హైదరాబాద్‌లో నయా మోసాలు...పోలీసుల పారాహుషార్

రోజుకో రకం సైబర్ మోసాలు వెలుగులోకి వస్తున్న సమయంలో కొందరు సైబర్ నేరగాళ్లు ‘డిజిటల్ అరెస్ట్’ పేరిట కొత్త రకం ఘరానా మోసాలకు తెర లేపారు.గతంలో ఢిల్లీ, నోయిడా, ముంబయి నగరాల్లో సాగిన ఈ రకం మోసాలు తాజాగా హైదరాబాద్ నగరానికి కూడా పాకాయి. డిజిటల్ అరెస్ట్ కొత్త రకం సైబర్ నేరం కావడంతో బడా వ్యాపారులు భయంతో కంగారుపడి జేబులు గుల్ల చేసుకుంటున్నారు. ఇటీవల నగరానికి చెందిన ఓ వ్యాపారిని ఇదే తరహాలో మోసగించారు.

కొరియర్ వచ్చిందంటూ డబ్బు కైంకర్యం

హైదరాబాద్ నగరానికి చెందిన ఓ బడా వ్యాపారికి ఇటీవల కొరియర్ వచ్చిందంటూ ఓ ఆగంతకుడు ఫోన్ చేశాడు. తాము కేంద్ర దర్యాప్తు సంస్థ అధికారులమని చెప్పి, మీకు ఫెడ్ ఎక్స్ కొరియర్ వచ్చిందని అందులో డ్రగ్స్ ఉన్నాయని భయపెట్టారు. దీనిపై తాము కేసు నమోదు చేసి, అరెస్ట్ చేస్తామని భయపెట్టారు. అంతే దీంతో భయ పడిన వ్యాపారి వారు చెప్పిన ఖాతాలో కోటి రూపాయలు జమ చేయాలని కోరారు. డ్రగ్స్ కేసు భయంతో సదరు వ్యాపారి రూ.98 లక్షల రూపాయలను సైబర్ నేరగాళ్లు సూచించిన ఖాతాకు బదిలీ చేశారు. డబ్బును బదిలీ చేశాక అనుమానంతో వ్యాపారి హైదరాబాద్ సైబర్ పోలీసులకు ఫిర్యాదు చేశారు.

రంగంలోకి దిగిన సైబర్ సెక్యూరిటీ అధికారులు

దీంతో రంగంలోకి దిగిన తెలంగాణ సైబర్ సెక్యూరిటీ బ్యూరో అధికారులు అప్రమత్తమై బ్యాంకు ఖాతా గురించి ఆరా తీస్తే ఆ ఖాతా జమ్మూకశ్మీరులోని బారాముల్లా పంజాబ్ నేషనల్ బ్యాంకు జుజు అనే వ్యక్తి ఖాతాగా తేలింది. ఆ డబ్బును వెంటనే మరో ఐదు బ్యాంకులకు బదిలీ చేశారు. ఇందులో సైబర్ నేరగాళ్లు రూ.15లక్షలను అప్పటికే డ్రా చేశారు. మిగిలిన రూ.83 లక్షలను విత్ డ్రా చేయకుండా బ్యాంకర్లకు చెప్పిన హైదరాబాద్ సైబర్ అధికారులు నిలిపివేయించి, డబ్బును రికవరీ చేశారు.

ఐటీ అధికారులమంటూ మోసం

సికింద్రాబాద్ నగరంలోని బాలాజీ జ్యువెలరీ దుకాణానికి అయిదుగురు వ్యక్తులు తాము ఐటీ అధికారులమని తనిఖీలకు వచ్చామంటూ హడావుడి చేశారు. బంగారం కొనుగోలులో అక్రమాలకు పాల్పడ్డారని బెదిరించి దుకాణంలో ఉన్న బంగారాన్ని తనిఖీ చేయాలని సిబ్బందిని పక్కన కూర్చొబెట్టారు. దుకాణంలో ఉన్న 1700 గ్రాముల బంగారానికి ఆదాయపు పన్ను చెల్లించలేదని చెప్పి, దాన్ని స్వాధీనం చేసుకుంటున్నామని ఎలాంటి నోటీసులు ఇవ్వకుండానే బంగారంతో పారిపోయారు. ఐటీ అధికారులు ఇలా తనిఖీలు చేయరని, నోటీసులు ఇస్తారని తోటి వ్యాపారులు చెప్పడంతో మోసపోయామని గ్రహించి దుకాణ యజమాని పోలీసులకు ఫిర్యాదు చేశారు.

దేశంలో ఎన్నెన్నో కేసులు...

ఇలా హైదరాబాద్ నగరంలోనే కాదు గత ఏడాది దేశంలో 200 మందికి పైగా ఇలా కొత్త రకం మోసాల బారిన పడ్డారని సాక్షాత్తూ నేషనల్ క్రైం రికార్డ్ బ్యూరో(ఎన్సీఆర్బీ) విడుదల చేసిన నివేదికలో వెల్లడైంది. డిజిటల్ అరెస్ట్ మోసాలు 2021వ సంవత్సరంలో 345 జరిగాయి. 2022వ సంవత్సరానికి వీటి సంక్య 685 కేసులకు పెరిగిందని నేషనల్ క్రైం రికార్డ్ బ్యూరో నివేదికే వెల్లడించింది.