మళయాళ మ్యాజిక్: 2024లో టాప్ 10 మళయాళ సినిమాలు, ఏ ఓటిటిలో ఉన్నాయి

మొదటి నుంచి మలయాళ చిత్ర పరిశ్రమ కొత్త తరహా కథలకు, సీన్స్ తో కట్టిపారేసే స్క్రీన్ ప్లే కు ప్రాధాన్యత ఇస్తూ తనకంటూ భారతీయ సినిమాలో ఓ మార్గం వేసుకుంది. చిన్న బడ్జెట్ తో వచ్చి భారీగా భాక్సాఫీస్ విజయం సాధించటం ఇక్కడ సినిమాల స్పెషాలిటీ. 2024లోనూ ఈ పరిశ్రమ తన పరంపరను కొనసాగించింది. ఈ సంవత్సరం థ్రిల్లర్‌లు, యాక్షన్ సినిమాలు, యూత్ ని ఆకట్టుకునే ప్రేమలు వంటి లవ్ స్టోరీలు, భ్రమయుగం వంటి ప్రయోగాత్మక సినిమాల కలయికతో మన దేశంలోని అత్యంత వినూత్నమైన వాటిలో ఒకటిగా మళయాళ చిత్ర పరిశ్రమ తన స్థానాన్ని సుస్థిరం చేసుకుంది.

ఈ ఏడాది మొత్తంగా 199 చిత్రాలు వచ్చాయని.. సుమారు రూ.1000 కోట్లు ఖర్చు అయిందని కేరళ చిత్ర నిర్మాతల అసోసియేషన్‌ పేర్కొంది .‘మంజుమ్మల్‌ బాయ్స్’, ‘ఆడు జీవితం’, ‘ఎ.ఆర్‌.ఎం.’, ‘ఆవేశం’, ‘ప్రేమలు’, ‘భ్రమయుగం’, ‘సూక్ష్మ దర్శిని’ వంటి సినిమాలు విడుదలై విజయాన్ని అందుకున్నాయి. తెలుగులోనూ ఆయా చిత్రాలకు విశేష గుర్తింపు లభించిన విషయం తెలిసిందే. 2024లో ప్రేక్షకులను, విమర్శకులను ఎట్రాక్ట్ చేసిన 10 ఉత్తమ మలయాళ చిత్రాలు చూద్దాం.

ఫిబ్రవరిలో విడుదలైన ‘మంజుమ్మల్‌ బాయ్స్‌’ రూ.240 కోట్ల గ్రాస్‌ వసూలు చేసి ఈ ఏడాది అత్యధిక వసూళ్లు రాబట్టిన మలయాళ చిత్రంగా నిలిచింది. పృథ్వీరాజ్‌ సుకుమారన్‌ నటించిన ‘ఆడు జీవితం’, టొవినో థామస్‌ యాక్ట్‌ చేసిన ‘ఎ.ఆర్‌.ఎం’, నస్లేన్ కె. గఫూర్‌, మమతా బైజు జంటగా నటించిన ‘ప్రేమలు’ రూ.100 కోట్లకు పైగా కలెక్షన్స్‌ రాబట్టాయి. కొత్త చిత్రాలు మాత్రమే కాకుండా ఒకప్పటి హిట్‌ చిత్రాలు కూడా ఈ ఏడాది రీ రిలీజ్‌ అయ్యాయి. మోహన్‌లాల్‌ నటించిన ‘దేవదూతన్‌’, ‘మణిచిత్రతాళు’ సినిమాలను రీరిలీజ్‌ చేయగా మరోసారి ప్రేక్షకులను ఆకట్టుకున్నాయి.

