ఎండాకాలం ఉత్తర భారతం ఉడికిపోనుందా?

"వాతావరణపరంగా వడగాలులకు గురయ్యే ప్రాంతాలు ఉన్నాయి. ఉదాహరణకు, విదర్భ ప్రాంతంలో సంవత్సరంలో ఈ సమయంలో సాధారణ ఉష్ణోగ్రత సుమారు 41 నుంచి 42 డిగ్రీల సెల్సియస్ ఉంటుంది. అదేవిధంగా, ఉత్తర ప్రదేశ్, హర్యానాలో మే నెల చివరిలో సాధారణ ఉష్ణోగ్రత 40 నుంచి 44 డిగ్రీల సెల్సియస్‌కు చేరుకుంటుంది" అని ఆయన అన్నారు.

"అందువల్ల, మనం ఇలాంటి అధిక ఉష్ణోగ్రతల రోజులకు సిద్ధంగా ఉండాలి" అని ఆయన అన్నారు. బలహీన వర్గాల ప్రజలకు సాయం చేయడానికి ఐఎండి వీధి వ్యాపారులు, పొలాల్లో పనిచేసే కూలీల వంటి బహిరంగ ప్రదేశాలలో పనిచేసే వారికి సమాచారాన్ని చేరవేయడానికి వాట్సాప్ గ్రూపులను ఏర్పాటు చేయడంతో పాటు, తీవ్రమైన వేడి గురించి, తీసుకోవాల్సిన చర్యలను సూచిస్తూ డిస్‌ప్లే బోర్డులను కూడా ఏర్పాటు చేశామని చెప్పారు.

"ప్రతి ఒక్కరినీ చేరుకుని, ఐఎండి రూపొందించిన ముందస్తు అంచనా సమాచారాన్ని అందించడమే మా లక్ష్యం. మేము ప్రభుత్వ మార్గాల ద్వారా సమాచారాన్ని అందిస్తాము. ఇందులో జాతీయ విపత్తు నిర్వహణ అథారిటీ కామన్ అలర్ట్ ప్రోటోకాల్ కూడా ఉంది. దీని ద్వారా మొబైల్ ఫోన్ ఉన్న ఏ వ్యక్తి అయినా సమాచారాన్ని పొందవచ్చు" అని మోహపాత్ర అన్నారు.

కొన్ని రంగాలలో ప్రజలకు మొబైల్ ఫోన్లు అందుబాటులో ఉండకపోవచ్చు లేదా ఐఎండి హెచ్చరికలను వెంటనే పొందే అవకాశం ఉండకపోవచ్చు అని ఆయన పేర్కొన్నారు. అయినప్పటికీ, వేడిమి వల్ల ప్రభావితమైన అటువంటి ప్రజలను వినూత్న లేదా సాంప్రదాయ మార్గాల ద్వారా చేరుకోవడానికి ఇంకా అవకాశం ఉందని ఆయన అన్నారు.

సోమవారం జరిగిన గ్లోబల్ హీట్ అండ్ కూలింగ్ ఫోరమ్‌లో తన ప్రసంగంలో ఉదహరించిన ఒక ఉదాహరణను ప్రస్తావిస్తూ, ఐఎమ్‌డి చీఫ్ ఇలా అన్నారు. “గత సంవత్సరం ఢిల్లీలో రిక్షా కార్మికులు, వీధి వ్యాపారులు, గృహ కార్మికుల సంఘాలు మమ్మల్ని కలిసి సమాచారం కోరాయి. మేము ఆ సమాచారాన్ని వాట్సాప్ ద్వారా వారి సంఘాల కార్యదర్శులకు అందించాము. వారు దానిని తమ సభ్యులకు తెలియజేశారు. అధిక ఉష్ణోగ్రతల ఉనికిని, తీసుకోవాల్సిన చర్యలను సూచిస్తూ డిస్‌ప్లే బోర్డులను కూడా ఏర్పాటు చేయడం జరిగింది” అన్నారు.

సంవత్సరానికి కొన్ని వ్యత్యాసాలు ఉన్నప్పటికీ, ప్రతి సంవత్సరం, ముఖ్యంగా ఏప్రిల్- మే నెలల్లో రుతుపవనాల రాకకు ముందు (జూన్) కాలంలో అధిక ఉష్ణోగ్రతలు నమోదవుతాయి. ఉష్ణోగ్రతలలో వార్షిక, రోజువారీ వైవిధ్యాలను తెలుసుకోవడానికి, భారత వాతావరణ శాఖ (IMD) ఒక సీజన్ ముందుగానే వడగాలుల హెచ్చరికను, ఆ తర్వాత రాబోయే నాలుగు వారాలకు చెల్లుబాటు అయ్యే విస్తృత శ్రేణి హెచ్చరికను ప్రతి గురువారం అందిస్తుంది.

వేసవి నెలల్లో జిల్లా స్థాయిలో ప్రతిరోజూ ఏడు రోజుల హెచ్చరిక కూడా జారీ చేయబడుతుంది. IMD తన మొదటి వడగాలుల హెచ్చరికను మార్చి, ఏప్రిల్, మే నెలలకు సంబంధించిన వేసవి ఉష్ణోగ్రతల అంచనాను ఫిబ్రవరి చివరి నాటికి జారీ చేసింది. దీనిని మార్చి చివరి రోజున ఏప్రిల్, మే, జూన్ నెలలకు నవీకరించింది.

అంచనా ప్రకారం, ఏప్రిల్ నుంచి జూన్ వరకు అనేక ప్రదేశాలలో, ముఖ్యంగా పశ్చిమ బెంగాల్, ఒడిశా, ఆంధ్రప్రదేశ్‌లోని దక్షిణ ప్రాంతాలు, తూర్పున ఉన్న ఛత్తీస్‌గఢ్, తెలంగాణ వంటి ప్రాంతాలలో వడగాలుల పరిస్థితులు ఏర్పడే అవకాశం ఉంది. హర్యానా, యూపీ, బీహార్, జార్ఖండ్‌తో సహా ఇండో-గంగా మైదానాలు, రాజస్థాన్, మధ్యప్రదేశ్‌లోని దక్షిణ ప్రాంతాలు, గుజరాత్‌లోని కొన్ని ప్రాంతాలు, ఉత్తర మహారాష్ట్రలోని కొన్ని భాగాలలో కూడా వడగాలుల పరిస్థితులు ఏర్పడే అవకాశం ఉందని వాతావరణ శాఖ తెలిపింది.