రాజ్యసభకు అధికారం పెంచాలి: కవిత

తెలంగాణ రాజకీయాల్లో మరోసారి కవిత వ్యాఖ్యలు చర్చకు దారితీశాయి. తాజాగా డీలిమిటేషన్‌పై కొత్త ప్రతిపాదన చేస్తూ, రాజ్యసభకు అధికారం పెంచాలని ఆమె సూచించడం ప్రధాన అంశంగా మారింది. శనివారం నిర్వహించిన మీట్ ది ప్రెస్‌లో కవిత తన అభిప్రాయాలను వెల్లడించారు. గత పదేళ్లుగా బీఆర్ఎస్ పార్టీ క్రమశిక్షణకు కట్టుబడి మౌనంగా ఉన్నానని, అంతర్గతంగా విభేదాలు ఉన్నా అధినేత నిర్ణయానికే లోబడాల్సి వచ్చిందని తెలిపారు. గతంలో జరిగిన కొన్ని తప్పులపై ఇప్పుడు బహిరంగంగా క్షమాపణలు కోరారు. తాను తప్పు చేసినట్లు రుజువైతే శిక్షకు సిద్ధమని కూడా చెప్పారు. భవిష్యత్తులో ఇచ్చే హామీలు నెరవేర్చకపోతే బాధ్యత తీసుకుంటానని స్పష్టం చేశారు.

ఆ తర్వాత డీలిమిటేషన్ అంశంపై ఆమె స్పందించారు. దేశంలో ఈ విధానం జనాభా ఆధారంగా అమలైతే కొన్ని రాష్ట్రాలు నష్టపోతాయని తెలిపారు. దీనికి ప్రత్యామ్నాయంగా రాజ్యసభకు మరింత అధికారం ఇవ్వాలని సూచించారు. ప్రతి రాష్ట్రానికి ఫిక్స్ చేసిన సంఖ్యలో సభ్యులు ఉండాలని చెప్పారు. లోక్‌సభలో మాత్రం జనాభా ప్రకారం ఎంపీల సంఖ్యను పెంచుకోవచ్చని అభిప్రాయపడ్డారు. ఒక ఎంపీకి 7 నుంచి 8 లక్షల జనాభా బెంచ్‌మార్క్‌గా తీసుకోవచ్చని వివరించారు. ఈ విషయంపై త్వరలో ప్రధాని నరేంద్ర మోదీకి లేఖ రాయాలని నిర్ణయించుకున్నట్లు చెప్పారు.

ప్రస్తుతం రాజ్యసభలో రాష్ట్రాల మధ్య అసమానత ఉందని కవిత గుర్తుచేశారు. పెద్ద రాష్ట్రాలకు ఎక్కువ సీట్లు, చిన్న రాష్ట్రాలకు తక్కువ సీట్లు ఉండటం సరైన విధానం కాదన్నారు. అమెరికా సెనేట్ తరహాలో అన్ని రాష్ట్రాలకు సమాన ప్రాతినిధ్యం ఉండాలని సూచించారు. అలా చేస్తే రాష్ట్రాల ప్రయోజనాలు కాపాడవచ్చని తెలిపారు. రాజకీయంగా కూడా ఆమె తీవ్ర వ్యాఖ్యలు చేశారు. తెలంగాణలో బీజేపీకి స్థానం లేదని, ఆ పార్టీ రాష్ట్రానికి అనుకూలంగా పనిచేయడం లేదని విమర్శించారు. రాష్ట్ర అధ్యక్షుడు కిషన్ రెడ్డి కేంద్రం నుంచి నిధులు తీసుకురాలేకపోయారని ఆరోపించారు.

అలాగే, ప్రధాని నరేంద్ర మోదీ ఇచ్చిన హామీలను గుర్తు చేశారు. పాలూరుకు వచ్చినప్పుడు ప్రాజెక్టుకు జాతీయ హోదా ఇస్తామని చెప్పినా అది అమలు కాలేదని అన్నారు. ఇప్పుడు మళ్లీ రాష్ట్రానికి వచ్చినప్పుడు ఈ విషయంపై సమాధానం చెప్పాలని డిమాండ్ చేశారు. కాంగ్రెస్‌పై కూడా కవిత స్పందించారు. తన పార్టీపై విమర్శలు వచ్చినా పట్టించుకోనని, కాలమే సమాధానం చెబుతుందని అన్నారు. పార్టీ ఉండడమే ఒక శక్తి అని పేర్కొన్నారు.