ప్రయాణిస్తున్న ఆర్టీసి బస్సులోనే యువకుడు ఉరి

ఏపీఎస్‌ఆర్టీసి బస్సులో గమ్య స్థానానికి చేరక ముందే బతుకు ప్రయాణాన్ని ముగించేశాడు ఓ యువకుడు. గుండెలను పిండేస్తున్న ఈ ఘటన తిరుపతి జిల్లా ఏర్పేడు సమీపంలో ఆదివారం తెల్లవారు జామున చోటు చేసుకుంది. శ్రీకాళహస్తి మార్గంలో వెళ్లే ఆర్డినరి ఆర్టీసి బస్సులో మేర్లపాక స్టేజీ వద్ద ఆదివారం తెల్లవారు జామున ఓ యువకుడు ఎక్కాడు. ఆ బస్సులో ముగ్గురు ప్రయాణికులు మాత్రమే ఉన్నారు. వారంతా ముందు సీట్లల్లో కూర్చుని ఉన్నారు. వెనుక సీట్లో కూర్చున్న ఆ యువకుడు ఎప్పుడు ఉరి వేసుకున్నాడనేది ఎవరు గుర్తించ లేదు. ఏర్పేడు సమీపానికి వచ్చే సరికి ఆ యువకుడు ఉరి వేసుకున్నట్టు బస్సు కండక్టర్‌ గుర్తించారు. బస్సులో చివరి సీటు వద్ద ఉన్న హ్యాంగర్‌కు ఉరేసుకొని చనిపోయినట్లు గుర్తించారు. దీంతో ఆర్టీసి సిబ్బంది రేణుగుంట పోలీసులకు సమాచారం అందించారు. కేసు నమోదు చేసుకున్న పోలీసులు దర్యాప్తు చేపట్టారు. మృతి చెందిన యువకుడి పూర్తి వివరాలు తెలియాల్సి ఉంది.