నవ్వించే ... : 'సివరపల్లి' తెలుగు వెబ్ సిరీస్ రివ్యూ!

హిందీలో సూప‌ర్ హిట్టైన వెబ్ సీరిస్ 'పంచాయ‌త్' . ఈ సిరీస్‌కు తెలుగు రీమేక్‌గా 'సివ‌ర‌ప‌ల్లి' తెరకెక్కింది. తెలుగు నేటివిటీకి అనుగుణంగా క‌థ‌, కామెడీలో అనేక మార్పులు చేర్పులు చేస్తూ ద‌ర్శ‌కుడు భాస్క‌ర్ మౌర్య ఈ వెబ్‌సిరీస్‌ను తెర‌కెక్కించారు. మొత్తం ఎనిమిది ఎపిసోడ్స్‌తో మన ముందుకు వచ్చిన సివ‌ర‌ప‌ల్లి వెబ్‌సిరీస్ ఎలా ఉంది, చూడదగినదేనా, అసలు కథ ఏమిటి వంటి విషయాలు చూద్దాం.

స్టోరీ లైన్

ఎప్పుడెప్పుడు అమెరికా వెళ్లి పోదామా అని ఎదురుచూస్తున్న శ్యామ్ (రాగ్ మయూర్) కి తండ్రి బలవంతంగా గవర్నమెంట్ ఎగ్జామ్స్ రాస్తారు. దాంతో 'సివరపల్లి' అనే తెలంగాణా లోని ఓ మారు మూల పల్లెలో పంచాయతీ సెక్రటరీగా జాబ్ వస్తుంది. తన ఫ్రెండ్స్ అంతా ఫారిన్ వెళ్లి సెటిల్ అవుతుంటే, తాను పల్లెటూరు వెళ్లవలసి రావడం శ్యామ్ కు బాధ కలిగించినా తప్పక ఆ జాబ్ లో జాయిన్ అవుతాడు.

ఆ పల్లెకు పేరుకు సుశీల (రూప లక్ష్మి)సర్పంచ్ అయినా ఆమె భర్త సుధాకర్ ( మురళీధర్ గౌడ్) దే మొత్తం పెత్తనం. అయితే సుధాకర్ సరదా మనిషి, కలుపుగోలు మనిషి కావటంతో శ్యామ్ ఇబ్బందిగా అనిపించినా అడ్జెస్ట్ అవుతాడు. కానీ ఎలాగైనా అమెరికా వెళ్లాలని Gmat కి అక్కడే రాత్రింబవళ్ళూ ప్రిపేర్ అవుతుంటాడు. మరో ప్రక్క అక్కడ ఎవరూ భాధ్యతగా ఉండకపోవటం, ప్రతీ విషయం లైట్ గా తీసుకోవడం ఇబ్బందిగా అవుతుంటుంది. అలాగే అతని మంచితనాన్ని కొంతమంది లోకల్ జనం లోకువ కట్టి అతన్ని వాడుకునే ప్రయత్నం చేస్తుంటాడు. మరో ప్రక్క అసిస్టెంట్ నరేష్ కూడా కొత్త తల నొప్పులు తెస్తుంటాడు. అయినా ఎడ్జెస్ట్ అవుతూ మంచి పనులు చేస్తూ ,మంచి పేరు తెచ్చుకుంటాడు.

ఇదిగా ఉండగా సర్పంచ్ భర్త కు ఓ ఆలోచన వస్తుంది. తన ఏకైక కుమార్తె అను ని రేపో మాపో అమెరికా వెళ్లే శ్యామ్ కు ఇచ్చి చేస్తే ఎలా ఉంటుందా అని. అయితే సర్పంచ్ కు అది ఇష్టం ఉండదు. తన కుమార్తెను చిన్న పంచాయతీ గుమాస్తా కి ఇచ్చి చేయడం ఏమిటని అంటుంది. అమెరికా నిజంగా వెళ్తే అప్పుడు చూద్దామంటుంది. ఇంతకీ శ్యామ్ అమెరికా వెళ్లగలిగాడా. సర్పంచ్ తన కుమార్తె ను శ్యామ్ ఇద్దామనే ఆలోచన నిజ రూపం దాల్చిందా వంటి విషయాలు తెలియాలంటే వెబ్ సీరిస్ పూర్తిగా చూడాల్సిందే.

