చిన్న పార్టీలే బీజేపీని గెలిపిస్తాయా? యూపీలో ఏం జరుగబోతుంది?

ఈ ఏడాది ప్రారంభంలో అయోధ్యలో రామ మందిర ప్రతిష్ఠాపన వేడుకకు వచ్చిన ప్రజాదరణను ఉపయోగించుకునేందుకు, ఉత్తరప్రదేశ్‌లో ఎన్‌డిఎ ఎన్నికల ప్రచారాన్ని ప్రారంభించడానికి ప్రధాని నరేంద్ర మోడీ ఆదివారం మీరట్‌లో బహిరంగ సభను నిర్వహించనున్నారు. 90 వ దశకంలో దూరదర్శన్ లో ప్రసారమైన టెలివిజన్ ధారావాహిక రామాయణంలో రాముడి పాత్ర పోషించిన నటుడు అరుణ్ గోవిల్‌ను ఇక్కడి నుంచి కమలదళంలో బరిలోకి దింపింది. అందుకే దేశ వ్యాప్తంగా ప్రజల దృష్టి దీని మీదకు మళ్లింది. ఈ ఏడాది జనవరిలో అయోధ్యలో జరిగిన రామ మందిర ప్రతిష్ఠాపన కార్యక్రమంలో గోవిల్ కూడా ఉన్నాడు.

పశ్చిమ ఉత్తరప్రదేశ్‌లో కొనసాగుతున్న రైతు నిరసన సవాలును అధిగమించడానికి మోదీతో పాటు రామ మందిరానికి ఆదరణ లభిస్తుందని బిజెపి సీనియర్ అధికారులు భావిస్తున్నారు.

“ప్రధాన మంత్రి కోసం నిర్వహించబడే అనేక బహిరంగ సభలలో ఇదే మొదటిది. పశ్చిమ ఉత్తరప్రదేశ్‌లోని మొత్తం ప్రాంతాన్ని 4-5 నియోజకవర్గాలతో కూడిన లోక్‌సభ స్థానాలతో కూడిన చిన్న సమూహాలుగా విభజిస్తున్నాము, ”అని మీరట్‌లో బహిరంగ సభ కోసం మీడియా ప్రతినిధి, ఇన్‌ఛార్జ్ గజేంద్ర శర్మ ఫెడరల్‌తో అన్నారు.

నిరసన తెలుపుతున్న రైతు సంఘాలతో చర్చలు ప్రారంభించడానికి ఆర్‌ఎల్‌డి నాయకత్వం బిజెపి పై ఒత్తిడి చేస్తుండగా, బిజెపి నాయకత్వం డిమాండ్‌ను స్ట్రీమ్-రోల్ చేసింది. అయోధ్యలో రామ మందిర నిర్మాణం, ప్రధాని మోదీకి ఉన్న ప్రజాదరణ ఈ సవాలును అధిగమించేందుకు సహాయపడతాయని పార్టీ విశ్వసిస్తోంది.

ఆర్‌ఎల్‌డీ కూడా ఈ ఎన్నికల్లో పార్టీ విజయంపై ధీమాగా ఉంది. రైతు నిరసనకు సంబంధించి, లోక్‌సభ ఎన్నికల తర్వాత రైతుల డిమాండ్‌లను అంగీకరించేలా బిజెపి నాయకత్వాన్ని ఒప్పించగలమని RLD నాయకులు భావిస్తున్నారు.

“మేము ఇంతకుముందు ఇండి కూటమిలో భాగమయ్యాము. తరువాత జరిగిన పరిణామాలతో మేము ఎన్‌డిఎలో సభ్యులమయ్యాము. ఎందుకంటే బిజెపితో పొత్తు అంటే ఎన్నికల్లో విజయం 100 శాతం గ్యారెంటీ. ఎన్నికల తర్వాత రైతుల డిమాండ్లను అంగీకరించేలా ఆర్‌ఎల్‌డి నాయకత్వం బిజెపిని ఒప్పించగలదని మేము కచ్చితంగా అనుకుంటున్నాము. మా నాయకుడు జయంత్ సింగ్ ఇప్పటికే బీజేపీ నాయకత్వంతో దీని గురించి మాట్లాడుతున్నారు” అని RLD సీనియర్ నాయకుడు, పార్టీ జాతీయ అధికార ప్రతినిధి మహమ్మద్ ఇస్లాం ది ఫెడరల్‌తో అన్నారు. 2009 సార్వత్రిక ఎన్నికల నుంచి ఇప్పటి వరకు ఒక్క లోక్‌సభ సీటు కూడా గెలవకపోవడంతో ఆర్‌ఎల్‌డీ నేతల్లో నైరాశ్యం నెలకొంది.

