ఆక్వా రంగంపై అమెరికా సుంకాల ఎఫెక్ట్

2025 ఏప్రిల్ 2 నుంచి భారత్‌తో సహా వివిధ దేశాల నుంచి దిగుమతి అయ్యే ఉత్పత్తులపై ప్రతీకార సుంకాలు (reciprocal tariffs) విధించాలని ట్రంప్ ప్రకటించారు. ఈ నిర్ణయం భారతదేశ ఎగుమతులపై తీవ్ర ప్రభావం చూపుతోంది.

బయ్యర్లకు రైతులు టార్గెట్ అవుతున్నారు...

ఏ వస్తువైనా ధరలు పెరిగినప్పుడు వినియోగ దారునిపై ఆ భారం పడుతుంది. కానీ రొయ్యల రైతులపై వెనువెంటనే పడటం భారంగా మారుతోందని ఏపీ రొయ్యల రైతుల అసోసియేషన్ కార్యదర్శి గాజురాజు వెంకట సుబ్బరాజు ‘ది ఫెడరల్ ఆంధ్రప్రదేశ్’ ప్రతినిధితో అన్నారు. శనివారం ఆయన మాట్లాడుతూ అమెరికా అధ్యక్షుడు ట్రంప్ భారత దేశ ఎగుమతులపై సుంకాలు పెంచిన ప్రభావం ఆక్వా రైతులను తాకిందన్నారు. చెరువు నుంచి రొయ్యలు తీసిన గంటలోపు విక్రయించాలి. అలా చేయకుంటే రొయ్యలు పనికిరాకుండా పోతాయి. దీనిని వ్యాపారులు అలుసుకుగా తీసుకుని రొయ్యల రైతుల జీవితాలతో ఆడుకుంటున్నారన్నారు.

అమెరికాలో ట్రంప్ ప్రకటన వెలువడగానే తమ వద్ద నుంచి రొయ్యలు కొనుగోలు చేసే ప్రాసెసింగ్ యూనిట్ల వారు కేజీకి రూ. 40లు ధర తగ్గించారన్నారు. అమెరికాకు 50, 30, 20 కౌంట్ రొయ్యలు ఎగుమతి అవుతాయని, ఈ రొయ్యలు మంచి రేటు వస్తాయన్నారు. ప్రధానంగా వెన్నామి రొయ్యలు ఎగుమతి చేస్తున్నట్లు తెలిపారు. దేశ వ్యాప్తంగా ఎగుమతి అయ్యే రొయ్యల్లో 80 శాతం ఆంధ్రప్రదేశ్ నుంచే ఉంటాయన్నారు.

ప్రధాన మంత్రికి మెమోరాండం

రొయ్యల రైతులపై అమెరికా సుంకాల ప్రభావం విషయాన్ని ప్రధాన మంత్రి నరేంద్ర మోదీ దృష్టికి తీసుకెళ్లినట్లు రొయ్యల రైతుల సమాఖ్య జాతీయ అధ్యక్షులు ఇందుకూరి ప్రసాదరాజు మోహన్ రాజు ది ఫెడరల్ ఆంధ్రప్రదేశ్ కు తెలిపారు. ఆయన మాట్లాడుతూ శనివారం మద్యాహ్నం ప్రధాన మంత్రి కార్యాలయ మెయిల్ కు అర్జీ పంపించామన్నారు. రైతులు పడుతున్న ఇబ్బందులు, సుంకం ప్రభావం, ప్రభుత్వం ఆదుకోవాల్సిన పరిస్థితులను అర్జీలో వివరించామని చెప్పారు. ఈ మేరకు ఒక మెమోరాండం సమర్పిస్తామన్నారు.