ఎలా ఉంది

ఈ వెబ్ సీరిస్ లో చెప్పుకోదగ్గ కథ ఉండదు. కానీ చక్కని ఫన్ తో కూడిన సంఘటనలు ఉన్నాయి. హిందీ నుంచి ఎడాప్ట్ చేసినా నేటివిటీ ని ఎక్కడా మిస్ కాలేదు. పంచాయతీ ఆఫీస్ చుట్టూ కొద్దిపాటి లిమిటెడ్ పాత్రలతో చేసిన ఈ సీరిస్ చాలా ఇంట్రెస్టింగ్ గా ఉంటుంది. పల్లె ప్రజల అమాయకత్వం, మంచితనం, తెలిసి తెలియక ఎదుటివారిని ఇబ్బంది పెట్టడం వంటివి మనకు నచ్చుతాయి. అలాంటి పాత్రలను మనం బయట కూడా నిజ జీవితంలో చూస్తూంటాం కాబట్టి లీనమై చూస్తూంటాం.

ముఖ్యంగా నార్త్ లోని ఓ మారు మూల పల్లెని తీసుకొచ్చి తెలంగాణ నేపథ్యంలోని ఒక ఊరు .. తెలంగాణ యాస .. స్వభావాలతో రీప్లేస్ చేసి ప్రెజెంట్ చేసిన విధానం ప్రతి ఒక్కరికీ కనెక్ట్ అవుతుంది. డైలాగులు కూడా చాలా సహజంగా కుదిరాయి. అయితే పవన్ కళ్యాణ్ కొడుకు వంటివి కాస్తంత పంటి కింద రాయిలా మారాయి. ఒక్క సారిగా లీనమై చూస్తున్న వెబ్ సీరిస్ లోంచి బయటకు తీసుకువచ్చేసాయి. డైరెక్టర్ భాస్కర్ మౌర్య ..డీసెంట్ గా కథనం & నటీనటుల పెర్ఫార్మెన్స్ లు బాగా తీసుకుని నిండుతనం తెచ్చారు.

ఎవరెలా చేశారు..

ఈ సీరియల్ కు హైలెట్ సర్పంచ్ గా మురళీధర్ గౌడ్ కామెడీ. చాలా అమాయికత్వం,గడుసుతనం కలగలిపిన పాత్రను అలవోకగా పండించారు. ఇక పంచాయతీ సెక్రటరీ గా రాగ్ మయూర్ .. ఈ జనరేషన్ యువకుడుగా , పైకి కొన్ని చెప్పలేక, ఎవరినీ కాదనలేక చేసే పనులు, ఎక్సప్రెషన్స్ తో నెక్స్ట్ లెవిల్ కు వెళ్లారు. ఇక ఉప సర్పంచ్ గా ఉదయ్ గుర్రాల .అయితే ఎప్పుడూ ఏదో ఒకటి తింటూ, తాగుతూ తిరుగుతూ పాత్రని సజీవంగా మన ముందు నిలిపారు. సర్పంచ్ .. ఆయన భార్య పాత్రలో రూపలక్ష్మి ... పంచాయతీ సెక్రటరీకి అసిస్టెంట్ గా సన్నీ పల్లె తమ పాత్రలకు పూర్తి న్యాయం చేశారు.

ఇక వాసు పెండెం కెమెరా వర్క్...గ్రామాన్ని సజీవంగా మన ముందు నిలిపింది. సింజిత్ ఎర్రమిల్లి బ్యాక్ గ్రౌండ్ స్కోర్ ఈ సిరీస్ కి హైలైట్. సాయిమురళి ఎడిటింగ్ ల్యాగ్ లు లేకుండా నీట్ గా అనిపిస్తుంది. డైలాగులు బాగున్నాయి.

చూడచ్చా

ఫ్యామిలీలతో కలిసి నవ్వుకుంటూ ఎంజాయ్ చేస్తూ చూడదగ్గ సీరిస్ ఇది. హిందీ వెర్షన్ “పంచాయతీ” చూసినా బాగా నచ్చుతుంది.

ఎక్కడుంది

అమెజాన్ ప్రైమ్ లో తెలుగు లో ఉంది.