సైనిక దాడి"గా అభివర్ణిస్తూ, అప్పటి ప్రధాని ఇందిరా గాంధీ బలవంతంగా సైన్యాన్ని పంజాబ్‌లోకి, ఆ పవిత్ర ప్రాంగణంలోకి పంపారని మహాజన్ ఆరోపించారు.