విజువల్ మ్యాజిక్ : ‘ది ఒడిస్సీ’ ట్రైలర్!
గ్రీకు పురాణ కథపై నోలాన్ మార్క్
క్రిస్టోఫర్ నోలాన్ పేరు వినిపిస్తే ఒక సినిమా కాదు, ఒక ప్రయోగం మొదలైనట్టే. టైమ్తో ఆడుకున్నాడు, స్మృతిని ప్రశ్నించాడు, సైన్స్కు భావోద్వేగాన్ని జోడించాడు, చరిత్రను థ్రిల్లర్లా మార్చాడు. ఇప్పుడు మాత్రం ఆ ప్రయోగాల జాబితాలో ఊహించని పదం చేరింది – పురాణం. అది కూడా గ్రీకు పురాణాల్లో అత్యంత పాత, అత్యంత శక్తివంతమైన కథ ‘ది ఒడిస్సీ’. నోలాన్ చేతుల్లో ఈ కథ పడితే అది ఎలా మారుతుంది?
ఏదైనా ప్రయోగం చేయాలంటే ధైర్యం ఒక్కటే సరిపోదు. ఆ ధైర్యానికి వెనుక నిలిచే జ్ఞానం కూడా అవసరం. ఈ రెండూ కలిసే చోటే క్రిస్టోఫర్ నోలాన్ నిలుస్తాడు. అందుకే ఆయన ప్రతి కొత్త సినిమా ముందు అది ఎలా ఉండబోతోందన్న ప్రశ్న కంటే, ఒక ఉత్కంఠే మొదలవుతుంది. ఈసారి ఆ ఉత్కంఠ మరింత గాఢంగా ఉంది. ఎందుకంటే నోలాన్ తన తదుపరి ప్రయోగానికి ఎంచుకున్నది గ్రీకు పురాణాల్లో అత్యంత ప్రసిద్ధమైన కథ ‘ది ఒడిస్సీ’.
మెమెంటోతో స్మృతి, కాల అనుభూతిని నాన్–లీనియర్ కథనంతో తిరగరాసిన నోలాన్, బ్యాట్మాన్తో సూపర్హీరో జానర్కు డార్క్ ఫిలాసఫీని జోడించాడు. ఇన్సెప్షన్తో మనసుల లోతుల్లోకి తీసుకెళ్లాడు. ఇంటర్స్టెల్లార్తో సైన్స్కు భావోద్వేగాన్ని కలిపాడు. డంకిర్క్లో యుద్ధాన్ని ఒక అనుభూతిగా మలిచాడు. టెనెట్తో కాల భావననే ప్రశ్నించాడు. ఓపెన్హైమర్తో చరిత్రను థ్రిల్లర్లా చూపించాడు. ప్రతి సినిమా ఒక కొత్త ప్రయోగమే. ఇప్పుడు ఆ ప్రయోగాల శ్రేణిలోకి ఒక పురాణేతిహాసం చేరింది.
‘ది ఒడిస్సీ’కి సంబంధించిన మొదటి ట్రైలర్ తాజాగా విడుదలైంది. థియేటర్లలో అవతార్: ఫైర్ అండ్ ఆష్ను ఐమ్యాక్స్లో చూసిన ప్రేక్షకులకు ఇప్పటికే ఐదు నిమిషాల ప్రివ్యూ చూపించారు. ఇప్పుడు ఆన్లైన్లో విడుదలైన ట్రైలర్ కూడా అదే స్థాయిలో ఉత్కంఠను పెంచుతోంది. కొన్ని గంటల్లోనే కోటి వ్యూస్ను దాటడం నోలాన్ క్రేజ్ ఏ స్థాయిలో ఉందో చెప్పేస్తోంది. భారతదేశంలో ఆయనకు ఉన్న అభిమానాన్ని దృష్టిలో పెట్టుకుంటే, ఈ ట్రైలర్పై జరుగుతున్న చర్చ పూర్తిగా సహజమే.
ఈ సినిమా హోమర్ రచించిన గ్రీకు పురాణ కావ్యాన్ని ఆధారంగా తీసుకుంది. ట్రోజన్ యుద్ధం ముగిసిన తర్వాత ఇంటికి తిరిగి రావాలనుకునే ఒడిస్సియస్ ప్రయాణమే కథ. మాట్ డామన్ ఈ చిత్రంలో ఒడిస్సియస్ పాత్రలో కనిపించనున్నాడు. యుద్ధం తర్వాత ఇంటికి చేరుకోవాలనుకున్న అతను అనేక ప్రమాదాల్లో చిక్కుకుంటాడు. సంవత్సరాల తరబడి సాగిన ఈ ప్రయాణంలో రాక్షసాలు, వింత జీవులు, భయంకరమైన పోరాటాలు అతన్ని వెంటాడతాయి. మరోవైపు ఇంటి వద్ద అతని కోసం ఎదురుచూస్తున్న కుటుంబం, తండ్రిని ఎలాగైనా తిరిగి తీసుకురావాలని తల్లికి మాటిచ్చే కుమారుడి భావోద్వేగం కూడా కథలో కీలకంగా ఉండబోతోంది.