మంజుమ్మల్ బాయ్స్

మంజుమ్మల్ బాయ్స్ సినిమా మలయాళ ఇండస్ట్రీలో కొత్త రికార్డులు సృష్టించింది. తెలుగులోనూ ఈ సినిమా అదిరిపోయే కలెక్షన్స్ నమోదు చేసింది. రూ.200 కోట్ల కలెక్షన్ల మార్క్ దాటిన తొలి మలయాళ మూవీగా చరిత్ర రాసింది. ఫిబ్రవరి 22న రిలీజైన ఈ సర్వైవల్ థ్రిల్లర్ చిత్రం మొత్తంగా సుమారు రూ.242 కోట్ల కలెక్షన్లు సాధించి ఆల్‍టైమ్ హిట్‍గా నిలిచింది. చిదంబరం దర్శకత్వంలో రూ.20కోట్ల బడ్జెట్‍తో రూపొందిన మంజుమ్మల్ బాయ్స్ భారీ బ్లాక్‍బస్టర్ అయింది. ఈ మూవీ డిస్నీ+ హాట్‍స్టార్ ఓటీటీలో స్ట్రీమ్ అవుతోంది.

ది గోట్ లైఫ్

పృథ్వీరాజ్ సుకుమార్ ప్రధాన పాత్ర పోషించిన ‘ది గోట్ లైఫ్ - ఆడుజీవితం’ చిత్రం రూ.160 కోట్ల గ్రాస్ కలెక్షన్లు దక్కించుకుని రికార్డ్ క్రియేట్ చేసింది. గల్ఫ్ దేశాల్లో జీవన పోరాటం చేసిన ఓ వ్యక్తి నిజ జీవితం ఆధారంగా వచ్చిన పుస్తకం రైట్స్ తీసుకుని, బ్లెస్సీ ఈ మూవీని తెరకెక్కించారు. ఈ సినిమా ఈ ఏడాది మార్చి 28న థియేటర్లలో రిలీజ్ అయింది. ప్రస్తుతం నెట్‍ఫ్లిక్స్ ఓటీటీలో ది గోట్ లైఫ్ స్ట్రీమింగ్‍కు అందుబాటులో ఉంది.

ఆవేశం

ఫాహద్ ఫాజిల్ హీరోగా నటించిన ఆవేశం చిత్రం ఎంత పెద్ద హిట్ అంటే తెలుగులో రీమేక్ రైట్స్ తీసుకున్నారు. సుమారు రూ.156కోట్ల గ్రాస్ కలెక్షన్లు దక్కించుకుంది. ఈ యాక్షన్ కామెడీ చిత్రం ఏప్రిల్ 11న థియేటర్లలో విడుదలైంది. ఈ సినిమాను అమెజాన్ ప్రైమ్ వీడియో, డిస్నీ+ హాట్‍స్టార్ ఓటీటీల్లో స్ట్రీమ్ అవుతోంది. అయితే తెలుగు వెర్షన్ అందుబాటులో లేదు.

ప్రేమలు

ప్రేమలు సినిమా తెలుగువారికి తెగ నచ్చేసింది. తెలుగులోనూ ఈ సినిమా సెన్సేషనల్ హిట్ అయింది. ఈ రొమాంటిక్ కామెడీ మూవీ ఈ ఏడాది ఫిబ్రవరి 9న విడుదలైంది. రూ.8కోట్లలోపు బడ్జెట్‍తో రూపొందిన ఈ చిత్రం ఏకంగా రూ.136 కోట్ల వసూళ్లతో దుమ్మురేపింది. ఈ ఏడాది మలయాళంలో అత్యధిక లాభాలను గడించిన చిత్రంగా నిలిచింది. ప్రేమలు చిత్రంలో నస్లెన్ కే గఫూర్, మమితా బైజూ హీరోహీరోయిన్లుగా నటించగా.. గిరీశ్ ఏడీ దర్శకత్వం వహించారు. ఈ సినిమా తెలుగులో ఆహాలో, హిందీ, మలయాళం, తమిళంలో డిస్నీ+ హాట్‍స్టార్ ఓటీటీలో ఉంది.

ఏఆర్ఎం

టోవినో థామస్ హీరోగా నటించిన యాక్షన్ అడ్వెంచర్ మూవీ ఏఆర్ఎం (ఆజయంతే రందం మోషనం) సుమారు రూ.100 కోట్ల కలెక్షన్లు దక్కించుకుంది. ఈ చిత్రం సెప్టెంబర్ 12న థియేటర్లలో రిలీజైంది. ప్రస్తుతం డిస్నీ+ హాట్‍స్టార్ ఓటీటీలో స్ట్రీమ్ అవుతోంది.

