తెలంగాణలో వన్‌ ఎమ్మెల్యే, వన్‌ పెన్షన్‌ విధానానికి తూట్లు

తెలంగాణలో ఒక ఎమ్మెల్యే...ఒక పెన్షన్ విధానానికి విరుద్ధంగా మాజీ ఎమ్మెల్యేలకు టర్మ్‌లను బట్టి అధిక పెన్షన్ పొందుతున్నారు. చట్టాలు చేసే వారు అధికారం ఉంది కదా అని తమకు అనుకూలంగా తెలంగాణ పెన్షన్ సవరణ చట్టం 2021 పేరిట తీసుకువచ్చి మాజీ శాసనసభ్యులకు చెల్లించే పెన్షన్లను అనూహ్యంగా పెంచుకున్నారు. గతంలో ఎమ్మెల్యేలకు కనీస పెన్షన్ నెలకు రూ.30వేలు ఇచ్చేవారు. అనంతరం 2021 పెన్షన్ సవరణ చట్టం ప్రకారం మాజీ శాసనసభ్యులు 2021వ సంవత్సరం మార్చి 30వతేదీ నుంచి పెన్షన్ ను నెలకు రూ.50వేలకు పెంచారు. ఒక టర్మ్ కంటే ఎక్కువ సార్లు పనిచేసిన శాసనసభ్యులకు ఒక శాసనసభ్యుడి పెన్షన్ ఒక టర్మ్ లేదా అందులో కొంత భాగం పనిచేస్తే అలాంటి వారికి కనీసం నెలకు రూ.50వేల పెన్షన్ ఇస్తున్నారు. అయితే కొందరు ఎమ్మెల్యేలు రెండుసార్లు, మూడుసార్లు, నాలుగు సార్లు శాసనసభ్యులుగా పనిచేసిన వారికి వారు ఎమ్మెల్యేగా పనిచేసిన కాలానికి ఏడాది రెండువేల రూపాయల చొప్పున అదనంగా పెన్షన్ ఇస్తున్నారు. మాజీ ఎమ్మెల్యేలకు చెల్లించే పింఛన్లతోపాటు వైద్య బిల్లుల పరిమితిని పెంచుతూ రూపొందించిన సవరణ బిల్లులను గతంలో తెలంగాణ శాసనసభ ఆమోదించింది. ఎమ్మెల్యేలు, మాజీ ఎమ్మెల్యేల వైద్య బిల్లులకు సంబంధించి ప్రభుత్వం చెల్లించే మొత్తాన్ని రూ.లక్ష నుంచి 10 లక్షలకు పెంచారు.