గ్రీకు పురాణాలు భారతీయ పురాణాలకంటే భిన్నమైనవైనా, వాటిలోని వీరత్వం, త్యాగం, ఒంటరితనం, అన్వేషణ వంటి అంశాలు మనసులను బలంగా తాకుతాయి. ‘ది ఒడిస్సీ’ కూడా కేవలం ఒక వారియర్ డ్రామా కాదు. ఇది ఒక మనిషి ఒంటరితనం, అతని ప్రయాణం, అతని లోపలి పోరాటాల కథ. ఈ అంశాలను నోలాన్ తన సిగ్నేచర్ స్టైల్లో ఎలా ఆవిష్కరిస్తాడన్నదే అసలు ఆసక్తి.
ట్రైలర్ చూస్తే నోలాన్ మార్క్ స్పష్టంగా కనిపిస్తుంది. డార్క్ టోన్, నెమ్మదిగా పెరిగే ఉత్కంఠ, భయంకరమైన విజువల్స్ అన్నీ కలిసి బలమైన ప్రభావాన్ని కలిగిస్తాయి. సముద్రాల్లో, అడవుల్లో జరిగే యుద్ధాలు, రహస్య మాన్స్టర్ల ఉనికి, భీభత్సాన్ని తలపించే సన్నివేశాలు ప్రేక్షకుడిని మైండ్ బ్లాంక్ చేసేలా ఉన్నాయి. ముఖ్యంగా సరుగుడు తోటలో మాన్స్టర్తో హీరో పోరాటానికి సంబంధించిన విజువల్ ట్రైలర్లోనే డిస్టర్బింగ్గా అనిపిస్తుంది.
ఈ సినిమాను పూర్తిగా ఐమ్యాక్స్ కెమెరాలతో చిత్రీకరించడం మరో ప్రధాన ప్రత్యేకత. పెద్ద తెరపై ఈ ప్రపంచాన్ని పూర్తిగా అనుభూతి చేయించాలన్నదే నోలాన్ లక్ష్యంగా కనిపిస్తోంది. ఒక అద్భుతమైన వేరే లోకంలోకి అడుగుపెట్టామా అనే భావన ప్రేక్షకుడికి కలిగేలా విజువల్స్ రూపొందినట్టు ట్రైలర్ స్పష్టం చేస్తోంది.
మాట్ డామన్తో పాటు టామ్ హాలండ్, అన్నే హాతవే, జెండయా, రాబర్ట్ ప్యాటిన్సన్, లుపిటా న్యోంగో, చార్లిజ్ థెరాన్ లాంటి భారీ తారాగణం ఈ చిత్రంలో నటించడం అంచనాలను మరింత పెంచుతోంది. ఒక పురాణ కథను తెరపై చూపించడానికి చాలా మంది దర్శకులు ఉంటారు. కానీ నోలాన్ కోసం, ఆయన సినిమా ఎలా ఉంటుంది అన్న ఉత్కంఠ కోసమే ప్రేక్షకులు థియేటర్లకు వెళ్తారు. కథ మాత్రమే కాదు, ఆ కథను ఆయన ఎలా చెబుతాడో చూడటమే అసలు ఆసక్తి.
ఫైనల్గా చెప్పాలంటే, ‘ది ఒడిస్సీ’ కేవలం మరో పురాణ సినిమా కాదు. ఇది క్రిస్టోఫర్ నోలాన్ ప్రయోగాల ప్రయాణంలో మరో కీలక మలుపు. ఒక రెగ్యులర్ మైథలాజికల్ కథ నోలాన్ చేతుల్లో పడితే అది ఎలా మారుతుందో అన్న క్యూరియాసిటీయే ఈ సినిమాకు అసలైన బలం. మొత్తంగా చూస్తే, ‘ది ఒడిస్సీ’ వచ్చే ఏడాది తప్పక మిస్ చేయకూడని సినిమాటిక్ అనుభవంగా మారబోతోందన్న సంకేతాలు స్పష్టంగా కనిపిస్తున్నాయి. నోలాన్ గత చిత్రాల స్థాయిని ఇది అందుకుంటుందో లేదో తెలుసుకోవాలంటే, జూలై 17, 2026 వరకు వేచి చూడాల్సిందే.