గచ్చిబౌలిలో స్పోర్ట్స్ సిటీ రెడీ..! క్రీడలకు గోల్డెన్ ఛాన్స్..!

ర‌చ్చ‌ - రాజ‌కీయం @ 5 పి.ఎం.

1) గచ్చిబౌలిలో స్పోర్ట్స్ సిటీ రెడీ..! క్రీడలకు గోల్డెన్ ఛాన్స్..!

2) పాతబస్తీలో సగం ఓట్లు గల్లంతవుతున్నాయా?

3) SHG మహిళల ఆదాయానికి కొత్త దారి!

1) గచ్చిబౌలిలో స్పోర్ట్స్ సిటీ రెడీ..!క్రీడలకు గోల్డెన్ ఛాన్స్..!

తెలంగాణను అంతర్జాతీయ స్థాయి స్పోర్ట్స్ హబ్‌గా తీర్చిదిద్దాలనే లక్ష్యంతో రాష్ట్ర ప్రభుత్వం క్రీడారంగంపై ప్రత్యేక దృష్టి సారించింది. ముఖ్యమంత్రి రేవంత్ రెడ్డి నాయకత్వంలో క్రీడా మౌలిక వసతుల అభివృద్ధి, యువతకు ప్రపంచ స్థాయి శిక్షణ, కొత్త క్రీడా విధానాల అమలుపై ప్రభుత్వం వేగంగా ముందుకెళ్తోంది.

ఈ దిశగా గచ్చిబౌలిలో అత్యాధునిక స్పోర్ట్స్ డిస్ట్రిక్ట్ అభివృద్ధికి శ్రీకారం చుట్టింది. రాష్ట్రాన్ని దేశంలోనే ప్రముఖ క్రీడా కేంద్రంగా తీర్చిదిద్దేందుకు ప్రభుత్వం రూ.50.73 కోట్ల విలువైన పలు క్రీడా మౌలిక వసతుల ప్రాజెక్టులను ప్రారంభించింది.

గచ్చిబౌలి స్టేడియంలో FIFA-AIFF ఫుట్‌బాల్ టాలెంట్ అకాడమీతో పాటు అథ్లెటిక్స్, హాకీ అకాడమీలు ఏర్పాటు చేశారు. ఎల్‌బీ స్టేడియంలో ఫుట్‌బాల్, హ్యాండ్‌బాల్ అకాడమీలు కూడా ప్రారంభమయ్యాయి. యువ క్రీడాకారులకు అంతర్జాతీయ ప్రమాణాల శిక్షణ అందించేందుకు అత్యాధునిక సౌకర్యాలు కల్పిస్తున్నారు.

హైదరాబాద్‌కే పరిమితం కాకుండా జిల్లాల్లోనూ క్రీడా మౌలిక వసతులను విస్తరిస్తున్నారు. షాద్‌నగర్‌లో మినీ స్టేడియం, సంగారెడ్డిలో అంబేద్కర్ స్టేడియం ఆధునికీకరణ, వనపర్తిలో మల్టీ పర్పస్ స్టేడియం నిర్మాణం చేపడుతుండగా, నారాయణపేట, కామారెడ్డి, మెదక్ జిల్లాల్లో కూడా కొత్త క్రీడా వసతులు ఏర్పాటు చేస్తున్నారు.

అదే సమయంలో స్టేట్ స్పోర్ట్స్ హబ్ బోర్డు ఏర్పాటు, యంగ్ ఇండియా స్పోర్ట్స్ యూనివర్సిటీ స్థాపన వంటి ప్రతిష్ఠాత్మక ప్రణాళికలను ప్రభుత్వం అమలు చేస్తోంది. భవిష్యత్‌లో తెలంగాణ క్రీడాకారులు ఒలింపిక్స్, కామన్వెల్త్ వంటి అంతర్జాతీయ పోటీల్లో పతకాలు సాధించడమే కాకుండా, తెలంగాణే ప్రపంచ స్థాయి క్రీడా పోటీలకు ఆతిథ్యం ఇచ్చే రాష్ట్రంగా ఎదగాలన్నదే ప్రభుత్వ లక్ష్యం.

ముఖ్యమంత్రి రేవంత్ రెడ్డి క్రీడలకు అత్యంత ప్రాధాన్యత ఇవ్వడానికి మరో ప్రధాన కారణం యువతను డ్రగ్స్ వంటి దురలవాట్ల నుంచి దూరం చేయడమే. క్రీడల ద్వారా క్రమశిక్షణ, ఆత్మవిశ్వాసం, ఆరోగ్యకరమైన జీవనశైలిని అలవాటు చేయవచ్చని ప్రభుత్వం భావిస్తోంది.

