‘అగ్నివీర్ పథకాన్ని చెత్తబుట్టలో పడేస్తాం’

భారత కూటమి అధికారంలోకి వస్తే అగ్నివీర్‌ పథకాన్ని రద్దు చేసి చెత్తకుండీలో పడవేస్తామని కాంగ్రెస్ అధినేత రాహుల్ గాంధీ అన్నారు. ప్రధాని నరేంద్ర మోదీ ‘హిందుస్థాన్‌ జవాన్‌ను కూలీలుగా మార్చేశారని’ విమర్శించారు. లోక్‌సభ ఎన్నికల ప్రచారంలో భాగంగా రాహుల్ హర్యానాలో పర్యటించారు. మహేంద్రగఢ్-భివానీ లోక్‌సభ స్థానం పరిధిలో జరిగిన ర్యాలీలో మాట్లాడుతూ.. అగ్నివీర్ మోదీ పథకం, ఆర్మీ పథకం కాదు, ఆర్మీకి అక్కర్లేదు. భారత కూటమి అధికారంలోకి రాగానే అగ్నివీర్ పథకాన్ని చెత్తబుట్టలో వేస్తాం’’ అన్నారు.

బిజెపి ప్రభుత్వంపై దాడిని ఉధృతం చేస్తూ.. “అమరవీరులు రెండు రకాలుగా ఉంటారని చెబుతున్నారు. ఒకరు సాధారణ జవాన్. మరొకరు అధికారి. అధికారికి అన్ని సౌకర్యాలతో పాటు పెన్షన్, అమరవీరుడు హోదా ఇస్తారట. మరి పేద కుటుంబానికి చెందిన జవాన్‌కు అవేమి వర్తించవట.’’ అని రాహుల్ అన్నారు. రైతుల సమస్యలను కూడా ప్రస్తావించిన రాహుల్ జూన్ 4న అధికారంలోకి రాగానే రైతుల రుణమాఫీ చేస్తామన్నారు.

ఏమిటీ అగ్నిపథ్ రిక్రూట్‌మెంట్?

భారత ప్రభుత్వం మూడు సాయుధ దళాలలో ఈ నియామక వ్యవస్థను ప్రవేశపెట్టింది. ఈ విధానంలో నియమితులైన సిబ్బందిని అగ్నివీరులంటారు. 2022 జూన్‌ 14 న భారత ప్రభుత్వం ఆమోదించిన ఈ పథకాన్ని 2022 సెప్టెంబరు నుంచి అమలు చేయాలని తలపెట్టారు. ఈ పథకం ద్వారా త్రివిధ దళాలలోనికి, ఆఫీసర్ల కంటే దిగువ స్థాయి సైనికుల నియామకాలు జరుపుతారు. 17 నుంచి 21 సంవత్సరాల వయస్సు గల యువకులను చేర్చుకుంటారు. ఉద్యోగి కాలం 4 సంవత్సరాలు మాత్రమే.