రాజకీయ లబ్ధి కోసం చంద్రబాబు తన భార్యనూ వాడుకున్నారన్న సజ్జల!

మహాదోపిడి పుస్తకావిష్కరణ సభలో మాట్లాడిన సజ్జల ఇంకా ఏమన్నారంటే చంద్రబాబు అవినీతిని వ్యవస్థీకృతం చేశారు. అంతర్జాతీయ స్థాయిలో ఆంధ్రప్రదేశ్‌కు చంద్రబాబు చెడ్డ పేరు తెచ్చారు. వ్యవస్థలను అవినీతిమయం చేయటం, మీడియా ద్వారా ప్రజలను తప్పు దోవ పట్టించటంలో చంద్రబాబు ఆరితేరారు. తన పాలనలో కేంద్ర, రాష్ట్ర నిధులను చంద్రబాబు మింగేశారు. చంద్రబాబు అంతటి అవినీతి పరుడు లేరని ప్రధాని సైతం విమర్శించారు. మరి ఆయనతో బీజేపీ ఎలా పొత్తు పెట్టుకుంది? అని ప్రశ్నించారు.

‘ప్రతికూల శక్తులన్నీ కలిస్తే అది చంద్రబాబు. అధికారం కోసం ఎంతకైనా దిగజారుతారు. రాష్ట్రాన్ని అప్పడంలా నమిలి మింగేయటానికి చంద్రబాబు చేయాల్సిన ప్రయత్నాలన్నీ చేస్తున్నారు. చంద్రబాబు అవినీతి పరాకాష్ఠకు చేరినందునే 2019లో జనం ఓడించారు. ఐఎంజీ భారత్ పేరుతో చేసిన స్కాం ఇంటర్నేషనల్ క్లాసిక్ స్కాం అని తెలంగాణ హైకోర్టు సైతం అభిప్రాయపడింది. లక్ష రూపాయల పెట్టుబడితో వచ్చిన ఒక కంపెనీకి ఐదు రోజుల్లోనే 400 ఎకరాలను కేటాయించారు. వేల కోట్ల దోపిడీకి ఆ రోజుల్లోనే చంద్రబాబు ప్లాన్ చేశారు. అమరావతి స్కాం లాంటిదే ఐఎంజీ స్కాం కూడా. అంతకుముందు కుప్పంలో ఇజ్రాయిల్ సాగు పేరుతో ఒక స్కాం చేశారు. నీరు-చెట్టు పేరుతో దోపిడీ చేశారు. జన్మభూమి కమిటీల దోపిడీ ఏ ఇంట్లో అడిగినా చెబుతారు. ఇలాంటి అవినీతిపరుల విషయంలో ప్రజలే తగిన నిర్ణయం తీసుకోవాలి. షర్మిలకు స్క్రిప్ట్‌ ఎక్కడి నుంచి వస్తుందో అందరికీ తెలుసు అన్నారు’ సజ్జల.