అలాగే విద్యార్థులు చదువుతో పాటు క్రీడల్లోనూ రాణించాలని ప్రభుత్వం ప్రోత్సహిస్తోంది. చిన్న వయస్సు నుంచే క్రీడలపై ఆసక్తి పెంపొందితే శారీరక, మానసిక వికాసం సాధ్యమవుతుందని ప్రభుత్వం చెబుతోంది. క్రీడా సంస్కృతిని గ్రామీణ స్థాయి వరకు విస్తరించి, తెలంగాణను దేశంలోనే అగ్రశ్రేణి స్పోర్ట్స్ హబ్‌గా తీర్చిదిద్దడమే ప్రభుత్వ దీర్ఘకాలిక లక్ష్యంగా ఉంది.

2) పాతబస్తీలో సగం ఓట్లు గల్లంతవుతున్నాయా?

ఎన్నికల సంఘం నిర్దేశించిన 12 పత్రాలలో 4 పత్రాలు (కుటుంబ రిజిస్టర్, పర్మనెంట్ రెసిడెన్స్ సర్టిఫికెట్ మొదలైనవి) తెలంగాణలో అందుబాటులో లేవని ఎంపీ అసదుద్దీన్ ఒవైసీ [Asaduddin Owaisi] ప్రస్తావించారు. పేదలకు ఇబ్బందులు కలగకుండా ప్రభుత్వం వెంటనే పర్మనెంట్ రెసిడెన్స్ సర్టిఫికెట్లు (PRC) జారీ చేయాలని ఆయన డిమాండ్ చేశారు.

హైదరాబాద్ పాతబస్తీలో ప్రత్యేక ఓటరు జాబితా సవరణ ప్రక్రియ ఆందోళనలకు దారితీస్తోంది. దశాబ్దాలుగా ఇక్కడే నివసిస్తూ ప్రతి ఎన్నికలో ఓటు వేస్తున్న వేలాది మంది పేద, మైనారిటీ వర్గాల ఓటర్లు కొత్త ధ్రువీకరణ ప్రక్రియలో ఇబ్బందులు ఎదుర్కొంటున్నారని స్థానికులు, రాజకీయ పార్టీలు చెబుతున్నాయి.

ప్రధానంగా నివాస ధ్రువీకరణ పత్రాలు లేకపోవడం పెద్ద సమస్యగా మారింది. పాతబస్తీలో అధిక సంఖ్యలో ప్రజలు అద్దె ఇళ్లలో నివసిస్తుండటంతో శాశ్వత చిరునామా పత్రాలు చాలామందికి అందుబాటులో లేవు. దీంతో ఓటరు జాబితాలో తమ పేర్లు కొనసాగుతాయా లేదా అన్న ఆందోళన వ్యక్తమవుతోంది.

అలాగే, పాత ఓటరు రికార్డుల్లో ఉన్న వివరాల ఆధారంగా జరుగుతున్న పరిశీలన కూడా సమస్యలకు కారణమవుతోందని అంటున్నారు. ఇంటి నంబర్లు మారడం, పేర్లు లేదా కుటుంబ వివరాల్లో గతంలో నమోదైన చిన్న పొరపాట్లు ఇప్పుడు ఓటరు ధృవీకరణలో ఆటంకాలుగా మారుతున్నాయని ఆరోపణలు వినిపిస్తున్నాయి.

డిజిటల్ అవగాహన తక్కువగా ఉన్న పేద కుటుంబాలు తమ ఓటు జాబితాలో ఉందో లేదో కూడా సులభంగా తెలుసుకోలేకపోతున్నాయని స్థానికులు చెబుతున్నారు. ఎన్నికల రోజునే పేరు తొలగిపోయిందని తెలిసే పరిస్థితి వస్తుందేమోనని భయపడుతున్నారు.

ఈ అంశంపై ఎంఐఎం తీవ్ర ఆందోళన వ్యక్తం చేస్తోంది. పేదలు, అద్దె ఇళ్లలో నివసించే వారికి ప్రత్యేక నివాస ధ్రువీకరణ విధానం తీసుకురావాలని, రాష్ట్ర ప్రభుత్వం వెంటనే జోక్యం చేసుకోవాలని డిమాండ్ చేస్తోంది.మరోవైపు, ఈ అంశంపై ప్రభుత్వం, ఎన్నికల సంఘం నుంచి స్పష్టమైన చర్యలు అవసరమని పలువురు అభిప్రాయపడుతున్నారు. సమస్యకు త్వరగా పరిష్కారం లభించకపోతే, రాబోయే ఎన్నికల్లో పాతబస్తీ ఓటర్లపై ప్రభావం పడే అవకాశం ఉందనే చర్చ కొనసాగుతోంది.