గురువాయూర్ అంబలనదయిల్

కామెడీ మూవీ ‘గురువాయూర్ అంబలనదయిల్’ఓటటిలో తెలుగు వారు తెగ చూసారు. రూ.90కోట్ల వసూళ్లతో వచ్చిన పృథ్వీరాజ్ సుకుమారన్, బాసిల్ జోసెఫ్, నిఖిల విమల్ లీడ్ రోల్స్ చేసిన ఈ చిత్రం మే 16న థియేటర్లలో అడుగుపెట్టింది. ఈ మూవీ డిస్నీ+ హాట్‍స్టార్ ఓటీటీలో అందుబాటులో ఉంది.

భ్రమయుగం

మలయాళ మెగాస్టార్ మమ్ముట్టి ప్రధాన పాత్ర పోషించిన భ్రమయుగం చిత్రం మలయాళంలో మంచి సక్సెస్ అయ్యింది. ఈ చిత్రం సుమారు రూ.85కోట్ల వసూళ్లు రాబట్టింది. ఈ పీరియడ్ హారర్ థ్రిల్లర్ చిత్రం ఫిబ్రవరి 15న థియేటర్లలోకి వచ్చి ప్రేక్షకులను మెప్పించింది. ఈ చిత్రం సోనీ లివ్ ఓటీటీలో స్ట్రీమ్ అవుతోంది.

వర్షంగల్కు శేషం

ఎమోషనల్ కామెడీ డ్రామా తెరకెక్కిన మూవీ వర్షంగల్కు శేషం. ఈ చిత్రం అక్కడ స్లీపర్ హిట్ అయ్యింది. సుమారు రూ.80కోట్ల కలెక్షన్లు దక్కించుకుంది. ప్రణవ్ మోహన్ లాల్, ధ్యాన్ శ్రీనివాసన్ నటించిన ఈ లో బడ్జెట్ మూవీ ఏప్రిల్ 11న థియేటర్లలో రిలీజైంది. ఈ సినిమా ప్రస్తుతం సోనీ లివ్ ఓటీటీలో స్ట్రీమింగ్‍ అవుతోంది.

కిష్కింద కాండం

ఈ మధ్యకాలంలో జనం ఎక్కువగా మాట్లాడుకున్న చిత్రం ఇది. సుమారు రూ.7కోట్ల బడ్జెట్‍తో రూపొందిన కిష్కింద కాండం చిత్రం రూ.75కోట్ల గ్రాస్ కలెక్షన్స్ ను దక్కించుకుంది. ఆసిఫ్ అలీ హీరోగా నటించిన ఈ మిస్టరీ మూవీ సెప్టెంబర్ 12 థియేటర్లలోకి వచ్చింది. ఈ చిత్రం ప్రస్తుతం డిస్నీ+ హాట్‍స్టార్ ఓటీటీలో స్ట్రీమ్ అవుతోంది.

టర్బో

మలయాళ సూపర్ స్టార్ మమ్ముట్టి ప్రధాన పాత్ర పోషించిన టర్బీ చిత్రం రూ.70కోట్ల కలెక్షన్లు దక్కించుకుంది. ఈ చిత్రం మే 23వ తేదీన విడుదలైంది. ఈ చిత్రం సోనీ లివ్ ఓటీటీలో అందుబాటులో ఉంది.

ఓ రకంగా ఈ ఏడాది 2024 మలయాళ సినీ ఇండస్ట్రీకి చాలా బాగా కలిసి వచ్చిందనే చెప్పాలి. అదిరిపోయే హిట్‍లను మళయాళపరిశ్రమ చూసింది. తక్కువ బడ్జెట్‍తో వచ్చిన కొన్ని సినిమాలు ఆశ్చర్యపరిచేలా కలెక్షన్లు దక్కించుకున్నాయి. నేషనల్ వైడ్‍గా పాపులర్ అయ్యాయి. మంజుమ్మల్ బాయ్స్, ప్రేమలు సహా మరిన్ని చిత్రాలు అంచనాలకు మించి భారీ వసూళ్లు దక్కించుకున్నాయి. కొత్త రికార్డులు నెలకొన్నాయి.