సమాజ్‌వాదీ పార్టీ అధినేత అఖిలేష్ యాదవ్ ఆర్‌ఎల్‌డికి ఎనిమిది లోక్‌సభ స్థానాలను ఆఫర్ చేసినప్పటికీ, ఎన్‌డిఎతో కలిసి గెలిచే అవకాశాలు మెరుగ్గా ఉన్నాయని ఆ పార్టీ భావించినందున బిజెపి ఆఫర్ చేసిన రెండు సీట్లను తీసుకోవడానికి జయంత్ సింగ్ అంగీకరించారు.

ఉత్తరప్రదేశ్‌లోని 80 లోక్‌సభ స్థానాల్లో అత్యధికంగా పోటీ చేయాలనే యోచనతో ముందుకు సాగుతున్న బీజేపీ సీనియర్ నేతలు, బీజేపీ 75 నియోజకవర్గాల్లో పోటీ చేస్తుందని చిన్న కూటమి భాగస్వాములను ఒప్పించేందుకు ప్రయత్నిస్తున్నారు. బీజేపీ నాయకత్వం ఇప్పటికే 64 నియోజకవర్గాలకు అభ్యర్థుల పేర్లను ప్రకటించింది. కనీసం 11 నియోజకవర్గాలకు అభ్యర్థులను ప్రకటించాలని యోచిస్తోంది. ఇదే విషయాన్నిఅప్నా దళ్ (సోనేలాల్), సుహెల్‌దేవ్ భారతీయ సమాజ్ పార్టీ (ఎస్‌బిఎస్‌జె) చీఫ్ ఓం ప్రకాష్ రాజ్‌భర్‌లకు స్పష్టంగా చెప్పారు. వీరికి చెరో సీటు కేటాయించే అవకాశం ఉంది.

“సీట్ల భాగస్వామ్య చర్చలు జరుగుతున్నాయి, తుది ఫలితం త్వరలో ప్రకటిస్తారు. మేము 3-4 లోక్‌సభ స్థానాలను డిమాండ్ చేసాము, ఎందుకంటే గత 10 సంవత్సరాలుగా మేము 2 స్థానాలకు పోటీ చేస్తున్నాము. ఇప్పటి వరకు మీర్జాపూర్‌లో ఒక్క సీటుపై మాత్రమే ఒప్పందం కుదిరింది. ఉత్తరప్రదేశ్‌లో బీజేపీకి మేము ఎప్పటి నుంచో జట్టుకడుతున్నాం. చాలామంది వచ్చారు.. వెళ్లారు కానీ మేము బీజేపీతోనే ఉన్నాం”అని అప్నా దళ్ (సోనేలాల్) సీనియర్ నాయకుడు, శాసనసభ సభ్యుడు (ఎమ్మెల్యే) డాక్టర్ సునీల్ పటేల్ ది ఫెడరల్‌తో అన్నారు.

తూర్పు ఉత్తరప్రదేశ్‌లో కనీసం మూడు లోక్‌సభ స్థానాల్లో పోటీ చేయాలని డిమాండ్ చేసిన ఓం ప్రకాష్ రాజ్‌భర్‌ పరిస్థితి భిన్నంగా లేదు. అయితే, బీజేపీ నాయకత్వం ఆయనకు 1 లోక్‌సభ నియోజకవర్గాన్ని మాత్రమే ఇచ్చేందుకు సిద్ధంగా ఉంది. ఎన్‌డిఎ సభ్యులను సంతృప్తి పరచడానికి రాజీ పడి, ఈ నెల ప్రారంభంలో ఉత్తరప్రదేశ్ ప్రభుత్వంలో రాజ్‌భర్‌కు మంత్రి పదవి లభించింది.

చిన్న పార్టీలు తమ ఎన్నికల, రాజకీయ ఔచిత్యం కోసం బిజెపిపై ఆధారపడి ఉన్నాయని రాజకీయ విశ్లేషకులు భావిస్తున్నారు. చాలా కూటమి భాగస్వాములు లోక్‌సభ విజయం కోసం బిజెపి నాయకత్వంపై ఆధారపడతారు.

"దీనిని సౌలభ్య కూటమి అనవచ్చు. ఎన్‌డిఎ సభ్యులు సామాజిక లేదా ఎన్నికల ప్రాతిపదికన సహజ మిత్రులు అని కాదు, బిజెపితో కలిసి ఉంటే గెలవడానికి ఎక్కువ అవకాశాలు ఉన్నాయని చాలా పార్టీలు భావిస్తున్నందున వారు కలిసి వచ్చారు. చాలా ప్రాంతీయ పార్టీలు తమ ఎన్నికల పనితీరు కోసం బిజెపిపై ఆధారపడి ఉన్నాయి, ఎందుకంటే అవి సొంతంగా గెలవలేవు, కాబట్టి వారు బిజెపిని గెలిపించడానికి ప్రయత్నిస్తున్నారు, ”అని పంజాబ్ విశ్వవిద్యాలయ రాజనీతి శాస్త్ర విభాగం అశుతోష్ కుమార్ ఫెడరల్ తో చెప్పారు