ల్యాండ్ టైట్లింగ్ యాక్ట్ రద్దు.. అసెంబ్లీలో ఆమోదం

ఆంధ్రప్రదేశ్ అసెంబ్లీ సమావేశాల్లో ఈరోజు పలు కీలక బిల్లులపై వాడివేడిగా చర్చలు జరిగాయి. వాటిలో ల్యాండ్ టైట్లింగ్ యాక్ట్ ప్రధానంగా మారింది. ఈ చట్టం అమలు జరిగినప్పటి నుంచే రాష్ట్రవ్యాప్తంగా దీనిపై వ్యతిరేకత వస్తూనే ఉంది. అదే క్రమంలో ఎన్నికల సమయంలో కూడా చంద్రబాబు నాయుడు.. కూటమి ప్రభుత్వం వస్తే ఈ చట్టాన్ని రద్దు చేస్తామని ప్రకటించారు. చెప్పినట్లే సీఎంగా బాధ్యతలు తీసుకున్న తర్వాత చేసిన తొలి ఐదు సంతకాల్ల ల్యాండ్ టైట్లింగ్ యాక్ట్ రద్దు కూడా ఉంది. తాజాగా ఈ చట్టం రద్దు అంశంపై అసెంబ్లీలో చర్చలు జరిగాయి. ఈ చట్టం వల్లే మేలు కన్నా కీడే ఎక్కువ జరిగేలా ఉందని కూటమి నేతలు పేర్కొన్నారు. రెవెన్యూ శాఖ మంత్రి అనగిని సత్యప్రసాద్ కూడా ఇదే అంశాన్ని పునరుద్ఘాటించారు. ఈ చట్టం లేని సమస్యలను సృష్టించేలా ఉందంటూ చర్చను ప్రారంభించారు.

ఈ చట్టం ఉద్దేశం అదేనా!

‘‘ల్యాండ్ టైట్లింగ్ చట్టం వల్లే రాష్ట్రంలోని భూ వివాదాల సంఖ్య గణనీయంగా పెరిగేలా ఉంది. ఈ చట్టం ఉన్న భూ సమస్యలను పరిష్కరించేలా కాకుండా లేని సమస్యలను పుట్టించేలా ఉంది. యజమానులకు తమ భూములపై వారికే హక్కు లేకుండా చేయడమే ఈ చట్టం ఉద్దేశంగా కనబడుతోంది. ఈ చట్టం కారణంగా మరిన్ని భూవివాదాలు వచ్చేలా ఉన్నాయి. పేదల రైతులకు ఇబ్బంది వస్తే దాన్ని పరిష్కరించుకోవడానికి హైకోర్టుకు వెళ్లాలంటే ఎలా? చిన్నపాటి వివాదాలు తలెత్తితే వాటి కోసం లాయర్లకు ఫీజులు ఎక్క ధారపోస్తారు’’ అని అనగాని సత్యప్రసాద్ వ్యాఖ్యానించారు. ఆతర్వాత ఈ చట్టంపై ముఖ్యమంత్రి నారా చంద్రబాబు నాయుడు కూడా ఘాటు వ్యాఖ్యలే చేశారు.

ఇదో భయంకరమైన చట్టం: సీఎం

‘‘ల్యాండ్ టైట్లింగ్ యాక్ట్ అనేదో భయంకరమైన చట్టం. గత ప్రభుత్వం ఏమాత్రం ఆలోచన చేయకుండా ఈ చట్టాన్ని తీసుకొచ్చింది. దీని వల్ల అనేక భూ సమస్యలు తలెత్తాయి. పరజలను చైతన్యవంతులను చేస్తే న్యాయవాదులు ఎక్కడికక్కడ ఆందోళన చేపట్టారు. ఈ చట్టం వచ్చి ఉంటే పౌరుల ఆస్తి హక్కును మింగేసే పరిస్థితి తలెత్తేది. ఈ చట్టం కలిగే లాభం శూన్యం. ప్రజలకు ముప్పుతిప్పలు పెట్టడానికే ఈ చట్టాన్ని తెచ్చారు’’ అని మండిపడ్డారు చంద్రబాబు. తమ భూ కబ్జాలకు ఎటువంటి అడ్డూ ఉండకూడదన్న ఉద్దేశంతోనే ఈ చట్టాన్ని తీసుకురావడానికి గత ప్రభుత్వం యత్నించిందని విమర్శించారు.

బిల్లు రద్దుకు ఆమోదం

ల్యాండ్ టైట్లింగ్ యాక్ట్ రద్దు బిల్లుపై పూర్తిగా చర్చలు జరిగిన తర్వాత ఈ బిల్లుకు ఆమోద ముద్ర వేస్తున్నట్లు అసెంబ్లీ స్పీకర్ అయ్యన్నపాత్రుడు వెల్లడించారు. దీంతో పాటుగా హెల్త్ యూనివర్సిటీకి ఎన్‌టీఆర్ పునరుద్దరణకు కూడా శాసనసభ ఆమోదం తెలిపింది. ఈ రెండు బిల్లులపై సభలో సభ్యులు మాట్లాడిన అనంతరం బిల్లులకు సభ ఆమోదం తెలిపింది.