ఆ ముగ్గురి పీఎస్‌ల సస్పెన్షన్ లను పొడిగించారు

ఇదిలా ఉంటే మరో సీనియర్‌ అధికారి పీవీ సునీల్‌ కుమార్‌ మీద కూడా దృష్టి పెట్టింది. జగన్‌ ప్రభుత్వ హయాంలో సీఐడీ చీఫ్‌గా పని చేసిన పీవీ సునీల్‌ కుమార్‌ను కూటమి ప్రభుత్వం సస్పెండ్‌ చేసింది. నాటి నరసాపురం ఎంపీ, ప్రస్తుత ఆంధ్రప్రదేశ్‌ అసెంబ్లీ డిప్యూటీ స్పీకర్‌ రఘురామకృష్ణరాజు హత్యాయత్నం కేసులో తనను అరెస్టు చేసే సమయంలోను, విచారణ సమయంలోను తన పట్ల సునీల్‌ కుమార్‌ కీలక పాత్ర పోషించారని గుంటూరు నగరపాలెం పోలీసు స్టేషన్‌లో రఘురామకృష్ణరాజు ఫిర్యాదు చేశారు. ఈ మేరకు పోలీసులు సునీల్‌కుమార్‌ మీద కేసు నమోదు చేశారు.

దీంతో పాటుగా డీజీ ఫైర్‌ సర్వీసెస్‌లో కూడా అక్రమాలకు పాల్పడ్డారని సునీల్‌ కుమార్‌ మీద కేసు నమోదు చేశారు. అంతేకాకుండా అఖిల భారత సర్వీసు నిబంధనలను ఉల్లంఘించారని, అనుమతులు లేకుండా విదేశాల పర్యటనలకు వెళ్లారని దీనిని నిగ్గు తేల్చాని ప్రభుత్వ ప్రత్యేక ప్రధాన కార్యదర్శి హోదాలో ఉన్న సీనియర్‌ ఐఏఎస్‌ అధికారి ఆర్‌పీ సిసోడియా నేతృత్వంలో ఓ కమిటీని ఏర్పాటు చేశారు. అఖిల భారత సర్వీసు నిబంధలకు విరుద్ధంగా పీవీ సునీల్‌ కుమార్‌ వ్యవహరించారని తేల్చింది. ఆ మేరకు ప్రభుత్వానికి నివేదికను సమర్పించింది. ఆ నివేదిక ఆధారంగా పీవీ సునీల్‌ కుమార్‌ను సస్పెండ్‌ చేస్తున్నట్లు ప్రభుత్వం వెల్లడించింది. ఈ నలుగురు ఐపీఎస్‌ అధికారులు వైఎస్‌ఆర్‌సీపీ ప్రభుత్వ హయాంలో జగన్‌కు అనుకూలంగా పని చేశారని, చంద్రబాబు, లోకేష్‌తో పాటు ఇతర టీడీపీ శ్రేణులను ఇబ్బందులకు గురి చేసిందనే కారణంతో కూడా వీరి మీద కూటమి ప్రభుత్వం కక్ష కట్టిందనే వాదన కూడా పోలీసు వర్గాల్లో వినిపిస్తోంది. ఈ నేపథ్యంలోనే పీ సీతారామాంజనేయులు, పీవీ సునీల్‌కుమార్, కాంతి రాణా టాటా, విశాల్‌ గున్నీలను సస్పెండ్‌ చేసిందనే చర్చ కూడా పోలీసు వర్గాల్లో వినిపిస్తోంది.