3) మహిళల ఆదాయానికి కొత్త దారి!

తెలంగాణలో రైతులకు ఎరువులను మరింత సులభంగా, సకాలంలో అందించేందుకు రాష్ట్ర ప్రభుత్వం కొత్త విధానాన్ని అమలు చేసేందుకు సిద్ధమవుతోంది. ఇకపై మహిళా స్వయం సహాయక సంఘాల ద్వారా రైతులకు ఎరువులు అందించేలా ప్రణాళిక రూపొందిస్తోంది.

ప్రస్తుతం రాష్ట్రంలో వానాకాలం, యాసంగి సీజన్‌లలో కలిపి ఏటా సుమారు 40 లక్షల టన్నుల ఎరువులు పంపిణీ అవుతున్నాయి. అయితే సీజన్ ప్రారంభంలో కొన్నిచోట్ల ఎరువుల కొరత, పంపిణీ సమస్యలు తలెత్తుతున్న నేపథ్యంలో ప్రత్యామ్నాయ వ్యవస్థను తీసుకురావాలని ప్రభుత్వం భావిస్తోంది.

మొదట రైతు వేదికల ద్వారా విత్తనాలు, ఎరువులు పంపిణీ చేసే అవకాశాన్ని పరిశీలించినా... గిడ్డంగులు, భద్రత, ఇతర మౌలిక సదుపాయాల కొరత కారణంగా ఆ ఆలోచనను విస్తరించలేకపోయారు. దీంతో గ్రామాల్లో బలంగా పనిచేస్తున్న మహిళా స్వయం సహాయక సంఘాలను ఈ ప్రక్రియలో భాగస్వామ్యం చేయాలని నిర్ణయించారు. రాష్ట్రవ్యాప్తంగా ఉన్న మహిళా సంఘాల్లో అర్హత, ఆసక్తి ఉన్న సంఘాలను ఎంపిక చేసి అధికారిక ఫెర్టిలైజర్ లైసెన్సులు ఇవ్వాలని ప్రభుత్వం యోచిస్తోంది.

ఈ సంఘాల కోసం నిర్మిస్తున్న 8,126 భవనాలను ఎరువుల నిల్వ కేంద్రాలుగా కూడా వినియోగించేలా ప్రణాళిక సిద్ధమవుతోంది. దీంతో రైతులు తమ గ్రామంలోనే, ఇళ్లకు సమీపంలో ఎరువులు పొందే అవకాశం కలుగుతుంది.ఎంపికైన మహిళా సంఘాలకు యూరియా యాప్ వినియోగం, ఎరువుల విక్రయ విధానం, స్టాక్ నిర్వహణ, ఆన్‌లైన్ రికార్డుల నిర్వహణపై ప్రత్యేక శిక్షణ ఇవ్వనున్నారు. ప్రయోగాత్మకంగా కొన్ని జిల్లాల్లో ఈ విధానాన్ని ప్రారంభించి, ఫలితాలను పరిశీలించిన తర్వాత రాష్ట్రవ్యాప్తంగా అమలు చేసే అవకాశాన్ని ప్రభుత్వం పరిశీలిస్తోంది.

తెలంగాణ ప్రభుత్వం మహిళా సాధికారతకు అత్యంత ప్రాధాన్యం ఇస్తోంది. రాష్ట్రంలోని కోటి మంది మహిళలను ఆర్థికంగా బలోపేతం చేసి కోటీశ్వరులుగా తీర్చిదిద్దాలనే లక్ష్యంతో రేవంత్ రెడ్డి ప్రభుత్వం పలు కీలక కార్యక్రమాలను అమలు చేస్తోంది. మహిళలు స్వయం ఉపాధి ద్వారా ఆర్థిక స్వావలంబన సాధించేలా ఇందిర మహిళా శక్తి క్యాంటీన్లు, డ్రోన్ సేవలు, పెట్రోల్ బంకుల నిర్వహణ, సూపర్ మార్కెట్లు, ఆర్టీసీ బస్సుల నిర్వహణ వంటి వివిధ రంగాల్లో అవకాశాలను కల్పిస్తోంది. మహిళల ఆదాయాన్ని పెంచడంతో పాటు వారిని వ్యాపారవేత్తలుగా, ఉపాధి సృష్టికర్తలుగా తీర్చిదిద్దే దిశగా ప్రభుత్వం చర్యలను వేగవంతం చేస్తోంది.ప్రభుత్వం తీసుకున్న ఈ నిర్ణయం గ్రామీణ ఆర్థిక వ్యవస్థను బలోపేతం చేయడమే కాకుండా మహిళా శక్తిని ప్రపంచానికి చాటిచెప్పనుంది.