ఆంధ్రప్రదేశ్ రొయ్యల ఎగుమతులపై సుంకాల ప్రభావం

ఆంధ్రప్రదేశ్ భారతదేశంలో రొయ్యల ఉత్పత్తి, ఎగుమతిలో అగ్రస్థానంలో ఉంది. అమెరికా ఆంధ్రప్రదేశ్ రొయ్యలకు ప్రధాన మార్కెట్‌గా ఉంది. 2024లో అమెరికాకు రొయ్యల ఎగుమతుల విలువ $2.58 బిలియన్లుగా నమోదైంది. ట్రంప్ ప్రకటించిన 26-27 శాతం సుంకాలు రొయ్యల ఎగుమతులపై కూడా వర్తిస్తాయి. ఈ సుంకాలు అమల్లోకి వచ్చిన తర్వాత, అమెరికా మార్కెట్‌లో రొయ్యల ధరలు పెరిగి డిమాండ్ తగ్గే అవకాశం ఉంది.

ఉమ్మడి ఉభయ గోదావరి జిల్లాల్లో రొయ్యల సాగు

ఆంధ్రప్రదేశ్‌లోని ఉమ్మడి పశ్చిమ గోదావరి, తూర్పు గోదావరి జిల్లాలు రొయ్యల సాగులో కీలక పాత్ర పోషిస్తాయి. ఈ జిల్లాల్లో సుమారు 1.20 లక్షల ఎకరాల్లో రొయ్యల సాగు జరుగుతోంది. ఏటా ఉత్పత్తి సామర్థ్యం 4 లక్షల టన్నులుగా ఉండగా, దీనిలో 3.5 లక్షల టన్నులు విదేశాలకు ఎగుమతి అవుతున్నాయి. ఈ ఎగుమతుల విలువ సుమారు రూ. 18,000 కోట్లుగా ఉంది.

రోజుకు అమెరికాకు ఎగుమతి

సగటున ఏటా 3.5 లక్షల టన్నుల రొయ్యలు ఎగుమతి అవుతుంటే, రోజుకు సుమారు 950 నుంచి 1,000 టన్నుల రొయ్యలు విదేశాలకు (ప్రధానంగా అమెరికాకు) రవాణా అవుతున్నట్లు అంచనా. ఈ ఎగుమతుల్లో అమెరికా వాటా అత్యధికంగా ఉంది.

రూ. 30-40 వరకు పడిపోయిన ధరలు

ట్రంప్ సుంకాల ప్రకటన తర్వాత అమెరికా కొనుగోలు దారులు రొయ్యల ధరలను తగ్గించేందుకు ఒత్తిడి చేస్తున్నారు. ఫలితంగా ఉమ్మడి గోదావరి జిల్లాల్లో కిలో రొయ్య ధర రూ. 30-40 వరకు పడిపోయినట్లు వార్తలు వచ్చాయి. ఇది నిజమేనని స్థానిక వ్యాపారులు చెబుతున్నారు. సుంకాల వల్ల ఎగుమతి ఆదాయం తగ్గడం, ట్రేడర్లు కొనుగోళ్లకు ముందుకు రాకపోవడం వంటి కారణాలతో ధరలు పతనమవుతున్నాయి.

ఏపీ మత్స్యశాఖ అధికారుల స్పందన

ఆంధ్రప్రదేశ్ మత్స్యశాఖ అధికారులు ఈ పరిస్థితిని సీరియస్‌గా పరిగణిస్తున్నారు. వారి ప్రాథమిక విశ్లేషణ ప్రకారం సుంకాల వల్ల రొయ్యల ఎగుమతులు తగ్గితే సాగుదారులు తీవ్ర నష్టాలను ఎదుర్కోవాల్సి వస్తుంది. అధికారులు కేంద్ర ప్రభుత్వంతో చర్చలు జరిపి అమెరికాతో ద్వైపాక్షిక ఒప్పందాల ద్వారా సుంకాలను తగ్గించే ప్రయత్నం చేస్తామని చెబుతున్నారు.

రాష్ట్ర ప్రభుత్వ స్పందన

ఆంధ్రప్రదేశ్ ప్రభుత్వం ఈ సమస్యపై ఇంకా అధికారిక ప్రకటన విడుదల చేయలేదు. అయితే రాష్ట్రంలో రొయ్యల సాగు ఆర్థిక వ్యవస్థకు కీలకమని గుర్తించి, కేంద్రంతో కలిసి పరిష్కార మార్గాలను అన్వేషిస్తున్నట్లు సమాచారం. సాగుదారులకు ఆర్థిక సాయం లేదా ప్రత్యామ్నాయ మార్కెట్లను చూపే దిశగా చర్యలు తీసుకునే అవకాశం ఉంది.

