అన్నా.. పులివెందులలో పోటీ చేస్తే ఏమైనా ఇబ్బందా?

కడప నుంచి పులివెందుల వెళుతూ వేంపల్లెలో ఆగి పిసిసి మీడియా ఛైర్మన్‌ తులసిరెడ్డి ఇంటి తలుపుతట్టారు. అనుకోని అతిధులు రావడంతో తులసిరెడ్డి సునీత దంపతులను ఇంట్లోకి పిలిచి మర్యాదలు చేశారు. ఇంటికి వచ్చిన వారిని తులసిరెడ్డి సన్మానించారు. వివేకానంద రెడ్డి కుమార్తె సునీత, నర్రెడ్డి రాజశేఖర్‌ రెడ్డి దాదాపు గంట సేపు తులసిరెడ్డితో ఏకాంతంగా రాజకీయ విషయాలపై చర్చించారు. వివేకానంద రెడ్డి హత్య కేసుకు సంబంధించిన విషయాలు కూడా చర్చించినట్లు సమాచారం. ఎన్నికల ప్రచార సమయంలో వివేకానంద రెడ్డి హత్య జరిగిన తీరుపై ప్రజల్లోకి ఎలా తీసుకెళ్లాలనే వాటిపై కూడా చర్చించినట్లు తెలిసింది. వివేకా కుమార్తె కాంగ్రెస్‌ పార్టీ పట్ల వైపే ఉండే విధంగా చర్చలు సాగాయి. పులివెందుల అసెంబ్లీ స్థానానికి పోటీ చేసే వాటిపై కూడా చర్చలు సాగాయి. గ్రీన్‌ కార్డు ఉన్నా పోటీ చేయవచ్చా లేక ఏదైనా ఇబ్బంది వస్తుందా అనే విషయమై న్యాయ సలహా తీసుకోవాలనుకున్నట్టు సమాచారం. డాక్టర్‌ సునీతమ్మకు కాంగ్రెస్‌ నాయకులను తులసిరెడ్డి పరిచయం చేశారు.

డాక్టర్‌ వైఎస్‌ రాజశేఖరరెడ్డి కుటుంబానికి అత్యంత సన్నిహితంగా మెలిగిన తులసిరెడ్డి మంచి చదువరి. సలహాలు సంప్రదింపులు చేయడంలో దిట్ట. అందుకనే సునీత ఆయన్ను కలిసి ఉంటారని, పోటీ చేస్తే వచ్చే ఇబ్బందుల గురించి చర్చించడానికే ఆమె వచ్చి ఉంటారని పార్టీ వర్గాలు తెలిపాయి.