కోఠి కాల్పుల ఘటన.. నిందితుల గుర్తింపు

కోఠి ఏరియాలో కాల్పుల ఘటన స్థానికంగా తీవ్ర కలకలం రేపింది. ఈ కేసులో తాజాగా పోలీసులు కీలక పురోగతి సాధించారు. నిందితులను గుర్తించినట్లు వెల్లడించారు. ప్రస్తుతం వారిని పట్టుకోవడానికి గాలింపులను ముమ్మరం చేసినట్లు వెల్లడించారు. ఈ ఘటన శనివారం ఉదయం కోఠి ప్రాంతంలోని SBI ఏటీఎం వద్ద జరిగింది. డబ్బులు డిపాజిట్ చేయడానికి వెళ్లిన ఓ వ్యక్తిపై దుండగులు రెండు రౌండ్ల కాల్పులు జరిపారు. అనంతరం క్యాష్ బ్యాగుతో అక్కడి నుంచి పారిపోయారు.

కాల్పుల్లో గాయపడిన బాధితుడిని వెంటనే ఆస్పత్రికి తరలించడంతో ఆయన ప్రాణాపాయ స్థితి నుంచి బయటపడ్డాడు. తర్వాత బాధితుడి ఫిర్యాదు మేరకు రూ.6 లక్షల చోరీ జరిగినట్లు పోలీసులు కేసు నమోదు చేశారు. ఘటన తీవ్రతను దృష్టిలో పెట్టుకుని పోలీసులు దర్యాప్తు కోసం ఐదు ప్రత్యేక బృందాలను నియమించారు. నిందితులు బాధితుడి స్కూటీపైనే పారిపోయినట్లు ప్రాథమికంగా గుర్తించారు.

తరువాత వారు కాచిగూడ ప్రాంతం వద్ద ఆ వాహనాన్ని వదిలేసి అక్కడి నుంచి తప్పించుకున్నట్లు పోలీసులు నిర్ధారించారు. దర్యాప్తు కొనసాగుతున్న సమయంలో ప్రత్యేక బృందాలు 800కి పైగా సీసీటీవీ కెమెరాల ఫుటేజ్‌ను పరిశీలించాయి. ఈ క్రమంలో నిందితుల ఆచూకీని గుర్తించగలిగాయి.

నిందితుల్లో ఒకడిని పాత నేరస్తుడిగా పోలీసులు గుర్తించారు. అనంతరం సెల్‌ఫోన్ పవర్ డంపింగ్ విధానం ద్వారా వారి మొబైల్ నెంబర్లను సేకరించారు. ఫోన్ డంపింగ్ అనేది డిజిటల్ ఫోరెన్సిక్స్‌లో ఉపయోగించే ఒక ప్రక్రియగా, మొబైల్‌లోని డేటాను విశ్లేషించి ఆధారాలు సేకరించేందుకు ఇది సహాయపడుతుందని అధికారులు తెలిపారు.

ఈ మొబైల్ నెంబర్ల ఆధారంగా నిందితులను త్వరలోనే పట్టుకుంటామని పోలీసులు చెబుతున్నారు. కేసుపై దర్యాప్తు కొనసాగుతోందని, అరెస్టులపై మరిన్ని వివరాలు త్వరలో వెల్లడయ్యే అవకాశం ఉందని అధికారులు తెలిపారు.