ఇతర జిల్లాల్లో రొయ్యల సాగుపై ప్రభావం

ఆంధ్రప్రదేశ్‌లో రొయ్యల సాగు ప్రధానంగా ఉమ్మడి గోదావరి జిల్లాల్లో కేంద్రీకృతమై ఉన్నప్పటికీ, కృష్ణా, గుంటూరు, నెల్లూరు, శ్రీకాకుళం వంటి జిల్లాల్లో కూడా గణనీయమైన సాగు జరుగుతుంది. ఈ జిల్లాల నుంచి కూడా అమెరికాకు ఎగుమతులు ఉండటంతో ట్రంప్ సుంకాల ప్రభావం రాష్ట్రవ్యాప్తంగా కనిపిస్తుంది. అయితే ఉమ్మడి గోదావరి జిల్లాలతో పోలిస్తే ఇతర జిల్లాల్లో ప్రభావం తక్కువగా ఉండొచ్చు. ఎందుకంటే వాటి ఉత్పత్తి సామర్థ్యం తక్కువ.

భారత్‌లో రొయ్యల మార్కెట్ ధరలు

ఎగుమతి సుంకాలు పెరగడం వల్ల భారత్‌లోనే రొయ్యలను అమ్మడం ఒక ప్రత్యామ్నాయంగా కనిపిస్తుంది. అయితే దేశీయ మార్కెట్‌లో రొయ్యలకు డిమాండ్ పరిమితంగా ఉంది. ప్రస్తుతం స్థానిక మార్కెట్‌లో కిలో రొయ్య ధర రూ. 200-300 మధ్య ఉంది. కానీ ఎగుమతి కోసం పండించే రొయ్యలు (30, 40 కౌంట్‌లు) అధిక నాణ్యతతో ఉంటాయి. కాబట్టి వీటిని స్థానికంగా అమ్మాలంటే ధరలు తగ్గించాల్సి వస్తుంది. ఇది సాగుదారులకు లాభదాయకం కాకపోవచ్చు.

రొయ్యల సాగుదారుల పరిస్థితి

ట్రంప్ సుంకాల వల్ల రొయ్యల సాగుదారులు ఆర్థిక సంక్షోభంలో పడే అవకాశం ఉంది. ధరలు పడిపోవడం, ఎగుమతులు తగ్గడం వల్ల పెట్టుబడి ఖర్చులను భరించలేని పరిస్థితి ఏర్పడొచ్చు. ఇప్పటికే వ్యాధులు, పెరిగిన ఉత్పత్తి ఖర్చులతో సతమతమవుతున్న సాగుదారులకు ఈ సుంకాలు మరింత భారం కావొచ్చు. దీని ప్రభావం కూలీల ఉపాధిపై కూడా పడే అవకాశం ఉంది.

విదేశీ సుంకాలపై ట్రంప్ ప్రభావం

ట్రంప్ తన "అమెరికా ఫస్ట్" విధానంలో భాగంగా భారత్ సహా అనేక దేశాలు అమెరికా ఉత్పత్తులపై అధిక సుంకాలు విధిస్తున్నాయని, దానికి ప్రతీకారంగా ఇప్పుడు అమెరికా కూడా భారత ఉత్పత్తులపై సుంకాలు పెంచుతుందని ప్రకటించారు. ఈ సుంకాలు 2025 ఏప్రిల్ 2 నుంచి అమల్లోకి వచ్చాయి. భారత్ నుంచి దిగుమతి అయ్యే వస్తువులపై సుమారు 26 నుంచి 27 శాతం సుంకాలు విధించారు. ఈ చర్య వల్ల అమెరికా మార్కెట్‌లో భారత ఉత్పత్తుల ధరలు పెరిగి వాటి పోటీతత్వం తగ్గే ప్రమాదం ఉంది.