వారానికో రోజు బ్యాగ్‌లెస్ స్కూల్...విద్యార్థులకు బ్యాగుల భారం తగ్గేనా?

పాఠశాల విద్యార్థులపై బ్యాగుల భారాన్ని తగ్గించేందుకు మధ్యప్రదేశ్ రాష్ట్ర ప్రభుత్వం కీలక నిర్ణయం తీసుకుంది. వారానికి ఒక రోజు పాఠశాల విద్యార్థులు బ్యాగులు లేకుండా స్కూలుకు రావాలని మధ్యప్రదేశ్ రాష్ట్ర విద్యాశాఖ తాజాగా ఆదేశాలు జారీ చేసింది. 1వ తరగతి నుంచి 12వతరగతి వరకు చదివే విద్యార్థులు వారంలో ఒకరోజు బ్యాగులు లేకుండా పాఠశాలకు రావాలని విద్యాశాఖ ఉత్తర్వులు జారీ చేసింది. బ్యాగుల భారం వల్ల పాఠశాల పిల్లలపై ఒత్తిడి తగ్గించేందుకు మధ్యప్రదేశ్ విద్యాశాఖ ఈ వినూత్న నిర్ణయం తీసుకుంది. మధ్యప్రదేశ్ రాష్ట్రంలో వచ్చే విద్యా సంవత్సరం నుంచి పాఠశాలల్లో బ్యాగ్ లెస్ విధానాన్ని కచ్చితంగా అమలు చేస్తామని ఆ రాష్ట్ర పాఠశాల విద్యాశాఖ మంత్రి ఉదయ్ ప్రతాప్ సింగ్‌ చెప్పారు. విద్యార్థుల బ్యాగ్ బరువును వారు చదివే తరగతి బట్టి నిర్ణయించామని మంత్రి పేర్కొన్నారు.బ్యాగ్ లెస్ స్కూల్ రోజు పిల్లలు ఆటపాటలతో ఆనందంగా గడపాలని, సాంస్కృతిక కార్యక్రమాలు, సంగీతం మొదలైన వాటిని ఆస్వాదించాలని మంత్రి చెప్పారు. విద్యార్థులకు పాఠశాల అనేది ఒత్తిడికి సంబంధించిన అంశంగా కనిపించకుండా, వారికి ఆనందాన్ని కలిగించే విధంగా ఉంచాలని మంత్రి వివరించారు. మధ్యప్రదేశ్ ప్రభుత్వం తీసుకున్న ఈ చర్యను పలువురు వైద్యులు, పాఠశాల విద్యార్థుల తల్లిదండ్రులు అభినందిస్తున్నారు. తమ తెలంగాణ రాష్ట్రంలోనూ వారం వారం బ్యాగ్ లెస్ డేను అమలు చేయాలని పాఠశాల విద్యార్థుల పేరెంట్స్ కమిటీ సభ్యుడు రాపోలు సతీష్ డిమాండ్ చేశారు.